سەناتور مۇرات باقتيارۇلى جەردى قازاقستان ازاماتتارىنا ساتۋعا قارسى شىقتى

"جەر رەفورماسى بويىنشا قۇرىلعان كوميسسيانىڭ مۇشەسىمىن. ءبىراق قاتتى سىرقاتتانىپ قالۋىما بايلانىستى كوميسسيا وتىرىستارىنا قاتىسۋعا ەش مۇمكىندىگىم بولمادى. كوميسسيا اۋقىمدى جۇمىس جاساپ جاتقانىنان حاباردارمىن. جەرگە قاتىستى قوعامدا الۋان ءتۇرلى پىكىرلەر بارىن دا بىلەمىن. ونى تارازىلاپ ناقتى ءبىر بايلامعا كەلتىرۋ كوميسسيا ءۇشىن وڭاي شارۋا ەمەس ەكەنىن دە تۇسىنەمىن.

 ؛

2016 جىلى جەردى شەتەلدىكتەرگە ساتۋ مەن جالعا بەرۋگە قاتىستى زاڭعا سەناتور قۋانىش ايتاحانوۆپەن بىرگە قارسى بولعانبىز. داۋىسىمىز ەستىلمەدى. پرەزيدەنتىمىزگە ۇلكەن راحمەت, بۇل ماسەلەنى تۇبەگەيلى شەشىپ بەردى. ەندىگى ۇلكەن الاڭداۋشىلىق تۋدىراتىن جايت-جەردى ءوز ازاماتتارىمىزعا جەكە مەنشىككە ساتۋ, ساتپاۋ ماسەلەسى. كوپتەگەن مەملەكەتتەردە جەردى نارىقتىق تاۋار رەتىندە قاراپ جەكە مەنشىككە ساتىپ جاتادى. بىزدەگى جاعداي مۇلدەم بولەك. عاسىرلار بويى حالقىمىز جەردى توۆار رەتىندە ەمەس, ونى اناعا تيەپ, جەر انا دەپ قاستەرلەپ كەلدى. سوندىقتان دا وسى ەلدىڭ ازاماتى مەن كوميسسيا مۇشەسى, سەناتور رەتىندە جەردىڭ ءوز ازاماتتارىمىزعا دا ساتىلۋىنا قارسىمىن. بۇل مەنىڭ ازاماتتىق ۇستانىمىم. ۇلتىمىزدىڭ جارتىسىنان استامى ورتا تاپقا اينالمايىنشا بۇل ماسەلەنى قوزعاماۋىمىز كەرەك. كەلەر ۇرپاقتىڭ ۇلەسىنە قالدىرايىق. قازىرگى كەزدە جەردىڭ يەسى تەك مەملەكەت بولۋى ءتيىس. جەردى پايدالانام دەگەن ازاماتتارعا تەك جالعا عانا بەرۋگە كەدەرگىسىز بارلىق مۇمكىندىكتەر جاسالۋ قاجەت" دەپ جازدى سەناتور ءوزىنىڭ facebook پاراقشاسىندا.

 ؛

بۇعان دەيىن 14 ساۋىردە ءماجىلىس ؛"قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى" زاڭ جوباسىن ەكىنشى وقىلىمدا ماقۇلداپ, سەناتقا جولدادى. زاڭ جوباسى اۋىل شارۋاشىلىعى ماقساتىنداعى جەر ۋچاسكەلەرىن شەتەلدىكتەرگە جالعا بەرۋگە تىيىم سالۋدى كوزدەيدى.

قوعام بەلسەندىلەرى مەن جەر رەفورماسى جونىندەگى كوميسسيانىڭ كەي مۇشەلەرى جەردى قازاقستان ازاماتتارىنا دا ساتۋعا بولمايدى دەگەن پىكىردە. ولار جەر قازاقستاندىقتارعا ساتىلاتىن بولسا, وعان اقشاسى بارلاردىڭ عانا قولى جەتىپ, مۇنىڭ ارتى جەرگە يەلىك ەتەتىن الپاۋىتتاردىڭ شىعۋىنا اكەلىپ سوعاتىنىن ايتادى. سونداي-اق ؛جەردى قازاقستاندىقتارعا راسىمدەپ, شەتەل ازاماتتارى ەمىن-ەركىن پايدالىپ وتىرۋى مۇمكىن دەگەن قاتەردى العا تارتادى.