• usd 424.51

  • eur 504.06

  • rub 5.8

  • cny 65.73

30 شىلدە, 08:12:40
الماتى
+19°

پرەزيدەنت قاسىم-جومارت توقاەۆ ماڭعىستاۋ جانە قىزىلوردا وبلىستارى اكىمدەرىنىڭ ەسەبىن تىڭدادى. بۇل تۋرالى بەرىك ءۋالي facebook پاراقشاسىندا جازدى.

توقاەۆ ماڭعىستاۋ جانە قىزىلوردا وبلىستارىنىڭ اكىمدەرىمەن وڭىرلەردەگى قازىرگى سانيتارلىق-ەپيدەميولوگيالىق جانە الەۋمەتتىك-ەكونوميكالىق احۋالدى تەلەفون ارقىلى تالقىلاعان.

"ماڭعىستاۋ وبلىسىنىڭ اكىمى سەرىكباي ترۇموۆ پرەزيدەنتكە covid-19 ىندەتىنە قارسى كۇرەس بويىنشا قابىلدانىپ جاتقان شارالار, سونىڭ ىشىندە, حالىققا ەكپە ەگۋ جانە مالدى جەم-شوپپەن قامتاماسىز ەتۋ ماسەلەلەرى جونىندە باياندادى.

مەملەكەت باسشىسى وبلىس تۇرعىندارىنا ەكپە سالۋ قارقىنىن ارتتىرۋ جونىندەگى جۇمىستاردى كۇشەيتۋدى, سونداي-اق ؛ەڭبەك داۋلارىن رەتتەۋ جانە بولدىرماۋ, ءوندىرىس ورىندارى مەن مۇناي كاسىپورىندارىنا قىزمەت كورسەتەتىن مەكەمە جۇمىسشىلارىنا الەۋمەتتىك قولايلى جاعدايدى قامتاماسىز ەتۋ شارالارىن قابىلداۋدى تاپسىردى.
سونىمەن قاتار پرەزيدەنت ۇكىمەتكە اكىمدىكپەن بىرلەسىپ, قۋاڭشىلىق سالدارىنا جانە جايىلىمدىق جەرلەردەگى ءشوپتىڭ تاپشىلىعىنا بايلانىستى قالىپتاسقان جاعداي بويىنشا فەرمەرلەر مەن اۋىل تۇرعىندارىن قولداۋ ءۇشىن قاجەتتى شارالار قابىلداۋدى تاپسىردى.

قىزىلوردا وبلىسىنىڭ اكىمى گۇلشارا ءابدىقالىقوۆا توقاەۆقا كوروناۆيرۋس ىندەتىمەن كۇرەستە جۇرگىزىلىپ جاتقان جۇمىستار تۋرالى ەسەپ بەردى. وڭىردەگى ۆاكسينا سالدىرۋعا ءتيىستى تۇرعىنداردىڭ 52 پايىزى ەكپە الدى.
سونىمەن قاتار وبلىس اكىمى ايماقتاعى سۋ شارۋاشىلىعىنا قاتىستى جاعدايدى دا باياندادى. بۇگىندە سىرداريا وزەنى ارقىلى وبلىسقا سەكۋندىنا 550 تەكشە مەتر سۋ كەلۋدە. شارۋاشىلىق سۋبەكتىلەرىنە سۋ بەرۋ كەزەگى مەن ونىڭ كولەمىن انىقتايتىن جۇمىس كوميسسياسى قۇرىلدى.

وبلىس اكىمىنىڭ ايتۋىنشا, ارال اۋدانىندا 12 شىلدەدە توتەنشە جاعداي جاريالانعان. وسىعان بايلانىستى ۇكىمەت رەزەرۆىنەن جانە وبلىستىق بيۋدجەتتەن جەم-شوپ سۋبسيدياسىنا, سونداي-اق سۋ ارنالارىن تازارتۋعا جانە ۇڭعىمالار قازۋعا قارجى ءبولۋ تۋرالى شەشىم قابىلدانعان.

پرەزيدەنت توقاەۆ قىزىلوردا وبلىسىنىڭ اكىمىنە حالىقتى ۆاكسينالاۋعا قاتىستى ءاقپاراتتىق-تۇسىندىرۋ جۇمىستارىن كۇشەيتۋدى, مۇناي-گاز سالاسىنداعى پروبلەمالاردى شەشۋ ءۇشىن كەشەندى امال قاراستىرۋدى, سونداي-اق قىزىلوردا وبلىسىنا قاراستى اۋداندارداعى زارداپ شەككەن شارۋاشىلىق سۋبەكتىلەرىنە جەم-شوپ دايىنداۋدى قامتاماسىز ەتۋدى تاپسىردى" دەلىنگەن حابارلامادا.

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر