الماتى گورنيزونىنىڭ اسكەري سوتىندا قوردايداعى جاپپاي تارتىپسىزدىككە قاتىسقان جەتى ادامعا قاتىستى ۇكىم شىقتى, دەپ حابارلادى sputnik قازاقستان سايتى.

سايت مالىمەتىنشە, ولار ءارتۇرلى مەرزىمگە قامالىپ, سوتتالعانداردىڭ ءاربىرى زارداپ شەككەندەردىڭ قورىنا 20 اەك كولەمىندە اقشا اۋدارىپ بەرۋگە مىندەتتەلگەن.

قازاقستاننىڭ اسكەري سوتى اقپان ايىندا جامبىل وبلىسى قورداي اۋدانىنداعى تارتىپسىزدىك بويىنشا بۇرىن سوتتالعان ازاماتتاردىڭ اپەللياسيالىق شاعىمىن قاراعان.

قىركۇيەك ايىنىڭ سوڭىندا الماتى گارنيزونىنىڭ اسكەري سوتى تارتىپسىزدىككە قاتىسقان جەتى ادامعا قاتىستى شەشىم شىعاردى. ولار ءارتۇرلى مەرزىمگە قامالعان. رەسمي مالىمەتكە سايكەس, قورداي اۋدانى الماتى گورنيزونىنا قارايدى. سوتتالعان ءبىر ازامات اسكەري قىزمەت اتقارعان. سول سەبەپتى وسى قىلمىستىق ىستەر ؛اسكەري سوتتا قارالدى.

سوتتالعاندار اپەللياسيالىق شاعىم بەردى, ونى اسكەري سوت قارادى. ناتيجەسىندە ولاردىڭ تورتەۋىنە قاتىستى ۇكىم جەڭىلدەتىلدى. باس بوستاندىعىنان ايىرۋ جازاسى باس بوستاندىعىن شەكتەۋ جازاسىنا اۋىستىرىلدى.

قالعان ءۇش سوتتالۋشىعا قاتىستى ۇكىم وزگەرىسسىز قالدى. ويتكەنى وتەماقى تولەمەگەن جانە ولار قىلمىستى قايتالاعان.

اپەللياسيالىق ينستانسيا شەشىم شىعارۋ كەزىندە زارداپ شەككەندەردىڭ ءتورت سوتتالعان ادامعا قاتىستى جازانى جەڭىلدەتۋ تۋرالى پىكىرىن, مەملەكەتتىك ايىپتاۋشىنىڭ ۇستانىمىن, ءىس بويىنشا جەڭىلدەتەتىن ءمان-جايلاردىڭ بولۋىن, جاپپاي تارتىپسىزدىكتەر بارىسىندا ءاربىر سوتتالعان ادامنىڭ جەكە-جەكە ىس-ارەكەتىن نازارعا العان.

ەسكە سالساق, 7 اقپانعا قاراعان ءتۇنى جامبىل وبلىسى قورداي اۋدانىنىڭ قازاق جانە دۇنگەن تۇرعىندارى اراسىندا جاپپاي توبەلەس بولعان. وقيعا سالدارىنان 11 ادام كوز جۇمدى. ءورت بولىپ, سالدارىنان تۇرعىن ۇيلەر مەن كوممەرسيالىق نىساندار, اۆتوكولىكتەر بۇلىنگەن. كەيىننەن 120-دان استام قىلمىستىق ءىس تەرگەلىپ جاتقانى بەلگىلى بولدى. 1000-نان اسا ادام قاتىسقان جاپپاي تارتىپسىزدىكتەن 780 وتباسى زارداپ شەككەن.

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

باننەر

پىكىر قالدىرۋ

پىكىر