بايبەك-ماماي سوتى قالاي ءوتتى؟

تاۋەلسىز ساراپشى رينات رافحات ءادىل سوت قۇقىقتارىنىڭ ساقتالۋى بويىنشا حالىقارالىق قۇقىقتىق باستاما ۇيىمىنىڭ اتىنان جانبولات ماماي مەن nurotan پارتياسى ءتوراعاسىنىڭ ورىنباسارى باۋىرجان بايبەك اراسىندا باستالعان سوت پروسەسسىنە باقىلاۋشى رەتىندە قاتىسقانىن ءمالىم ەتتى. بۇل تۋرالى ول facebook پاراقشاسىندا جازدى.

"سوت 16:30 عا بەلگىلەنگەنمەن اۋەزوۆ اۋداندىق سوتىنان تاڭدالعان جاڭا بايلانىس جۇيەسى وتە ناشار بولدى. تالاپكەر جاق ەش كەدەرگىسىز قاتىسىپ وتىرعانىمەن, جاۋاپكەر تاراپتىڭ ۋاجدەرىن ەستىرتپەي ءار 5 مينۋت سايىن بايلانىس جۇيەسىنەن اۆتوماتتى تۇردە شىعارىپ تاستاپ وتىردى.

وسى جاعدايدى رەتتەۋ ءۇشىن سۋديا ءۇزىلىس جاريالادى.

بىرنەشە مينۋتتان كەيىن سوت وتىرىسى whatsapp ۆيدەو بايلانىس جۇيەسى ارقىلى 17:20 دا جالعاستى.

بىر ساعاتتان استام ۋاقىتقا سوزىلعان سوت وتىرىسىندا تالاپ قويۋشى تالاپكەر ب.بايبەك قاتىسپادى. قاتىسۋشى تەك ادۆوكاتى.

تالاپ ارىز ورىس تىلىندە جازىلعاندىقتان سوت وتىرىسى كەزىندە جاۋاپكەرلەرگە ورىس تىلىندە ءوتۋى كەرەكتىگىن ەسكەرتىپ, سۋديا سارتاەۆا ج.ماماي مەن ي.يمانبايعا ورىس تىلىندە سويلەۋدى سۇرادى. الايدا, ج.ماماي مەن ي.يمانباي مەملەكەتتىك قازاق تىلىندە سويلەيۋگە تولىق قۇقىقتارى بار ەكەنىن ايتىپ, ورىس ءتىلىن تۇسىنەتىنىن جانە الداعى سوت بارىسىندا وزدەرى كەلتىرەتىن ارگۋمەنتتەردىڭ ءبارىن قازاق تىلىندە ايتاتىندارىن مالىمدەدى. سۋديانىڭ كەلىسپەۋگە شاراسى قالمادى. مۇمكىن تالاپكەر جاق ب.بايبەكتىڭ قورعاۋشىسى تاشەنوۆا ورىس ءتىلدى بولۋى مۇمكىن. قازاق ءتىلىن تۇسىنبەسە اۋدارماشى الۋ, تالاپكەر تاراپتىڭ ماسەلەسى.

جاۋاپكەر جاقتىڭ قورعاۋشىلارى گ.نۋرپەيسوۆ پەن ا.تۋسۋپوۆا ءىستىڭ قوسىمشا ماتەريالدارىن الدىن الا الماعاندىقتان, تانىسپاعاندىقتان, ىسپەن تانىسۋ كەرەكتىگىن سۋدياعا ەسكەرتتى. الدىن الا ىسپەن تانىسۋلارى كەرەك ەكەنىن ايتتى. شاراسىز قالعان سۋديا 17 مامىر دۇيسەنبى كۇنى سوت ىسىمەن تانىسۋعا رۇقسات بەردى.

ي.يمانباي سۋديا سارتاەۆاعا كەلەسى سوت وتىرىسىن باسقا ۆيدەو بايلانىس جۇيەسىنە اۋىستىرۋدى تالاپ ەتتى. انىعىندا zoom جۇيەسى ارقىلى. سەبەبى سوت بارىسىنا قاتىسقىسى كەلەتىن باق وكىلدەرى ەش كەدەرگىسىز اقپاراتتى الۋىنا مۇمكىندىك جاساۋ كەرەك دەپ ءتۇسىندىردى. سۋديا سارتاەۆا كەلەسى سوتتىڭ نەگىزگى وتىرىسىندا باق وكىلدەرى پروسەسستى باقىلاۋعا مۇمكىندىك جاساۋعا تىرىساتىنىن ايتتى.

ج.ماماي: تالاپكەر, جەكە تۇلعا رەتىندە ارىز جازۋ كەزىندە ب.بايبەكتىڭ ءوزى تۇراتىن مەكەن-جايدى ەمەس, نۇروتان پارتياسىنىڭ مەكەن-جايىن كورسەتكەنىن ەسكەرتتى.
انىعىندا, بىرىنشىدەن نۇروتان مەكەن-جايى ب.بايبەكتىڭ تۇرعىلىقتى جەرى ەمەس. ەكىنشىدەن, "ار-نامىسىما ءتيدى, قىزمەتتىك ابىرويىما نۇقسان كەلتىردى" دەپ ءوز اتىنان, ياعني جەكە تۇلعا رەتىندە تالاپ ارىز تۇسىرگەسىن تۇرعىلىقتى مەكەن-جايى مىندەتتى تۇردە كورسەتىلۋى ءتيىس ەدى. ۇشىنشىدەن, ءوزىنىڭ قورعاۋشىسى تاشەنوۆا مەن جاۋاپكەر تاراپ ي.يمانباي مەن ج.مامايدىڭ جەكە ينن نومەرىنە دەيىن كورسەتىلىپ جازىلعان تالاپ ارىزدا ب.بايبەكتىڭ جەكە باسىن راستايتىن ينن نومەرىدە كورسەتىلمەگەن (تومەندە سۋرەتتە). ءبىراق, سۋديا سارتاەۆا تالاپكەر ب.بايبەكتىڭ مەكەن-جايى دۇرىس جازىلماعانى سوت ىسىنە اسەر ەتپەيتىنىن, ءوزى قالاعان مەكەن-جايدى كورسەتە الاتىنىن ايتىپ, تالاپكەر مەن جاۋاپكەردىڭ تەڭ قۇقىلى ەكەندىگىن ەسكەرمەگەندەي بولدى.
دەمەك, بەيتاراپتىلىق بۇزىلعانداي نەمەسە نەگىزگى سوت پروسەسسى باستالماي جاتىپ ءبىرجاقتى ءوتۋىن مەڭزەگەندەي بولدى.

سوت كەلەسى وتىرىسى سارسەنبى, ياعني مامىردىڭ 19 كۇنى ساعات 15:00 دە جالعاسادى" دەلىنگەن الەۋمەتتىك جەلىدەگى پاراقشاسىندا.