پرەزيدەنت يندۋستريا جانە ينفراقۇرىلىمدىق دامۋ ءمينيسترىن قابىلدادى

پرەزيدەنت قاسىم-جومارت توقاەۆ يندۋستريا جانە ينفراقۇرىلىمدىق دامۋ ءمينيسترى بەيبىت اتامقۇلوۆتى قابىلدادى. بۇل تۋرالى akorda.kz سايتى حابارلادى. ؛

توقاەۆقا بيىلعى جىلدىڭ 10 ايىندا جۇزەگە اسىرىلعان مەملەكەتتىك باعدارلامالاردىڭ قورىتىندىلارى مەن مينيسترلىك قىزمەتىنىڭ باسىم باعىتتارى جايىندا ەسەپ بەرىلدى.

مەملەكەت باسشىسىنا 2020-2025 جىلدارعا ارنالعان يندۋستريالاندىرۋ باعدارلاماسى بويىنشا اتقارىلعان جۇمىستار ەگجەي-تەگجەيلى باياندالدى. بەيبىت اتامقۇلوۆ پاندەمياعا قاراماستان جىل باسىنان بەرى ونەركاسىپ سالاسى 3,2 پايىزعا وسكەنىن ايتتى. سونىمەن قاتار جىل سوڭىنا دەيىن ينۆەستيسيا كولەمى 995 ميلليارد تەڭگەنى قۇرايتىن 200 جوبا ىسكە اساتىنىن جەتكىزدى.

مينيستر جىل باسىنان بەرى "نۇرلى جول" باعدارلاماسىنىڭ شەڭبەرىندە جالپى ۇزىندىعى 2,6 مىڭ شاقىرىم اۆتوموبيل جولى پايدالانۋعا بەرىلگەنىن اتاپ ءوتتى. ەلارالىق جۇك تاسىمالى دا وسكەن. اتاپ ايتقاندا, قىتاي-ەۋروپا-قىتاي باعىتىنداعى تاسىمال 61,6 پايىزعا ارتقان.

"نۇرلى جەر" باعدارلاماسى بويىنشا 14,1 ميلليون شارشى مەتر تۇرعىن ءۇيدى پايدالانۋعا بەرۋ جوسپارلانعان. ءمينيستردىڭ ايتۋىنشا, جىل سوڭىنا دەيىن اتالعان كورسەتكىشتى 15 ميلليون شارشى مەترگە جەتكىزۋ كوزدەلگەن. ال 2025 جىلعا دەيىن بارلىعى 103 ميلليون شارشى مەتر باسپانا سالىنادى.

قاسىم-جومارت توقاەۆ بەيبىت اتامقۇلوۆقا جەرگىلىكتى جەرلەردەگى جولداردى جوندەۋ, ارەندالىق باسپانا قۇرىلىسىن ارتتىرۋ, سونداي-اق ۆەدومستۆونىڭ نەگىزگى باعىتتارى بويىنشا ءبىرقاتار تاپسىرما بەردى.