11 قىركۇيەك, 2020 news

قىتاي مەن ءۇندى اسكەرىنىڭ قاقتىعىسى دەلىنگەن ۆيدەو جالعان (ۆيدەو)

فوتو: ۆيدەودان سكرين

قىتايدىڭ الەۋمەتتىك جەلىلەرىندە ءۇندىستان مەن قىتاي اراسىنداعى شەكارانىڭ داۋلى ۋچاسكەسىندە قوس ەلدىڭ اسكەري كۇشتەرى اراسىنداعى قاقتىعىستىڭ ۆيدەوسى تارادى. بۇل تۋرالى south china morning post سايتى حابارلادى.

جازبا ينتەرنەتتە العاش 8 قىركۇيەكتە جاريالانعان. بەينەجازبادا جۇدىرىقتاسىپ, دۋبينكامەن ءبىرىن-بىرى ۇرىپ جاتقان ادامدار تاۋلى ايماقتا ماسەلەلەرىن شەشىپ جاتقان قىتاي مەن ءۇندىستان اسكەري كۇشتەرى دەلىنگەن. الايدا ءوزىنىڭ سەنىمدى دەرەككوزىنە (اسكەري ساراپشى) سۇيەنگەن قىتايلىق باسىلىم ۆيدەونىڭ جاساندى ەكەنىن جانە ونىڭ "بىرنەشە اي بۇرىن" جاسالعانىن حابارلادى. دەرەككوز اسكەري كۇشتەر "ۇستامدىلىق تانىتىپ" اتىس قارۋىن قولدانباعانىن اتاپ وتكەن.

15 ماۋسىمدا ءۇندىستاننىڭ لاداح ايماعىنداعى گالۆان القابىندا ءۇندى جانە قىتاي اسكەري كۇشتەرى اراسىندا جانجال بولعانىن ەسكە سالعان باسىلىم, ونىڭ ناتيجەسىندە كەم دەگەندە 20 ءۇندى اسكەرى قايتىس بولعانىن جازدى. سول كەزدە بەيجىڭ وقيعادان قانشا ادام زارداپ شەككەنىن ايتۋدان باس تارتقان.

وزىن ءانونيمدى تۇردە جاريالاۋدى سۇراعان اسكەري ساراپشىنىڭ ايتۋىنشا, ۆيدەوداعى قاقتىعىس 15 ماۋسىمدا بولعان جاعداي ەمەس, بۇل مامىر ايىندا گالۆان القابىندا بولعان.

"ولاردىڭ قارۋلارىنا قاراعاندا, بۇل بەينە ەرتەرەكتە بولعان قاقتىعىس, ويتكەنى ءبىز ەكى جاقتىڭ دا مامىر ايىنان كەيىن عانا وزدەرىنىڭ جابدىقتالعان بولىمشەلەرىن جىبەرە باستاعانىن بىلەمىز" دەدى سەنىمدى دەرەككوز.

ىلمەك سوزدەر: قىتاي ءۇندى قاقتىعىس

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

باننەر

پىكىر قالدىرۋ

پىكىر