ديماشتىڭ اتى مارس عالامشارىنا جەتتى

قازاقستاندىق ءانشى ديماش قۇدايبەرگەننىڭ ەسىمى مارس عالامشارىنا جەتتى, دەپ حابارلادى dimashnews سايتى.

سايت مالىمەتىنشە, 18 اقپاندا جاڭا perseverance روۆەرى مارس عالامشارىنا عىلىمي جابدىقتارمەن قاتار, ميلليونداعان ادامنىڭ ەسىمدەرىن الىپ باردى. ولاردىڭ اراسىندا ديماش قۇدايبەرگەننىڭ دە ەسىمى بار.

سونداي-اق, perseverance مارسقا كوروناۆيرۋس ينفەكسياسىمەن كۇرەسكەن دارىگەرلەردىڭ قۇرمەتىنە ەسكەرتكىش تاقتا مەن nasa-نىڭ "مارسقا ءوز ەسىمىڭدى جىبەر" اكسياسىنا قاتىسقان 11 ميلليونعا جۋىق ادامنىڭ اتى جازىلعان تىرناق كولەمىندەگى ءۇش كرەمنيي ءچيپتى جەتكىزگەن.

بۇعان دەيىن اقش, تۇركيا, رەسەي جانە تاعى باسقا ەلدەردەگى dears (ديماشتىڭ جانكۇيەرلەرى) تاقتايشاعا ديماش قۇدايبەرگەننىڭ ەسىمىن قويۋدى ۇسىنعان.

perseverance روۆەرىنىڭ مارستاعى ەجەلگى ءومىردىڭ بەلگىلەرىن ىزدەۋ مەن پلانەتانىڭ بەتىن زەرتتەۋ ميسسياسى شامامەن ەكى جىلعا سوزىلادى دەپ كۇتىلىپ وتىر.

 ؛