ساعىنتاەۆ: باستى مىندەت – قالالىقتاردىڭ دەنساۋلىعىن ساقتاۋ

الماتى اكىمى باقىتجان ساعىنتاەۆ سەلەكتورلىق كەڭەس بارىسىندا فارميندۋستريا وكىلدەرىمەن دارى-دارمەك پرەپاراتتارىن جانە مەديسينالىق زاتتاردى ءۇزىلىسسىز جەتكىزۋدى قامتاماسىز ەتۋ ماسەلەلەرىن تالقىلادى.

كەڭەستەگى باستى ماسەلە دارى-دارمەك نارىعىنىڭ تۇراقتىلىعىن قامتاماسىز ەتۋ بولدى. وندىرىستىك كومپانيالاردىڭ, ءدارىحانالار جەلىسىنىڭ جانە سالالىق قاۋىمداستىقتىڭ وكىلدەرى دارى-دارمەكتەردىڭ قورى جانە ولاردى ۋاقىتىلى جەتكىزۋدىڭ جوسپارلارى تۋرالى ايتتى. سونىمەن قاتار, ولار پروسەدۋرالاردى راسىمدەۋ جانە جۇكتەردى قابىلداۋ تۋرالى دا ءسوز ەتتى.

قالا اكىمى ءتيىستى قىزمەتتەرگە مەديسينالىق پرەپاراتتار مەن زاتتاردىڭ ەش كەدەرگىسىز ءوتۋىن قامتاماسىز ەتۋدى تاپسىردى. قاجەت بولسا سالىقتىق جانە كەدەندىك اكىمگەرلىك, سونىمەن قاتار شەتەلدىك تاۋار سەرتيفيكاتتارىن الۋ جەدەلدەتىلەدى.

بۇلاردان وزگە, كەڭەستە دارى-دارمەكتىڭ تۇراقتى قورىن قۇرۋ ماسەلەسى دە تالقىلاندى. ياعني, وتە قاجەت دارى-دارمەكتەردىڭ جارتىجىلدىق قورى جاسالادى, ەگەر ءدارى تاپشىلىعى ورىن السا, ولار بىردەن قالانىڭ ءدارىحانا جەلىسىنەن الىناتىن بولادى.

ب. ساعىنتاەۆ قازىرگى كەزدە قالا تۇرعىندارىنىڭ دەنساۋلىعىن ساقتاۋ ءبىرىنشى كەزەكتەگى ءارى باستى مىندەت ەكەنىن اتاپ ءوتتى. دەنساۋلىق ساقتاۋدىڭ قاجەتتىلىگىنە ءتيىستى قارجىنىڭ بارلىعى بولىنەتىن بولادى.

قالا اكىمى دارى-دارمەك نارىعىنا قاتىسۋشىلاردى دارى-دارمەكتىڭ جەتكىزىلۋى تۋرالى شۇعىل اقپارات بەرۋگە جانە دەر كەزىندە كومەك الۋعا شاقىردى. بارلىق ماسەلەلەر شۇعىل شەشىلەتىن بولادى.