كورنەكى سۋرەت
"ەسىرتكى كونترابانداسىمەن اينالىسقان, ترانسۇلتتىق ۇيىمداسقان توپ قۇردى جانە ونى باسقاردى" دەپ ايىپتالعان ازامات رەسەيدەن قازاقستانعا قايتارىلدى. بۇل تۋرالى رەسەي فەدەراسياسىنىڭ باس پروكۋراتۋراسى مالىمدەدى.
"رەسەي فەدەراسياسىنىڭ باس پروكۋراتۋراسى شەتەلدىك ارىپتەستەرىنىڭ سۇراۋى بويىنشا قازاقستان ازاماتى ستاس ءلاريندى قىلمىستىق قۋدالاۋ ءۇشىن ۇستاپ بەرۋ تۋرالى شەشىم قابىلدادى. ول قازاقستان رەسپۋبليكاسى قىلمىستىق كودەكسىنىڭ 264-بابىنىڭ 1-بولىگىندە (ترانسۇلتتىق ۇيىمداسقان توپ قۇرۋ جانە وعان باسشىلىق ەتۋ), 286-بابىنىڭ 4-بولىگىندە (ەسىرتكى قۇرالدارى مەن پسيحوتروپتىق زاتتاردىڭ كونترابانداسى), 297-بابىنىڭ 4-بولىگىندە (ەسىرتكى قۇرالدارى مەن پسيحوتروپتىق زاتتاردى وتكىزۋ ماقساتىندا زاڭسىز ساقتاۋ, تاسىمالداۋ, جونەلتۋ جانە وتكىزۋ) جانە 385-بابىنىڭ 2-بولىگىندە (جالعان قۇجاتتى قولدان جاساۋ جانە وتكىزۋ) كوزدەلگەن قىلمىستاردى جاسادى دەپ ايىپتالۋدا" دەلىنگەن باس پروكۋراتۋرانىڭ رەسمي سايتىنداعى حابارلامادا.
سونداي-اق ؛ س.لارين 2016 جىلى ەسىرتكى قۇرالدارى مەن پسيحوتروپتىق زاتتاردى پايداكۇنەمدىك ماقساتپەن اۋىر جانە ەرەكشە اۋىر قىلمىستار جاساۋ ءۇشىن تۇراقتى قۇرىلىمدالعان ترانسۇلتتىق ۇيىمداسقان توپ قۇرىپ, ونى باسقارعانى بەلگىلى بولدى.
2016 جىلدىڭ ماۋسىمى مەن 2017 جىلدىڭ قازان ايى ارالىعىندا ول ەسىرتكى قۇرالدارى مەن پسيحوتروپتىق زاتتاردى زاڭسىز وتكىزۋدىڭ ارناسىن ۇيىمداستىرگەن. زاتتاردى بىرنەشە رەت قازاقستان كەدەندىك شەكاراسى ارقىلى ەل اۋماعىندا ودان ءارى زاڭسىز ساتۋ ءۇشىن ترانسۇلتتىق ۇيىمداسقان توپ مۇشەلەرىنە جىبەرگەن.
لارين جىبەرگەن ەسىرتكى جانە پسيحوتروپتىق زاتتار الماتى قالاسىنىڭ اۋەجايىنداعى حالىقارالىق پوشتا وڭدەۋ بولىمىنە كەلىپ, "قازپوشتا" مەن بولىمشەلەرىنە جىبەرىلگەن.
سونداي-اق ول رەسەي فەدەراسياسىندا جۇرگەندە ەسىرتكى قۇرالدارى مەن پسيحوتروپتىق زاتتاردى زاڭسىز ساتۋدى ۇيىمداستىرۋ ءۇشىن ينتەرنەت-دۇكەن قۇرعان.
لارين 2019 جىلدىڭ جەلتوقسانىندا نوۆوسيبيرسك وبلىسىنىڭ اۋماعىندا ۇستالدى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر