پاشينيان جەڭىسى ءھام پۋتين جەڭىلىسى

ارمەنياداعى پارلامەنت سايلاۋىندا نيكول پاشينياننىڭ پارتياسى جەڭىسكە جەتىپتى. ءبىزدىڭ قازاقتار دا قىزىق ؛&ndash؛ ونى جەردەن الىپ, جەرگە سالىپ جاتقاندار بار. وسىلاردىڭ-اق جاندارى ءسىرى ەكەن دەيدى. مەنىڭشە ارمياندارد دۇرىس تاڭداۋ جاسادى. نەگە؟

بىرىنشىدەن, وتكەن جىلعى 9 قاراشا كۇنى ول رەسەي ارقىلى, ونى ارااعايىن رەتىندە قاتىستىرا وتىرىپ ازەربايجانمەن كەلىسىمگە كەلدى. شارتتارى قانداي اۋىر بولسا دا ول جەڭىلگەنىن مويىنداپ, ءارى قارايعى سوعىستىڭ ەش ماعىناسى قالماعانىن ءتۇسىندى. سول بويدا-اق ارمياندار كوشەگە شىعىپ, ونى ساتقىن دەپ شەرۋلەتتى, قاراباقتى بەرمەۋ كەرەك, سوعىستى توقتاتپاۋ كەرەك ەدى دەدى.

شىن جاعداي مۇلدەم باسقاشا بولاتىن. سوعىستى ءارى قاراي جالعاستىرسا, ارمەنيا ارمياسىنان ساۋ-تامتىق تا قالمايتىن. تەك قاراباق قانا ەمەس, ول بارىنەن دە ايىرىلاتىن ەدى. سوندىقتان پاشينيان ونسىز دا زاڭسىز باسىپ العان جەرلەرىن قايتىپ بەرىپ, ەسەسىنە ارمەنيا مەملەكەتىن ساقتاپ قالدى. ونىڭ بۇل ەڭبەگىن ارميان حالقى دۇرىس باعالاعان بولىپ وتىر. ال شەرۋلەتىپ جۇرگەندەر شىندىعىندا بۇرىنعى كوچەرياننىڭ, سارگسياننىڭ جاقتاستارى, بۇرىنعى قاراباق مافياسىنىڭ ماڭىنا توپتاسقاندار بولىپ شىقتى, ال ولاردىڭ سانى ونشا كوپ ەمەس.

ەكىنشىدەن, پاشينيان باتىستىق كوزقاراستاعى ادام. ول رف سياقتى ارتتا قالعان مەشەۋ ەلمەن شىنايى دوس بولا الادى دەگەنگە سەنبەيمىن. سوعىسقا دەيىن ول ورىس مەكتەپتەرىن جاۋىپ, ارمەنيادان رف اسكەري بازاسىن الىپ كەتۋدى جاقتاپ, باسقا دا رف-عا قارسى ارەكەتتەر جاساعانى ەسىمدە قالىپتى. جوعارعى باسشىلىقتان ءبىرقاتار شەنەۋنىكتەرگە تۇتقىنداۋلار جۇرگىزىپ, ولاردىڭ ماسكەۋ جاققا قاشا باستاعانى بەلگىلى. سول ەكى ورتادا سوعىس باستالدى دا ول امالسىز رەسەيگە جالىنۋعا ءماجبۇر بولدى.

پاشينياننىڭ وسىنداي ساياساتىنىڭ ارقاسىندا رف العاشقى كەزدە بۇل سوعىسقا ارالاسا قويمادى. سوعىس كوپ ۇزاماي اياقتالار, ءسويتىپ پاشينياندى جازالاۋدىڭ ءساتى تۇسەر دەپ ويلادى مەنىڭشە. الايدا پۋتين وڭباي قاتەلەستى. سوعىس بىردەن قاتتى قارقىن الدى دا, نەبارى 44 كۇندە ارمەندەر تاس-تالقان بولىپ جەڭىلدى. رف-نىڭ كەشەۋىلدەۋىنىڭ ءبىر سەبەبى ؛&ndash؛ تۇركيا فاكتورى بولۋى دا مۇمكىن. سوعىس باياۋ-سىلبىر جۇرىسپەن ءبىرازعا سوزىلار, سوسىن دا ۇلگەرەرمىز دەپ سان سوعىپ قالۋى دا عاجاپ ەمەس. ايتەۋىر ماسكەۋدىڭ ازەربايجانعا جانى اشىماعانى انىق. ونىڭ دالەلى ؛&ndash؛ رف بىتىمگەرشىلىك كۇشتەرىنىڭ قاراباقتان قاشقان ارمەندەردى تەزدەتىپ قاراباققا قايتا كوشىرۋگە مۇرىندىق بولعانىن ايتساق تا جەتكىلىكتى. ازەربايجان پرەزيدەنتى يلحام اليەۆتىڭ قاراباق ستاتۋسى سوعىس كەزىندە-اق تۇپكىلىكتى شەشىلدى, ەندى ەشقانداي ستاتۋس دەگەن بولمايدى دەگەنىنە قاراماستان ماسكەۋدىڭ ونى ءالى كۇنگە شەيىن مويىنداماي, مينسك كەلىسىمىن ايتا بەرۋى دە وسىنىڭ دالەلى بولا الادى. قالاي بولعاندا دا ءبىز ءۇشىن نەعۇرلىم پروگرەسسيۆتى كوزقاراستاعى باسشىنىڭ بولعانى دۇرىسىراق قوي دەگەن ويدامىن. ارمەنيا مەملەكەتى بار, ءبىر جاققا كوشىپ كەتكەلى جاتقان جوق, ياعني قارىم-قاتىناس ءبارىبىر كەرەك.

قۋانىش ەدىلحانتەگى

شولۋشى