22 ماۋسىم, 2021 news
فوتو:
پرەزيدەنت ؛قاسىم-جومارت توقاەۆ باسەكەلەستىكتى قورعاۋ جانە دامىتۋ اگەنتتىگىنىڭ ءتوراعاسى سەرىك ءجۇمانعاريندى قابىلدادى. بۇل تۋرالى ؛اقوردا سايتى حابارلادى. ؛
سايت مالىمەتىنشە, جۇمانعارين پرەزيدەنتكە الەۋمەتتىك ماڭىزى بار ازىق-تۇلىك تاۋارلارى نارىعىنداعى احۋالدى تۇراقتاندىرۋ ءۇشىن قابىلدانىپ جاتقان شارالار تۋرالى ەسەپ بەرگەن.
توقاەۆقا قازاقستانداعى بيرجا ساۋداسىنىڭ دامۋى, قۇرىلىس ماتەريالدارى, تۇرعىن ءۇي, جانار-جاعار ماي نارىقتارىنداعى باعاعا قاتىستى احۋال, سونداي-اق, كىرمە جولدار نارىعىنداعى جاعدايدى تۇراقتاندىرۋ جونىندە مالىمەت بەرىلدى.
"سەرىك جۇمانعارين قاسىم-جومارت توقاەۆقا مەملەكەتتىك جانە جەكە وپەراتورلاردىڭ قىزمەتىنە جۇرگىزىلگەن تالداۋ جونىندەگى تاپسىرماسىنىڭ ورىندالۋ ناتيجەلەرى تۋرالى باياندادى. سونداي-اق جۇمىس ىستەپ تۇرعان قازىرگى قۇرىلىمداردى وڭتايلاندىرۋ جونىندەگى ۇسىنىستارىن ايتتى. بولجام بويىنشا ولار 3,5 ميلليارد تەڭگە ەكونوميكالىق پايدا اكەلەدى.
سونىمەن قاتار پرەزيدەنتكە فارماسەۆتيكا, اۆتوجولدار قۇرىلىسى نارىقتارىنداعى, دەنساۋلىق ساقتاۋ سالاسىنداعى مونوپولياعا قارسى ارەكەت ەتۋ شارالارى تۋرالى ايتىلدى. سالالىق ۆەدومستۆونىڭ جەتەكشىسى توقاەۆقا باسەكەلەستىكتىڭ دامۋىنا كەدەرگى كەلتىرەتىن شەكتەۋلەردى جويۋ ءۇشىن اۋىل شارۋاشىلىعى مينيسترلىگىمەن بىرلەسىپ قابىلداپ جاتقان شارالار, ۇلتتىق جوبا جانە باسەكەلەستىكتى دامىتۋ جونىندەگى زاڭ جوباسى بويىنشا اتقارىلىپ جاتقان جۇمىستار جايىندا ايتتى" دەلىنگەن حابارلامادا.
كەزدەسۋ بارىسىندا قاسىم-جومارت توقاەۆ ازىق-تۇلىك جانە باسقا دا تاۋارلاردىڭ باعاسىن تومەندەتۋ جونىندە جۇيەلى شارالار قابىلداۋدى تاپسىرعان. اتاپ ايتقاندا قاسىم-جومارت توقاەۆ نەگىزگى ازىق-تۇلىك ءوندىرىسى كولەمىن ۇلعايتۋ, وتاندىق تاۋار وندىرۋشىلەرگە مەملەكەتتىك قولداۋ شارالارىنىڭ قولجەتىمدىلىگىن قامتاماسىز ەتۋ, حالىقتىڭ الەۋمەتتىك جاعدايى ناشار توپتارىنا قولداۋ كورسەتۋ قاجەت دەپ سانايدى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر