قازاقستان كۇردتەرىنىڭ ۇندەۋى: بەيبىتشىلىك ءۇشىن ءبارىن جاساپ جاتىرمىز

"كۇردتەردىڭ باربانگ قاۋىمداستىعى" قوعامدىق بىرلەستىگىنىڭ وكىلدەرى جامبىل وبلىسى تالاس اۋدانى قاسقابۇلاق اۋىلىندا بولعان بۇزاقىلىق دەرەگىنە بايلانىستى قازاقستاندىقتارعا ۇندەۋ جاسادى.

11 تامىزدا ساعات 1:30-دا تالاس اۋدانى پوليسيا بولىمىنە قاسقابۇلاق اۋىلىنداعى بۇزاقىلىق ارەكەت تۋرالى حابارلانعان. وبلىستىق پوليسيا دەپارتامەنتى قىزمەتكەرلەرى 14 ادامدى ۇستاپ, قىلمىستىق كودەكستىڭ 293-بابى (بۇزاقىلىق) بويىنشا سوتقا دەيىنگى تەرگەۋ امالدارىن جۇرگىزىپ جاتىر. الەۋمەتتىك جەلىدە جانجال قازاق-كۇرد جىگىتتەرى اراسىندا بولعانى تۋرالى اقپارات تاراعان.

ۇندەۋ جاساعان بىرلەستىك وكىلدەرى كەلەڭسىز جايت جەكەلەگەن ادامداردىڭ ارەكەتىنەن بولعانىن, تۇسىنبەۋشىلىك لەزدە شەشىلگەنىن حابارلادى.

"قىمباتتى جەرلەستەر, ءقادىرلى قازاقستاندىقتار!

جامبىل وبلىسى قاسقابۇلاق اۋىلىندا بولعان سوڭعى كۇندەردەگى وقيعا قوعام نازارىن اۋدارماي قويمادى. مەديسينا مەكەمەسىندە ەرەكشە ەسەپتە تۇرعان ەكى ادام اراسىنداعى تۇرمىستىق جانجال تۇسىنبەۋشىلىككە ۇرىندىرىپ, جەكەلەگەن جاس بالالاردىڭ شاعىن بۇزاقىلىعىنا اكەلىپ سوقتى.

الايدا بۇزاقىلار ارەكەتىنىڭ جاي-جاپسارى لەزدە انىقتالىپ, ءقازىر تەكسەرىس ءجۇرىپ جاتىر. جاس بالالار مەن ولاردىڭ اتا-انالارى بىر-بىرىنەن كەشىرىم سۇرادى.

كەي ادامداردىڭ جاڭساق دەرەك تاراتىپ, الەۋمەتتىك جەلىدە تۇيمەدەيدى تۇيەدەي ەتىپ جازۋى ۇزاق جىلدان بەرى قويان-قولتىق ارالاسىپ, بىرگە ەڭبەكتەنىپ, وتباسىلارىمەن دوستاسىپ كەتكەن ادامداردى جانجالداستىرۋ, بىر-بىرىنە ايداپ سالۋ ماقساتىن كوزدەيدى.

بىز ءزابىر كورسەتۋ, توناۋ, ويران سالۋ, قازاقتاردىڭ كۇرتتەرگە قىرىن قارايتىنى تۋرالى دەرەكتەردىڭ جالعان ءارى ارانداتۋ ەكەنىن مالىمدەيمىز. اۋىلدا ەشكىم زارداپ شەككەن جوق, ادامداردىڭ مۇلكى قيراعان جوق, ەشكىم ەشقايدا قاشپادى. ءبارى تىنىش تۇرىپ, جۇمىس ىستەپ جاتىر. مۇنداي اڭگىمەلەردى قىلمىستىق سپەكۋلياسيا دەپ تانىپ, ادامداردى الداۋدى توقتاتۋدى تالاپ ەتەمىز.

بىز ەلدە بەيبىتشىلىك پەن كەلىسىم بولۋى ءۇشىن ءبارىن جاساپ جاتىرمىز, جاساي بەرەمىز دە. وتانىمىز دەپ سانايتىن قازاقستاندى گۇلدەندىرۋ جولىندا ەڭبەكتەنىپ كەلدىك, ەڭبەكتەنە بەرەمىز دە" دەلىنگەن بىرلەستىك ۇندەۋىندە.