اناڭىز شىنىندا باقىتتى ما؟

سىز, "انام شىنايى باقىتتى ما؟" &ndash؛ دەگەن سۇراق توڭىرەگىندە ءبىر ءسات ويلانىپ كوردىڭىز بە؟ مەنىڭ ويىمشا, كوپ ادام ول تۋرالى ويلانبايدى. ويتكەنى كەز كەلگەن اتا-انا ۇرپاعى الدىندا باقىتسىز بولىپ كورىنگىسى كەلمەيدى. "باقىتسىز كورىنسەم, بالالارىمنىڭ جۇرەگى جارالانادى" دەپ الاڭدايدى. ال بالالارى "انامدى باعىپ-قاعىپ وتىرمىن" دەپ ويلايدى.

ەسىڭىزدە مە, سوناۋ بالداۋرەن بالالىق شاعىڭىزدا الدەقالاي داستارحانعا كەلگەن ءتاتتى-دامدىنى اناڭىز ءسىزدىڭ اۋزىڭىزعا توسەيتىن. سوندا "اناشىم, ءوزىڭىز دە جەڭىزشى" دەپ ايتار بولساڭىز, "جەي عوي قۇلىنىم, مەن الگىندە جەپ, تويىپ العانمىن" دەپ "وتىرىك" ايتادى.

ەسەيگەن سوڭ دا قانشا جەردە "وتىرىكتى شىنداي, اقساقتى تىڭداي" ەتىپ, بىردى-بىرگە سوعىپ جۇرسەڭىز دە, اناڭىزدىڭ سول "وتىرىگىنە" ءالى سەنىپ كەلەسىز. ءبىر مىسال, اۋىرۋى جانىنا باتىپ وتىرعان اناڭىز "تۇك ەتپەيدى, از مىزعاپ السام ءتاۋىر بولىپ قالامىن, الاڭسىز جۇمىسىڭا جۇرە بەر" دەسە, الشاڭ باسىپ جۇمىسقا كەتە بەرەسىز.

ەندى ءبىر مىسال, ءسىز كەيدە "اناشىم, جازعى دەمالىستا, كەلىنىڭىز ەكەۋىمىز شەتەلگە ساياحاتتاپ بارساق دەگەن ويىمىز بار. نەمەرەلەرىڭىزگە 10 كۇن بويى ءوزىڭىز قاراي الاسىز با؟" دەپ سۇراساڭىز. اناڭىز ءاجىم باسقان جۇزىنە كۇلكى ءۇيىرىپ "الاڭسىز بارىپ كەلىڭدەر, قوشاقاندارىما ءوزىم ادەتتەگىدەي باس-كوز بولامىن" دەيدى. ءبىراق وسى ءسات ءسىز اناڭىزدىڭ اۋىلدان, قالا بەردى وبلىس ورتالىعىنان ارى اتتاپ شىعىپ كورمەگەن ادام ەكەنىن ەسكەرمەيمىز. ونىڭ دا ەل مەن جەردى كورگىسى كەلەتىن جۇمىرباستى پەندە ەكەنىن كاپەرىڭىزگە دە المايسىز.

مىنە, دوستار سىزدەر انالارىڭىزدى تەك, ءوزىڭىزدىڭ يگىلىگىڭىز ءۇشىن قۇداي تاعالا اۋەلدە اتاپ, سوعىپ قويعان قۇندى دۇنيەدەي عانا باعالايسىزدار.

ەسىڭىزدە بولسىن, انالارىڭىز ءومىر بويى ەكى ادامنىڭ ءرولىن ويناپ وتەدى. ءبىرىنشىسى ؛&ndash؛ جۇرەگى كەڭ انانىڭ, ەكىنشىسى &ndash؛ قاراپايىم ادامنىڭ ءرولى. سىزدەر ونىڭ الدىڭعى ءرولىن عانا كورەسىزدەر دە, ادام رەتىندەگى سوڭعى ءرولىن كورمەيسىزدەر, اشىعىن ايتقاندا, كورۋگە تىرىسپايسىزدار. ول سىزگە انا, وعان داۋ جوق. دەسە دە ول &ndash؛ ادام, ول &ndash؛ بىرەۋدىڭ قىزى, بىرەۋگە جار, بىرەۋگە اپكە-سىڭلى, ال ەندى بىرەۋدىڭ دوسى, ارىپتەسى, باسەكەلەسى, بىرەۋگە باستىق, بىرەۋگە قىزمەتكەر ت.ب. وسىلايشا كەتە بەرەدى. ونىڭ دا قالاۋى, ارمانى, تالعامى, جاقسى نەمەسە جەك كورەتىنى بار. الايدا وسىنى ەسكەرەتىن ۇل-قىزى بار ما؟ مۇلدە جوق ەمەس-اۋ, بار, ءبىراق ولاردىڭ سانى تىم از ەكەنىنە سەنەمىن.

دوستار, ءبىر عۇمىر تەك, ءسىزدىڭ باقىتىڭىز ءۇشىن وت پەن سۋعا تۇسەتىن, ءسىزدى باقىتتى ەتەمىن دەپ, ءوزىن "وتىرىك" باقىتتى كورسەتەتىن اناڭىز شىنىند دا باقىتتى ما؟ ءبىر ءسات ويلانىپ كورىڭىزشى. ايتپاقشى, اناڭىزدىڭ قاسىندا, باسىن بۇلت شالىپ, نايزاعاي ءتونىپ, جاڭبىر جۋسا دا, كۇن مەن جەل قاقتاپ كەمىرسە دە, قالپىن بۇزباي, دەمىن ىشىنەن الىپ تۇرا بەرەتىن اكەڭىزدىڭ دە بارىن ۇمىتپاڭىز.

قاستەر سارقىتقان
اباي ات.قازۇپۋ ۇستازى