12 تامىز, 2020 news

ماۋلەن اشىمباەۆ: سەنات ەلىمىزدىڭ بارلىق ءوڭىرىنىڭ پارلامەنتتەگى وكىلدىگىن قامتاماسىز ەتەدى

فوتو: egemen.kz

سەنات ءتوراعاسى ماۋلەن اشىمباەۆ بۇگىن سەنات دەپۋتاتتارىنىڭ سايلاۋى ءوتىپ جاتقانىن ايتىپ, قولدانىستاعى زاڭناماعا سايكەس ءار وبلىستان, استانادان جانە رەسپۋبليكالىق ماڭىزى بار قالالاردان بىر-بىردەن سايلاناتىن 17 سەناتوردى ءتاڭداۋشىلار-ماسليحات دەپۋتاتتارى سايلايتىنىن اتاپ ءوتتى. ؛بۇل جونىندە ول facebook-تەگى پاراقشاسىنا جازدى.

جازبادا جوعارعى پالاتا قۇرامىنىڭ ءبىر بولىگى ءۇش جىل سايىن جاڭارتىلىپ وتىراتىنى, سەناتتا قوعامنىڭ ۇلتتىق-مادەني جانە وزگە دە ەلەۋلى مۇددەلەرىنىڭ ءبىلدىرىلۋىن قامتاماسىز ەتۋ قاجەتتىلىگى ەسكەرىلىپ, پالاتانىڭ 15 دەپۋتاتىن مەملەكەت باسشىسى تاعايىندايتىنى جازىلعان.

"زاڭ شىعارۋشى بيلىك جۇيەسىنە سايكەس سەنات ەلىمىزدىڭ بارلىق ءوڭىرىنىڭ پارلامەنتتەگى وكىلدىگىن, ءماجىلىس قۇرامى جاڭارعان كەزدە زاڭنامالىق ساياساتتىڭ ساباقتاستىعىن جانە زاڭ جوبالارىنىڭ ساپالى قارالۋىن قامتاماسىز ەتەدى. ءماجىلىس دەپۋتاتتارىنىڭ پارتيالىق تىزىمدەر بويىنشا جانە قازاقستان حالقى اسسامبلەياسىنان سايلاناتىنىڭ ەسكەرسەك, سەناتتا وڭىرلەر مۇددەلەرىنىڭ ءبىلدىرىلۋى اسا ماڭىزدى" دەدى ماۋلەن اشىمباەۆ.

سەنات ءتوراعاسى زاڭ شىعارۋشى بيلىكتى ۇيىمداستىرۋدىڭ قازىرگى جۇيەسى قابىلدانعان زاڭداردى ساپالى پىسىقتاۋدى قامتاماسىز ەتەتىنىن تىلگە تيەك ەتكەن.

"قارالاتىن ماسەلە جان-جاقتى ءارى تەرەڭ زەرتتەلىپ, زاڭ قابىلداۋ جۇمىستارى كەزەڭ-كەزەڭمەن جانە قيسىندى جۇرگىزىلۋگە ءتيىس. اتالعان جۇمىستىڭ ساپاسى مەملەكەتتىك ورگانداردىڭ نورمالارىنا, ياعني, تۇتاس ەلدىڭ تىنىس-تىرشىلىگىنە ىقپال ەتەدى. ءار قابىلدانعان زاڭنىڭ ونداعان مىڭ وتباسى مەن ناقتى ادامداردىڭ تىنىس-تىرشىلىگىنە تىكەلەي اسەرى بار. وسى رەتتە پارلامەنت پالاتالارىنىڭ جۇمىسى زاڭ شىعارۋ ۇدەرىسىنىڭ بارىنشا ءتيىمدى ءارى تەڭگەرىمدى بولۋىنا مۇمكىندىك بەرەدى جانە زاڭداردى ەلدىڭ, سونداي-اق ءار ازاماتتىڭ مۇددەسىن ەسكەرىپ قابىلداۋدى قامتاماسىز ەتەدى" دەلىنگەن جازبادا.

ودان بولەك, جازبادا قابىلداناتىن زاڭدار قازاقستان پرەزيدەنتىنىڭ باستامالارىن زاڭنامالىق تۇرعىدان قامتاماسىز ەتۋگە ءتيىس ەكەنى دە ايتىلعان.

"دامۋدىڭ جاڭا كەزەڭىندە مەملەكەت باسشىسى ۇسىنعان حالىقتىڭ تۇرمىس ساپاسىن ارتتىرۋعا جانە ينكليۋزيۆتى ەكونوميكالىق وسۋگە ارنالعان جاڭعىرتۋ باعدارىن زاڭنامالىق تۇرعىدان قامتاماسىز ەتۋدىڭ ماڭىزى زور. بۇل رەتتە دەپۋتاتتاردىڭ ءرولى ەرەكشە. كوروناۆيرۋس پاندەمياسىمەن جانە ونىڭ سالدارىمەن كۇرەسۋ ءۇشىن قۇقىقتىق بازانى جەتىلدىرۋ دە ماڭىزدى مىندەتتەردىڭ ءبىرى بولىپ قالا بەرەدى. بۇگىن سايلانعان سەناتورلار ءتيىستى وكىلەتتىكتەرىن العان ساتتەن باستاپ اتالعان ستراتەگيالىق مىندەتتەردى ورىنداۋعا ءوز ۇلەستەرىن قوسىپ, بەلسەندى جۇمىس ىستەيدى دەپ سەنەمىن" دەدى سەنات ءتوراعاسى.

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

باننەر

پىكىر قالدىرۋ

پىكىر