29 قىركۇيەك, 2020 news

"؛جان داۋىسىڭ شىعادى"؛. بقو-دا تانىمال ساكسافونشى جول اپاتىنان قايتىس بولدى

فوتو: uralskweek.kz

باتىس قازاقستان وبلىسىندا تانىمال ساكسافونشى داۋلەت شامەلوۆ جول اپاتىنان قازا تاپتى. بۇل تۋرالى ؛"ۋرالسكايا نەدەليا" ؛باسىلىمى حابارلادى.

وقيعا 25 قىركۇيەك كۇنى يندەر-ورال تاس جولىندا كونەكەتكەن كەنتىنىڭ ماڭىندا بولعان. جول اپاتىنان بەس ادام زارداپ شەگىپ, داۋلەت شامەلوۆ جەدەل جاردەم كولىگى كەلگەنشە وقيعا ورنىندا قايتىس بولعان.

دوسى, "تەرەكتى جاڭالىعى" گازەتىنىڭ باس رەداكتورى ادىلەت ورىنباساروۆتىڭ ايتۋىنشا, ۇيالى بايلانىستىڭ ناشار بولۋىنان جەدەل جاردەم كولىگىن ۇزاق ۋاقىت بويى شاقىرا الماعان. ول ءوزىنىڭ facebook جەلىسىندەگى پاراقشاسىندا بولعان وقيعا جايلى ويىن جازدى.

"يا, اجال ايتىپ كەلمەيدى. ءبىراق بۇگىنگى وقيعا مەنىڭ تاراپىمنان زاڭدى ساۋالدار تۋىنداتتى.

الدىمەن, باياعى ۇيالى بايلانىستىڭ بولماۋى. ويباي, دامىعان قازاقستان, ونلاين وقۋ, الەمنىڭ ۇزدىك 30 مەملەكەتىنىڭ قاتارى دەپ ۇرانداتامىز. قانشاما اۋىلدار عالامتور بىلاي تۇرسىن, كادىمگى ساپالى ۇيالى بايلانىسقا ءزارۋ. مۇقتاج! ادام جانى قىل ۇستىندە تۇرعاندا جەدەل جاردەمگە تەلەفون شالىپ, كومەككە شاقىرايىن دەسەڭ بايلانىس جوق! جوق! جان داۋىسىڭ شىعادى. ءبىراق تاپپايسىڭ!

ودان كەيىن جىر بولعان مەديسينا ماسەلەسى. اينالايىن, جوعارىداعى كوكەلەر! ەستيتىن مەملەكەتتىڭ قىزمەتكەرلەرى! اۋىلداعى مەديسينانىڭ ءحالىن بىلەسىزدەر مە سىزدەر؟ ساعاتتاپ كۇتكەن جەدەل جاردەمنىڭ ءحالى ناشار ادامدى سالىپ, كولىككە دەيىن جەتكىزەر قاراپايىم زەمبىلى جوق. دەم الۋى قيىنداعان ادامعا سالاتىن دارىلىك پرەپاراتتار تابا الماي بايعۇس دارىگەرلەر سارساڭعا ءتۇستى. ءبىر جەدەل جاردەم كولىگى وقۋشىلاردى تاسىپ ءجۇر. مىنە, دامىعان ەل! مەدبيكەلەردىڭ شاراسىزدىعىن, قولدارى بايلاۋلى ەكەندىگىن كورىپ بۇيتكەن مەديسيناڭ قۇرسىن دەپ ايقايلاعىم كەلدى" دەپ جازدى مارقۇمنىڭ دوسى, ادىلەت ورىنباساروۆ.

وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتى جول كولىك اپاتىنىڭ بولعانىن راستادى.

"2020 جىلدىڭ 25 قىركۇيەگىندە ساعات 13:40-تا يندەر-ورال تاس جولىندا كونەكەتكەن كەنتىنىڭ ماڭىندا جەدەل جاردەمگە جول اپاتى تۋرالى حابارلاما كەلىپ ءتۇستى. وندا بەس ادام بولدى. 1995 جىلى تۋعان ەر ادام, چاپاەۆ اۋىلىنىڭ تۇرعىنى جەدەل جاردەم كەلگەنشە قايتىس بولدى" دەلىنگەن حابارلامادا.

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

باننەر

پىكىر قالدىرۋ

پىكىر