14 تامىز, 2020 news
فوتو: akorda.kz
پرەزيدەنت قاسىم-جومارت توقاەۆ ؛يندۋستريا جانە ينفراقۇرىلىمدىق دامۋ مينيسترى ؛بەيبىت اتامقۇلوۆتى قابىلدادى. بۇل تۋرالى اقوردا حابارلادى.
مينيستر مەملەكەت باسشىسىنا يندۋستريا جانە ينفراقۇرىلىمدىق دامۋ مينيسترلىگىنىڭ بيىلعى 7 ايدا اتقارعان جۇمىسىنىڭ قورىتىندىسى, سونداي-اق مەملەكەتتىك باعدارلامالاردىڭ جۇزەگە اسىرىلۋ بارىسى تۋرالى ەسەپ بەردى.
اتامقۇلوۆتىڭ ايتۋىنشا, پاندەميا سالدارىنان تۋىنداعان داعدارىس جاعدايىنا قاراماستان مينيسترلىككە قاراستى سالالاردا وڭ ناتيجەلەرگە قول جەتكەن. مينيستر بۇگىندە "نۇرلى جەر" باعدارلاماسى اياسىندا 7 ملن شارشى مەتر تۇرعىن ءۇي سالىنىپ, 61,3 مىڭ وتباسىنىڭ تۇرمىستىق جاعدايى جاقسارعانىن جەتكىزدى. سونىمەن قاتار "نۇرلى جول" باعدارلاماسى بويىنشا رەسپۋبليكالىق جانە جەرگىلىكتى ماڭىزى بار 9,8 مىڭ شاقىرىم جولدىڭ قۇرىلىسى جانە قايتا جوندەۋ جۇمىستارى جۇرگىزىلىپ جاتىر.
بۇدان بولەك جىل سوڭىنا دەيىن يمندۋستريالاندىرۋ كارتاسىن جۇزەگە اسىرۋ بويىنشا ەلىمىزدىڭ بارلىق وڭىرلەرىندە 160 جوبانى ىسكە قوسۋ جوسپارلانىپ وتىر.
كەزدەسۋ سوڭىندا پرەزيدەنت وڭدەۋ ونەركاسىبىن ودان ءارى ىنتالاندىرۋعا جانە ىشكى نارىقتى تولىق قامتۋ ماقساتىندا وڭدەلگەن ونىمدەردىڭ ۇلەسىن ارتتىرۋعا قاتىستى ءبىرقاتار تاپسىرما بەردى.
قاسىم-جومارت توقاەۆ بيىل پايدالانۋعا بەرىلەدى دەپ جوسپارلانعان تۇرعىن ۇيلەردى ۋاقىتىندا تابىستاۋدىڭ ماڭىزدى الەۋمەتتىك مىندەت ەكەنىن اتاپ ايتتى. سونداي-اق كولىك-ترانزيت ينفراقۇرىلىمىن جاڭعىرتۋ جۇمىستارىن جالعاستىرۋ قاجەتتىگىن اتاپ ءوتتى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر