12 ءساۋىر, 2021 news
فوتو: dw.com سايتى
كوپتەگەن ەلدەر ترامپتىڭ پرەزيدەنتتىكتەن كەتۋىن كۇتىپ جۇرگەنى بەلگىلى بولا باستادى. ويتكەنى قانداي دا بولسىن رەسەيگە قاتىستى ماسەلەلەر تۋىنداسا, ترامپ ونى قارامايتىنى نەمەسە ارتىن سيىرقۇيىمشاقتاندىرىپ جىبەرەتىنى ايقىن بولدى.
ونى كورىپ وتىرعان ەلدەر ءبارىبىر بۇل باعىتتا ەشتەڭە ونبەيتىنىن, جەتەكشى دەرجاۆانىڭ نەمقۇرايلى, كەيدە ءتىپتى وزدەرىنە كىنا ارتىپ رەسەيدى اقتاۋعا تىرىساتىنىن ءبىلىپ كوپ نارسەنى كەيىنگە قالدىردى, باسقا پرەزيدەنتتىڭ كەلۋىن كۇتكەندەي بولدى. ەگەر ترامپ قايتا سايلانا قالسا, ودان تەك اۆتوريتارلىق ەلدەر عانا ۇتاتىن ەدى, اسىرەسە رەسەيدىڭ قۇدايى بەرەتىن ەدى.
بايدەن سايلانعالى, امەريكا بۇرىنعى, الەمدە قالىپتاسقان ءوزىنىڭ جەتەكشى رولىنە قايتىپ كەلە باستادى. قاۋىپسىزدىك تۋرالى ميۋنحەن كونفەرەنسياسىندا, g7 سامميتىندە سويلەگەن سوزدەرىندە ول ناتو اليانسىن قىزۋ قولداپ, ەۋرووداق ەلدەرى اراسىندا پايدا بولعان تۇسىنىسپەۋشىلىكتەردى جويۋعا تىرىستى. وسىنى سەزگەن كەيبىر ەلدەر بۇرىنعى پوزيسيالارىن باتىل بىلدىرە باستادى.
پولشا باس پروكۋراتۋراسى سمولەنسك تۇبىندەگى ىشىندە پرەزيدەنت كاچينسكيي جانە 70 پولشا باسشىلىعى مەن ەليتاسى بار ۇشاق اپاتىن تەرگەۋ مەرزىمىن 2021 جىلدىڭ اياعىنا دەيىن ۇزارتتى. باس پروكۋراتۋرانىڭ پىكىرىنشە, اپات تەراكت سالدارىنان بولعان. اپات ورنىنان تابىلعان "قارا جاشىك" رەسەيدە جانە ونداعى جازبالار وزگەرتىلگەن دەگەن كۇدىك بار. تەرگەۋمەن اينالىسىپ جاتقان حالىقارالىق توپ جىل اياعىنا دەيىن جۇمىستى اياقتاپ, سوڭعى قورىتىندى پىكىردى ايتۋعا ءتيىس دەيدى باس پروكۋراتۋرا. سونداي-اق باسقا دا پروسەسسۋالدىق شارالار, ونداعان كۋالەردەن جاۋاپ الۋ ءجۇرىپ جاتىر.
لوندون سوتى ءپۋتيندى سىناعان "اەروفلوتتىڭ" بۇرىنعى توپ-مەنەدجەرى گلۋشكوۆ لوندون ماڭىنداعى ءوزىنىڭ جەكەمەنشىك ۇيىندە تۇنشىقتىرىلىپ ولتىرىلگەن دەپ تانىدى. بۇل بۇرىنعى فسب وفيسەرى سەرگەي سكريپال مەن ونىڭ قىزىنىڭ "نوۆيچوكپەن" ۋلانعانىنان ءبىر اپتا وتكەن سوڭ جۇزەگە اسقان.
ال جالپى ترامپتىڭ جاعدايى قالاي؟ مانحەتتەن پروكۋراتۋراسى ترامپتىڭ سالىق دەكلاراسياسىن, قارجىلىق قۇجاتتارىن جانە ترامپتىڭ سالىقتارىن جۇرگىزگەن فيرمانىڭ جازىسقان حاتتارىن سوت ارقىلى قولعا تۇسىرگەسىن جۇمىسقا جاڭا تەرگەۋشى قابىلداپ جاتقانى بەلگىلى بولدى.
شاماسى وندا ءبىرتالاي "قىزىقتار" بار سياقتى. جاڭا تەرگەۋشى بۇرىن فبر-دە بۋحگالتەر-كريميناليست بولىپ جۇمىس ىستەگەن. بۇل ءىس تە وسى جىلدىڭ اياعىنا دەيىن اياقتالۋعا ءتيىس.
قۋانىش ەدىلحانتەگى
شولۋشى
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
ۇسىنىلعاندار
پىكىر قالدىرۋ
پىكىر