qamshy.kz
ازامات ورازبەك بالا كۇنىندە قۋاتى جوعارى ترانسفورماتور توعىنا ءتۇسىپ, قوس قولىنان ايىرىلعان. سول قولى يىعىنان باستاپ جوق بولسا, وڭ قولىنىڭ شىنتاقتان جوعارى تۇسى عانا بار. ازامات سوندا دا تاعدىرىنا نالىپ كورمەگەن. مۇمكىندىگىنىڭ شەكتەۋلى ەكەنىنە قاراماستان, ۇستەل تەننيسىمەن, جۇزۋمەن كاسىبي تۇردە اينالىسادى. اتالعان سپورت تۇرلەرى بويىنشا قازاقستان چەمپيونى اتانعان. سوڭعى ۋاقىتتا ءان جازىپ, ونەردەن ءوز ەنشىسىن الۋعا تالاپتانىپ ءجۇر. بۇگىندە رەپەرتۋارىندا بىرنەشە تۋىندى بار. ۇيلەنگەن, 3 بالا تاربيەلەپ وتىر. قامشى ءتىلشىسى ازامات ورازبەكتىڭ ءقازىر نەمەن اينالىسىپ جۇرگەنىن, جوسپارلارى مەن ارمان-تىلەگى تۋرالى سۇراپ كوردى.
ازامات جاتتىقتىرۋشىلار كەڭەسى بويىنشا سوڭعى ۋاقىتتا ۇستەل تەننيسىنەن وتەتىن جارىستارعا ءجيى شىعا بەرمەيدى.
&ndash؛ جاتتىقتىرۋشىلار ءبىر شەشىمگە كەلىپ, ۇستەل تەننيسىنەن مەنى رەزەرۆكە قويدى. ەندى بۇل سپورت تۇرىنەن قازاقستاننىڭ ىشىندە كوپتەگەن جارىستارعا قاتىسپايمىن. رەسپۋبليكالىق جارىستاردا الماتى قۇراماسىنا ۇپاي كەرەك بولسا عانا قاتىسامىن.
بۇل شەشىمدى قابىلداۋعا بىرنەشە سەبەپ بار. بىرىنشىدەن, ارتىمنان ەرىپ كەلە جاتقان جاستارعا جول بەرەيىن دەدىم. ەكىنشىدەن, قازاقستاندا ماعان قارسىلاس شاق كەلمەيدى. سوندىقتان ازياعا شىعامىن. الايدا ول جاقتان جەڭىسپەن ورالۋ ازىرگە بىزگە مۇمكىن بولماي تۇر. ويتكەنى ءقازىر ۇستەل تەننيسىنەن قىتاي, كورەيانىڭ سپورتشىلارىنا تەڭ كەلەر ەشكىم جوق. ازىرگە ءبىزدىڭ دارەجەمىز ولارعا جەتپەيدى. سول سەبەپتى بۇل سپورتپەن ۋاقىتشا قوشتاسۋعا تۋرا كەلدى, &ndash؛ دەيدى ول.
ازامات بىرنەشە جىل بويى جۇزۋمەن اينالىسا الماعانىن دا اتاپ ءوتتى.
&ndash؛ بىرنەشە جىل بويى كورۋ قابىلەتىم ناشارلاعاندىقتان, ۋاقىتشا جۇزۋدەن قول ۇزۋگە تۋرا كەلدى. بۇگىندە ءبارى وڭالىپ, قايتادان جۇزۋمەن شۇعىلدانىپ ءجۇرمىن. ەندى جاقسى ناتيجەگە جەتسەم دەيمىن. كەز كەلگەن سپورتشى سەكىلدى مەن دە پاراليمپيادا جەڭىمپازى بولعاندى ارماندايمىن. وليمپياداعا قاتىسۋ ءۇشىن ۇپاي جيناۋ قاجەت. تامىز ايىندا تايلاندقا كەتۋىم كەرەك ەدى. ءبىراق بۇكىل الەمدە بولىپ جاتقان پاندەمياعا بايلانىستى ەشقانداي جارىستارعا شىعا الماي وتىرمىز. كارانتينگە بايلانىستى جاتتىعۋلار دا توقتاپ تۇر. الداعى ۋاقىتتا جاتتىعۋ زالى اشىلىپ قالار, &ndash؛ دەدى سپورتشى.
ازامات سپورتتاعى كارەراسى ۋاقىتشا توقتاپ تۇرعانىمەن, بۇگىندە بوس جۇرگەن جوق. قايىرىمدىلىق شاراسىنا قاتىسىپ, ءوزىنىڭ انشىلىك قىرىن دامىتۋعا بارىن سالۋدا.
&ndash؛ "نۇر وتان" پارتياسىمەن بىرىگىپ, جاعدايى تومەن وتباسىلارعا كومەكتەسىپ ءجۇرمىن. سونداي-اق ونەردەگى تىڭدارماندارىمدى جاڭا اندەرمەن قۋانتسام دەيمىن. سول ءۇشىن تاڭەرتەڭنەن كەشكە دەيىن ستۋديادا ءان جازىپ ءجۇرمىن. ونەرگە, ءان ايتۋعا كىشكەنتاي كەزىمنەن قۇمارمىن. ءان شىرقاپ جۇرگەنىم تابىس تابۋ مەن كۇنكورىستىڭ قامى عانا ەمەس. مۇنىمەن ءوزىم جاقسى كورگەندىكتەن اينالىسىپ ءجۇرمىن. جالپى وزىمە قولىمنان كەلەتىن تىرلىكپەن اينالىسقان ۇنايدى. سونداي-اق جۋىردا جاقىن باۋىرلارىمىزبەن بىرىگىپ كيىم ساتاتىن دۇكەن اشتىق, &ndash؛ دەيدى ازامات.
كەيىپكەرىمىز الەمدە بولىپ جاتقان جاعداي تابىسىنا كەسىرىن تيگىزىپ جاتقانىن, ارتىق تابىس تابۋ مۇمكىندىگى جوق ەكەنىن ايتتى. "ايتەۋىر ەلدىڭ كورگەنىن ءبىز دە كورىپ جاتىرمىز. قۇدايدىڭ بەرگەنى دەپ ءجۇرمىز" دەگەن ول ءقازىر جالعىز وزىنە عانا ەمەس, كۇللى حالىققا وڭاي بولماي وتىرعانىن جەتكىزدى.
ازامات اناسى, ءىنىسى, قارىنداسى, جۇبايى جانە ءۇش بالاسى ءبارى جالدامالى پاتەردە تۇرادى. اناسى نەمەرەلەرىنە قاراپ ۇيدە وتىر. قارىنداسى بيىل ستۋدەنت اتانباق.
ازاماتتى تاعدىردىڭ توسىن سىيى دا, ءتۇرلى قيىندىق تا سىندىرا الماعان. ماقساتى &ndash؛ ايقىن, قولىنان ءبارى كەلەرىنە بەك سەنىمدى. ارمانى &ndash؛ وليمپيادا چەمپيونى بولۋ. ونەردە تىڭدارمان جۇرەگىنە جول تاپقىسى كەلەدى. ارمان-ماقساتىنا جەتۋ جولىندا تىنباي ەڭبەكتەنىپ ءجۇر.
&ndash؛ اللا قالاسا, ءبارى دە ءوز ۋاقىتىمەن بولادى دەگەن نيەتتەمىن, &ndash؛ دەيدى ءوزى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر