فوتوكوللاج
سوڭى مىڭداعان ازاماتتىڭ نارازىلىعىنا ۇلاسقان بەلورۋستەگى پرەزيدەنت سايلاۋى قورىتىندىسىن گەرمانيا, ۇلىبريتانيا جانە اقش سەكىلدى كەيبىر باتىس ەلدەرى سىناپ جاتىر. ال ءبىرقاتار ەلدىڭ باسشىلارى الەكساندر لۋكاشەنكونى التىنشى مەرزىمگە سايلانۋىمەن قۇتتىقتاپ ۇلگەردى. سولاردىڭ قاتارىندا قازاقستان پرەزيدەنتى دە بار. "ەۋروپانىڭ سوڭعى ديكتاتورى" اتالىپ كەتكەن لۋكاشەنكونى ق.توقاەۆتىڭ العاشقىلاردىڭ ءبىرى بولىپ قۇتتىقتاعانى قوعامدا ءارتۇرلى قابىلداندى. ؛قامشى ءتىلشىسى ساياساتتانۋشىلاردان توقاەۆتىڭ قۇتتىقتاۋى تۋرالى نە ويلايتىنىن سۇراپ كوردى.
دوسىم ساتپاەۆ, ساياساتتانۋشى: پرەزيدەنت مەملەكەت اتىنان سويلەي العانىمەن, حالىق اتىنان سويلەگەنى دۇرىس ەمەس
لۋكاشەنكونى جەڭىسىمەن نەگىزىنەن ءبىرىنشى بولىپ اۆتوكراتيالىق ەلدەر قۇتتىقتادى. ەڭ العاش قىتاي باسشىسى سي سزينپين قوڭىراۋ شالدى. ارتىنشا, رەسەي, قازاقستان, ازەربايجان, وزبەكستان سەكىلدى قاتاڭ ساياسي باقىلاۋدى ۇستاناتىن, وپپوزيسياعا قىسىم كورسەتەتىن ەلدەر قوسىلدى. البەتتە, بەلگىلى ءبىر ديپلوماتيالىق ەتيكەت دەگەن دە بار. ءبىراق ءوزىن ليبەراليزاسيانىڭ جاقتاسى, دەموكراتيالىق رەفورمانى جاساۋشى رەتىندە كورسەتىپ جۇرگەن توقاەۆتىڭ لۋكاشەنكونى العاشقىلاردىڭ ءبىرى بولىپ قۇتتىقتاعانى اسىعىستىق بولدى.
مەن لۋكاشەنكو جەڭىستى ۇرلاپ الدى دەپ ەسەپتەيمىن. توقاەۆ لۋكاشەنكو بەلورۋس حالقى ءۇشىن لەگيتيمدى پرەزيدەنت بولماسا دا, زاڭدى پرەزيدەنت اتانعاندا عانا قۇتتىقتاعانى ءجون بولار ەدى. سونداي-اق توقاەۆ ءوز اتىنان عانا ەمەس, بۇكىل قازاقستاندىقتاردىڭ اتىنان قۇتتىقتاۋى كوپتەگەن كەلەڭسىز سۇراق تۋدىرادى. ويتكەنى قازاقستاندىقتاردىڭ بارلىعى بىردەي لۋكاشەنكونى جەڭىسىمەن قۇتتىقتاعىسى كەلمەۋى مۇمكىن. مەن ءتىپتى وندايلار وتە كوپ دەر ەدىم. بىلتىر توقاەۆتا دا لەگيتيمدىلىك جاعىنان كوپ قيىندىق بولعانىن ۇمىتپاعان ءجون. ونى پرەزيدەنتى رەتىندە سانامايتىن ازاماتتار دا بولۋى مۇمكىن. سوندىقتان قۇتتىقتاۋ فورماسىنىڭ ءوزى دۇرىس قۇرىلماعان. پرەزيدەنت مەملەكەت اتىنان سويلەي العانىمەن, حالىق اتىنان سويلەگەنى دۇرىس ەمەس. قازىرگى تاڭدا بەلورۋستەگى وقيعا قازاقستانداعى بىلتىرعى سايلاۋدى ەسكە ءتۇسىرىپ تۇر. ازاماتتار داۋىستى ۇرلاۋدى, بەلگىلى ءبىر ساياساتكەرگە قولدان داۋىس جيناپ بەرۋدى ءون بويىنان وتكىزگەندىكتەن, ساياسي ادىلەتسىزدىكتى جاقسى تۇسىنەدى. وسى جاعىنان العاندا قۇتتىقتاۋ مازمۇنىندا دا قاتە جىبەرىلگەن.
مۇحتار سەڭگىرباي, ساياساتتانۋشى: قازاقستان بەلارۋستاعى سايلاۋدى سىنعا السا, ناعىز نونسەنس سول بولار ەدى.
دەموكراتيالىق سايلاۋدىڭ الەمدە ەكى ءتۇرلى ستاندارتى قالىپتاستى. جالپى سايلاۋالدى ناۋقان, كانديداتتاردى تىركەۋ, ولارعا تەڭ مۇمكىندىك بەرۋ, سايلاۋ كوميسسياسىنىڭ قۇرامى, داۋىستاردىڭ سانالۋى پروسەستەرى دەموكراتيالىق سايلاۋدىڭ اسا ماڭىزدى كومپونەنتى سانالادى, مۇنىمەن ەقىۇ-عا مۇشە ەلدەر, سونىڭ ىشىندە قازاقستان دا, بەلارۋس تا كەلىسكەن. ءبىراق ءىس جۇزىندە بەلارۋس تا, قازاقستان دا بۇل ستاندارتتاردى ساقتاماي وتىر. سوندىقتان, بىزدەگى سايلاۋلاردى باتىس ەلدەرى ءجيى سىنايدى. دەگەنمەن بۇل بيلىكتىڭ لەگيتيميدىگىن مويىنداماي قويۋعا نەگىز بولا المايدى. سايىپ كەلگەندە, ءادىل دە اشىق سايلاۋ وتكىزۋ ءار ەلدىڭ ءوز ىشكى ماسەلەسى بولىپ قالادى. ەكى ەلدەگى ساياسي ەركىندىك شامالاس بولعاندىقتان, توقاەۆتىڭ لۋكاشەنكونى قۇتتىقتاۋى &ndash؛ قيسىنعا ساي قۇبىلىس. قازاقستاندا بىلتىر وتكەن پرەزيدەنت سايلاۋىنا دا حالىقارالىق قوعامداستىقتىڭ ايتار سىنى كوپ بولدى. قازاقستان بەلارۋستاعى سايلاۋدى سىنعا السا, ناعىز نونسەنس سول بولار ەدى.
قازبەك مايگەلدينوۆ, ساياساتتانۋشى: قازاقستان پرەزيدەنتىنىڭ الەكساندر لۋكاشەنكونى قۇتتىقتاعانىندا تۇرعان ەشتەڭە جوق
الەكساندر لۋكاشەنكونى پرەزيدەنت سايلاۋىنداعى جەڭىسىمەن قۇتتىقتاعان پرەزيدەنتتەر تىزىمىنە قاراساق, بەلورۋسپەن ورتاق ينتەگراسيالىق ۇيىمدارعا مۇشە بولىپ وتىرعان مەملەكەتتەردىڭ باسشىلارىن كورەمىز. ماسەلەن, تمد, ەاەو, ۇجىمدىق قاۋىپسىزدىك كەلىسىم-شارت اياسىنداعى بارلىق مەملەكەتتەر قۇتتىقتاعان. سول قاتاردا ساۋدا-ەكونوميكالىق قارىم-قاتىناسى دامىعان, ءتۇرلى سالالارداعى ارىپتەستىگى جاقسى جولعا قويىلعان, دوستىققا قۇرىلعان بايلانىستارى تىعىز قازاقستان پرەزيدەنتىنىڭ سايلاۋ ناتيجەسى بويىنشا الەكساندر لۋكاشەنكونى قۇتتىقتاعانىندا تۇرعان ەشتەڭە جوق. بۇنى ارىپتەس مەملەكەتتەردىڭ بىر-بىرىنە كورسەتكەن قولداۋىنىڭ ءبىر ءتۇرى دەپ قاراستىرۋعا بولادى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر