10 تامىز, 2020 بارلىق ايماقتار
فوتو: parlam.kz
ماجىلىس ءتوراعاسى نۇرلان نىعماتۋلين بارشا قازاقستاندىقتاردى تۇڭعىش رەت اتالاتىن اباي كۇنى مەرەكەسىمەن قۇتتىقتادى. بۇل تۋرالى ول ءوزىنىڭ تۆيتتەر پاراقشاسىندا جاريالادى.
"بارشا قازاقستاندىقتاردى بيىل تۇڭعىش رەت اتالاتىن اباي كۇنىمەن قۇتتىقتايمىن! اباي مۇراسى-ەلىمىزدى, حالقىمىزدى ءارقاشاندا جاڭاشىلدىققا,ادىلدىككە, عىلىم-بىلىمگە, وركەنيەتكە جەتەلەيتىن باعا جەتپەس قۇندىلىق. ەلىم, جەرىم دەيتىن ءاربىر ازامات ءۇشىن ۇلى اقىننىڭ وسيەتىن ءبىلۋ قاسيەتتى پارىز" دەلىنگەن ءماجىلىس ءتوراعاسىنىڭ جازباسىندا.
ودان ءارى ءماجىلىس ءتوراعاسى ءدال بۇگىن ۇلى اقىن, دانىشپان ويشىل, ۇلتىن ۇلىلىققا ۇندەگەن دارا تۇلعا اباي قۇنانبايۇلىنىڭ تۋعانىنا 175 جىل تولعانىن العا تارتا كەلىپ, اباي كۇنى مەرەكەسىنىڭ ماڭىزدىلىعىنا توقتالدى.
وسى ورايدا, نۇرلان نىعماتۋلين ەل باسشىلىعى ءارقاشاندا اباي مۇراسى ارقىلى ەلىمىزدىڭ رۋحاني باعىتىن دامىتۋعا زور كوڭىل ءبولىپ كەلە جاتقانىن اتاپ ءوتتى. وعان ەلباسى نۇرسۇلتان ءابىشۇلى نازارباەۆتىڭ ابايدى قازاقتىڭ بويتۇمارى رەتىندە, ال, مەملەكەت باسشىسى قاسىم-جومارت كەمەلۇلى توقاەۆتىڭ ابايدى رۋحاني رەفورماتور رەتىندە دارىپتەپ, قازاقستان قوعامىن اباي ۇستانىمىنا ساي دامىتۋ قاجەتتىگى تۋرالى باستاماسى دالەل دەۋگە بولادى.
ماجىلىس سپيكەرىنىڭ پىكىرىنشە, قازاق حالقىنىڭ سان عاسىرلىق دانالىعىنىڭ كورىنىسى سانالاتىن ۇلى اقىننىڭ باي مۇراسى ەلىمىزدىڭ رۋحاني دامۋىنىڭ نەگىزى.
ماجىلىس ءتوراعاسى اتاپ وتكەندەي, ادامزاتتىڭ ابايى اتانعان ۇلى كەمەڭگەردىڭ اسىل سوزدەرى بۇكىل الەمگە ورتاق قۇندى قازىنا. ال, تۋعان حالقى ءۇشىن اباي وسيەتى ادامگەرشىلىك اسىل قاسيەتتەردى بيىك ۇستاي وتىرىپ, العا جەتەلەۋشى رۋحاني زور كۇش. سونىمەن بىرگە, بارشا قازاقستاندىقتاردى ورتاق ماقساتقا بىرىكتىرە وتىرىپ, وركەنيەت بيىگىنە جەتەلەيتىن جارىق جۇلدىز ەكەنى ءسوزسىز.
ماجىلىستىڭ ءباسپاسوز قىزمەتى
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر