فوتو: qamshy.kz
بۇگىن جۋرناليست ميربولات بيشۋينوۆتىڭ اپپەلياسيالىق سوتى ءوتتى. ول قىتايدىڭ الماتىداعى كونسۋلدىعى الدىندا پيكەتكە شىعىققانى ءۇشىن 3 تامىزدا "بەيبىت جينالىستاردى ۇيىمداستىرۋ جانە وتكىزۋ ءتارتىبى تۋرالى زاڭنامادا بەلگىلەنگەن ءتارتىپتى بۇزدى" دەپ ايىپتالىپ, 15 كۇنگە قاماۋعا الىنعان. ؛
ميربولات بيشۋينوۆ اكسيانى قىتايدىڭ قازاقستانداعى ەلشىسى چجان سياونىڭ "قازاقستان مەن قىتاي اسكەرى ايماقتاعى ءتۇرلى-تۇستى رەۆوليۋسياعا قارسى بىرگە كۇرەسەدى" دەگەن مالىمدەمەسىنە نارازىلىق رەتىندە جاساعان.
جۋرناليست جاقتاستارى الماتى قالاسى مەدەۋ اۋداندىق سوتى شىعارعان شەشىممەن كەلىسپەي, قالالىق سوتقا شاعىمدانعان.
كەلۋشىلەر كارانتينگە بايلانىستى سوت شەشىمىن سىرتتا توسىپ تۇردى.
اپپەلياسيالىق سوتقا بيشۋينوۆتىڭ ادۆوكاتى قاتىسپادى. جۋرناليست جاقىندارىنىڭ سوزىنشە, ادام قۇقىقتارى جونىندەگى قازاقستاندىق بيۋرو تاراپىنان تاعايىندالعان زاڭگەر سوت بولاتىن كۇنى تەلەفون تۇتقاسىن كوتەرمەگەن.
بەلسەندىنىڭ تانىستارى ادۆوكاتى جوقتىعىنان سوت شەشىمىنىڭ قانداي بولعانىن بىردەن بىلە المادى.
سۋديا حاتشىسى شەشىم تۋرالى اقپارات تاۋلىك ىشىندە بەرىلەتىنىن ايتقان.
ارتىنشا الماتى قالالىق سوتىنىڭ ءباسپاسوز حاتشىسى اباي جارىلقاسىن قامشى تىلشىسىنە ميربولات بيشۋينوۆتىڭ ارىزى جارتىلاي قاناعاتتاندىرىلىپ, 15 تاۋلىككە قاماۋعا الۋ مەرزىمى 4 تاۋلىككە دەيىن قىسقارتىلعانىن حابارلادى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر