دوس كوشىم, جانىبەك قوجىق, مۇحتار تايجان/فوتوكوللاج
ماجىلىس بۇگىن العاشقى وقىلىمدا "قازاقستان رەسپۋبليكاسىنىڭ كەيبىر زاڭنامالىق اكتىلەرىنە جەر قاتىناستارى ماسەلەلەرى بويىنشا وزگەرىستەر مەن تولىقتىرۋ ەنگىزۋ تۋرالى" زاڭ جوباسىن ماقۇلدادى. زاڭ جوباسى اۋىل شارۋاشىلىعى ماقساتىنداعى جەرلەردى شەتەل ازاماتتارىنا ساتۋ مەن جالعا بەرۋگە تىيىم سالۋدى كوزدەيدى. 19 ناۋرىزدا قۇرىلعان جەر رەفورماسى بويىنشا كوميسسيانىڭ كەي مۇشەلەرى قامشى پورتالىنا ؛اۋىل شارۋاشىلىعى جەرلەرىن قازاقستان ازاماتتارىنا دا ساتۋعا تىيىم سالۋ ماسەلەسى تاسادا قالىپ بارا جاتقانىنا الاڭداۋشىلىق بىلدىرەتىنىن ايتتى.
كوميسسيا مۇشەسى, ساياساتتانۋشى دوس كوشىم پرەزيدەنت ق.توقاەۆ جەردى شەتەلدىكتەرگە جالعا بەرۋگە, ساتۋعا تىيىم سالۋ تۋرالى ايتىپ, قازاقستان ازاماتتارىنا دا ساتپاۋ جايىندا ءۇنسىز قالۋى تۇسىنىكسىز ەكەنىن, بۇدان ءقاۋىپ كورىپ وتىرعانىن جەتكىزدى.
&ndash؛ جەر رەفورماسى بويىنشا ەكىنشى رەت كوميسسيا قۇرۋدىڭ قاجەتىن تۇسىنبەيمىن. ءارقايسىسى 7-8 ساعاتقا سوزىلعان 2016 جىلعى العاشقى كوميسسيا وتىرىستارىندا جەر ماسەلەسىنە بايلانىستى بارلىعى ايتىلدى. حالىقتىڭ تالابى بەلگىلى: جەر شەتەلدىكتەرگە جالعا بەرىلمەسىن, ءوز ازاماتتارمىزعا ساتىلماسىن. قيسىنعا سالساق تا, زاڭعا سۇيەنسەك تە سول كوميسسيا وتىرىستارىنىڭ نەگىزىندە پارلامەنتتە جۇمىس كوميسسياسى قۇرىلىپ, ءتيىستى زاڭ قابىلدانۋى كەرەك بولاتىن. ءبىراق ولاي ىستەمەدى. ەندى ەكىنشى رەت كوميسسيا قۇرىلعان ەكەن, وندا الدىمەن قوعامدى تولعاندىرعان "جەر ەشكىمگە ساتىلمايدى, شەتەلدىكتەرگە جالعا بەرىلمەيدى" دەگەن ەكى ماسەلە بويىنشا شەشىم قابىلدانۋى كەرەك ەدى عوي. نەگە ءبىرى ايتىلدى دا, ەكىنشىسى تاسادا قالىپ وتىر؟ مەنى وسى الاڭداتادى. كوميسسيانىڭ ەكىنشى وتىرىسىندا الماسبەك سادىرباەۆ دەگەن ازامات "جەردى قازاقتارعا ساتۋ كەرەك" دەگەندى كوتەرىپ, ارنايى سلايد ۇسىندى. مەنىڭشە, بۇل كوميسسيا مۇشەلەرى مەن قوعامنىڭ رەاكسياسىن تەكسەرۋ ارەكەتى, &ndash؛ دەيدى دوس كوشىم.
ساياساتتانۋشىنىڭ سوزىنشە, جەردى قازاقستان ازاماتتارىنا ساتۋعا رۇحسات بەرۋدىڭ ارتىندا بىرنەشە ءقاۋىپ تۇر.
؛
&ndash؛ ءقازىر شارۋالاردا جەردى ساتىپ الاتىنداي قاراجات جوق. سوندىقتان جەرگە قولدارىن ىسقىلاپ وتىرعان قالتالىلار عانا يەلىك ەتە الاتىن بولادى. وسىدان كەلىپ جەرگە يەلىك ەتەتىن الپاۋىتتار شىعادى, جەر ەكىنشى ساتىلىمعا كوشەدى, تاۋارعا اينالادى. ەكىنشىدەن, جەردى ءوز ازاماتتارىمىزعا راسىمدەپ, شەتەل ازاماتتارى ەمىن-ەركىن پايدالىپ وتىرۋى مۇمكىن. مۇنداي ءقاۋىپ بار. ماعان ءتۇرلى ادامداردان وسىنداي حابار كەلىپ وتىرادى. كەشە عانا سارىاعاشتا سونداي جاعداي بولىپ جاتقانى تۋرالى حابار كەلدى. زاڭ جاعىنان يەسى قازاق, ال پايدالانىپ وتىرعاندار &ndash؛ وزبەكتەر. شەتەلدىكتەر زاڭدى اينالىپ ءوتۋ ارقىلى قازاق جەرىنە يەلىك ەتە الاتىن وسىنداي جولدار كوپ. سوندىقتان جەردى ءوز ازاماتتارمىزعا ساتۋعا ءبىرجولا تىيىم سالۋ كەرەك. بۇل ماسەلەنىڭ ايتىلماي قالىپ وتىرعانىن حالىق تۇسىنبەي وتىرعان سياقتى, &ndash؛ دەيدى ول.
؛
كوميسسيا مۇشەسى, بەلسەندى جانىبەك قوجىق تا اۋىل شارۋاشىلىعى جەرلەرىن شەتەل ازاماتتارىنا ساتۋ مەن جالعا بەرۋگە تىيىم سالۋ تۋرالى زاڭ جوباسى شەتەلدىكتەردىڭ قازاقستان جەرىنە يەلىك ەتۋ ءقاۋپىن سەيىلتپەيدى دەپ سانايدى.
؛
&ndash؛ قازاقستان ازاماتتارىنىڭ اتىنان شەتەلدىكتەر جەرىمىزدى ساتىپ المايتىنىنا ەش كەپىلدىك جوق. اۋىل شارۋاشىلىعى جەرلەرى قازاقستان جەرىنىڭ 80 پايىزعا جۋىعىن قۇرايدى. بۇل ۇلكەن جەر. ەگەر وسى جەر ءتۇرلى جولمەن شەتەل ازاماتتارىنىڭ قولىنا وتەر بولسا, بۇل ۇلتتىق قاۋىپسىزدىگىمىزگە ءقاۋىپ توندىرەدى. ءبىز بىرنەشە بەلسەندى بولىپ ماسەلەنى قوعامدىق كوميسسيادا داۋىسقا سالۋعا بولمايدى دەگەندى كوتەرىپ وتىرمىز. ويتكەنى داۋىسقا سالاتىن بولساق, ءبىز جەڭىلىپ قالامىز. سوندىقتان پارلامەنت دەڭگەيىندە "جەر ەشكىمگە ساتىلمايدى" دەپ زاڭ جۇزىندە شەشىلۋى كەرەك. ءبىراق ول حالىق تاراپىنان قولداۋ, ماسەلەگە ءۇن قوسۋ بولعاندا عانا ىسكە اسادى. ەگەر حالىق قوزعالماسا, ءۇنسىز جاتسا, بىردە-بىر ماسەلە شەشىلمەيدى. پرەزيدەنتتىڭ "جەر شەتەلدىكتەرگە ساتىلمايدى" دەگەنى, 2016 جىلعى تولقۋ سەكىلدى نارازىلىق ارەكەتتەردىڭ الدىن الۋىنىڭ بەلگىسى. ءقازىر حالىقتىڭ بەلسەندى توبى عانا ماسەلەگە نازار اۋدارىپ وتىر. تىم بولماسا, الماتىدا, ەلوردادا 10 مىڭ, 20 مىڭ ادام "جەر ساتىلماسىن" دەپ ساياسي بەلسەندىلىك تانىتسا, جەرگە دە, ەلگە دە يە بولا الامىز. جەردى ساتۋعا تىيىم سالىنباي, ماسەلەنىڭ قايتادان قىلتيىپ شىعۋىنا ءبىر جاعىنان حالىقتىڭ وسى ەنجارلىعى دا سەبەپ. ەگەر حالىقتىڭ ەڭ بولماسا 1 پايىزى "جەر ساتىلماسىن" دەپ شىقسا, سونىڭ باسىندا ءوزىم جۇرۋگە دايىنمىن, &ndash؛ دەيدى جانىبەك قوجىق.
؛
كوميسسيا مۇشەسى, قوعام بەلسەندىسى, ەكونوميست مۇحتار تايجان جەردى جەكەمەنشىككە بەرۋ ەلدى مۇشكىل جاعدايعا اكەلىپ سوعۋى ىقتيمال دەگەن پىكىردە.
؛
&ndash؛ قازاقستاندا جەردىڭ جەكەمەنشىككە ءوتۋىن قالايتىن وتە ىقپالدى كۇشتەر بار. ءتىپتى كوميسسيا قۇرامىندا دا جەردى جەكەمەنشىككە بەرۋدى ۇسىنىپ جاتقاندار از ەمەس. وسى جەردە ءبارىمىز جۇقىرىقتاي جۇمىلىپ, جەردى ساتۋعا قارسى تۇرۋىمىز كەرەك. ويتكەنى جەكەمەنشىككە رۇحسات ەتىلەتىن بولسا, قازاقستان تەرريتورياسىنىڭ 80 پايىزى جەكەمەنشىككە ءوتۋى مۇمكىن. ولاي بولسا, بولاشاعىمىز بۇلىڭعىر. سوندىقتان ءوز ازاماتتارىمىزعا تەك قانا ارەندا بولۋى كەرەك دەگەندى تاباندى تۇردە تالاپ ەتۋ كەرەك, &ndash؛ دەيدى جەر رەفورماسى جونىندەگى كوميسسيا مۇشەسى.
؛
2016 جىلى اۋىل شارۋاشىلىعى ماقساتىنداعى جەرلەردى ساتۋ جانە جالعا بەرۋدى كوزدەيتىن زاڭ جوباسى قوعامدا داۋعا ۇلاسىپ, ەلدىڭ بىرنەشە قالاسىندا جەر ميتينگتەرى وتكەن. اتىراۋدا وتكەن ميتينگتەرگە قاتىسقان بەلسەندىلەر ماكس بوقاەۆ پەن تالعات ايان "الەۋمەتتىك ارازدىق تۋدىردى", "جالعان اقپارات تاراتتى", "ميتينگ وتكىزۋ زاڭدارىن بۇزدى" دەپ ايىپتالىپ, 5 جىلعا سوتتالعان. بۇگىندە ەكى بەلسەندى دە بوستاندىقتا.
جەر ميتينگتەرىنەن كەيىن ەلدىڭ سول كەزدەگى پرەزيدەنتى نۇرسۇلتان نازارباەۆ زاڭ جوباسىنا بەس جىلعا موراتوريي جاريالاپ, جەر ماسەلەسى بويىنشا كوميسسيا قۇرىلدى. بيىل موراتوريي مەرزىمى اياقتالادى.
قازىرگى پرەزيدەنت ق.توقاەۆ جەر شەتەلدىكتەرگە ساتىلمايتىنى تۋرالى 2019 جىلعى قىركۇيەكتە قازاقستان حالقىنا ارناعان العاشقى جولداۋىندا, بيىل قاڭتاردا جاريالانعان "تاۋەلسىزدىك بارىنەن قىمبات" ماقالاسىندا جانە ۇلتتىق قوعامدىق سەنىم كەڭەسىنىڭ 5-وتىرىسىندا مالىمدەگەن. الايدا 2016 جىلى ازاماتتار الاڭعا شىققاندا قويعان "جەر ءوز ازاماتتارىمىزعا دا ساتىلماسىن" دەگەن تالاپ تۋرالى ءسوز قوزعاعان ەمەس.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر