• usd 409.19
  • eur 461.24
  • rub 5.67
  • cny 58.26

05 ماۋسىم, 2020 الەۋمەت

قازاق-دۇنگەن جانجالى بولعان ماسانچي اۋىلىنىڭ قازىرگى احۋالى قانداي؟ (ۆيدەو)

ماسانچي اۋىلى. 4 ماۋسىم, 2020 جىل qamshy.kz

جۋىردا ەلدەگى ءبىرقاتار باق-تا جامبىل وبلىسى قورداي اۋدانى ماسانچي اۋىلى تۇرعىندارىنىڭ ۇندەۋى جاريالانعان. ۇندەۋدە اقپان ايىندا ەتنيكالىق قازاقتار مەن دۇنگەندەر اراسىندا بولعان جانجالدان زارداپ شەككەن, شىعىنعا ۇشىراعان ؛ ماسانچي اۋىلىنىڭ تۇرعىندارى ؛ ورتەنگەن, قيراعان ۇيلەرىنىڭ قانشاما ۋاقىت وتسە دە قالپىنا كەلتىرىلمەي جاتقانىنا شاعىنعان. قامشى ءتىلشىسى ماسەلەنىڭ انىق-قانىعىن ءبىلۋ ماقساتىندا قوردايداعى ماسانچي اۋىلىنا بارىپ قايتتى.

كامەرادان قاشقان تۇرعىندار

جانجال كەزىندە ۇيلەرى ورتەنىپ, ءالى قالپىنا كەلتىرىلمەگەن بىرنەشە تۇرعىنمەن سويلەسۋگە تىرىسقان قامشى تىلشىسىنە تۇرعىندار ۇرەيلەنە قاراپ, باق-تا جاريالانعان ماسەلەلەرى تۋراسىندا اشىلىپ ەشتەڭە ايتپادى. ءتىپتى, كامەراعا سويلەۋدەن باس تارتتى. ولار بۇل ارەكەتىن "ساقتانۋ" دەپ ءتۇسىندىردى.

&ndash؛ سۇحبات بەرىپ, اكىمدەردىڭ كوزىنە ءتۇسىپ قالساق, وزىمىزگە كەسىرى ءتيىپ كەتە مە دەپ قورقامىز. ءبىر جاعىنان بيلىك ءبارىن قالپىنا كەلتىرىپ بەرەمىز ۋادە ەتتى. كەشىكتىرىپ جاتقانى راس. ءبىراق سوڭىنا دەيىن كۇتۋگە تۋرا كەلىپ تۇر. ازىرگە شۋلاتىپ قاجەت ەمەس, &ndash؛ دەيدى ولار.

fgh

تۇرعىنداردىڭ ايتۋىنشا, بيلىك ءبارىن قالپىنا كەلتىرۋگە ۋادە بەرگەن. ءبىراق بيلىك ۋادەسىنە كۇدىكپەن قارايتىندارى بار. ءوزىن يلحام دەپ تانىستىرعان  ؛ماسانچي اۋىلى ماڭگىلىك ەل كوشەسىنىڭ تۇرعىنى جانجالدان كەيىن ءتورت اي وتسە دە, قيراعان دۇكەنىنىڭ ءالى قالپىنا كەلتىرىلمەگەنىنە قاپالى.

&ndash؛ سول وقيعادان (قازاق-دۇنگەن جانجالى &ndash؛ رەد.) كەيىن بىرنەشە اي وتسە دە دۇكەنىم قالپىنا كەلتىرىلمەدى. بيلىك وكىلدەرى "قالپىنا كەلتىرىپ بەرەمىز" دەپ ۋادە ەتتى. قۇجاتتى وتكىزىپ قويدىق. ەندى شەشىمىن كۇتىپ وتىرمىز. شەشىم شىقسا, اقشا ءبولىنىپ قۇرىلىستى باستاۋعا بولار ەدى, ءبىراق كەشىگىپ جاتىر. ولاردىڭ (رەد. جەرگىلىكتى بيلىكتىڭ) ۋادەسىنە سەنگەنمىن. ءبىراق كوپ كەشىگىپ جاتقان سوڭ كۇدىك پايدا بولا باستادى. قول قۋسىرىپ وتىرمايىن دەپ, ءبىرازدان بەرى قيراندىلاردى تازالاپ باستاعامىن. بىتۋگە تاياۋ قالدى. ءبىراق قۇرىلىس باستاپ كەتۋگە قاراجات بولماي تۇر, &ndash؛ دەيدى ول.

يلحام تۇراتىن ماڭگىلىك ەل كوشەسى &ndash؛ اقپانداعى قاقتىعىس كەزىندە ەڭ كوپ زارداپ شەككەن كوشە. قامشى ءتىلشىسى وسى كوشەدە ورتەنگەن, قيراعان 10 نىساندى بايقادى. ولاردىڭ كوبى كوممەرسيالىق نىساندار.

"قازىر قازاقتارمەن ارامىز جاقسى"

ماسانچيداعى ەتنيكالىق دۇنگەندەر "اقپانداعى قاقتىعىستان كەيىن قازاقتارمەن ارامىز قايتا قالپىنا كەلدى" دەپ وتىر. ايتۋلارىنشا, ءتورت اي بۇرىنعى جانجالدان كەيىن اۋىل ۇلكەندەرى بىرنەشە مارتە جينالىس وتكىزىپتى.

&ndash؛ سول وقيعادان كەيىن بىرنەشە جينالىس ءوتتى. ءقازىر ءبارى دۇرىس. نەگىزى ءبىراز نارسەنى بۇلدىرگەن سىرتتان كەلگەندەر عوي. بۇل ارنايى ارانداتۋشىلاردىڭ ارەكەتى دەپ بىلەمىز. ءبارى تەرگەۋ بىتكەن سوڭ انىقتالادى, ؛&ndash؛ دەيدى ماسانچي تۇرعىنى.

قامشى ءتىلشىسى اۋىلدى ارالاپ, تۇرعىندارمەن تىلدەسكەن سوڭ اۋىل اكىمدىگىنە باردى. اكىمدىك عيماراتىنىڭ ماڭىندا سەنبىلىك ىستەپ جۇرگەن ونعا تارتا ادامنىڭ ءبىرى تىلشىدەن قانداي ماسەلەمەن كەلگەنىن سۇرادى. اۋىلداعى ۇيلەردى قالپىنا كەلتىرۋ نەگە كەشىگىپ جاتقانىن سۇراعان تىلشىگە ءاتى-جونىن حۋسەين بۋلاروۆ دەپ ايتقان اكىمدىك قىزمەتكەرى قىسقا عانا جاۋاپ بەردى.

&ndash؛ مەن اكىم ەمەسپىن. اكىمنىڭ ورنىندا ۋاقىتشا وتىرعان مامانمىن. ءقازىر بۇل اۋىلدا اكىم جوق. جاقىندا سايلاۋ بولادى. سول كەزدە جاڭا اكىم كەلەدى. ال ءسىزدىڭ سۇراعىڭىزعا جاۋاپ بەرە المايمىن. بارلىق سۇراقتى اۋدان اكىمدىگىندەگىلەرگە قويىڭىز. ۇيلەردى قالپىنا كەلتىرۋ ماسەلەسىمەن سولار اينالىسىپ جاتىر, &ndash؛ دەپ قىسقا قايىرىپ, تىلشىمەن سويلەسۋگە قۇلىقسىزدىق تانىتتى.

"بارلىق قۇرىلىس جوسپارلاعان مەرزىمدە اياقتالادى"

قامشى ءتىلشىسى اۋدان اكىمدىگىنە بارعاندا اكىم رۇستەم داۋلەت جۇمىس ورنىندا بولعان جوق. اكىمدىك قىزمەتكەرلەرىنىڭ ايتۋىنشا, باسشىلارى جۇمىس بابىمەن اۋدان سىرتىنا كەتىپتى. اۋەلدە ماسانچي ماسەلەسى بويىنشا اكىم ورنىنا ءتىلشى سۇراعىنا جاۋاپ بەرەتىن مامان تابىلا قويمادى. تەك 10-15 مينۋتتان كەيىن اۋدان اكىمىنىڭ ورىنباسارى ەرلان ورىنباەۆ قويىلعان سۇراقتارعا جاۋاپ بەردى, ءبىراق كامەراعا سويلەۋ ءۇشىن وبلىس اكىمى ءباسپاسوز قىزمەتىنىڭ رۇقساتى كەرەكتىگىن ايتتى.

cghn

&ndash؛ قۇرىلىس جۇمىستارى ؛ كەشىگىپ جاتقان جوق. ءبارى جوسپار بويىنشا ءجۇرىپ جاتىر. وسى ۋاقىتقا دەيىن تەرەزەسى سىنعان, ەسىگى جۇلىنعان, ياعني, بولار بولماس شىعىنعا ۇشىراعان 103 ءۇي تولىعىمەن جوندەلدى. ول ۇيلەردىڭ جوندەۋ جۇمىسىنا قاراجات ارنايى قۇرىلعان قوردان ءبولىندى. ەندى ءقازىر 65 نىسان قالىپ وتىر. بۇلار قاتتى زارداپ كەلگەن ۇيلەر. ءبىز ولاردىڭ ىشىنەن 11 نىساندى سىزىپ تاستادىق. ول 11 نىسان زاڭسىز سالىنعان قۇرىلىس بولىپ ەسەپتەلدى. ياعني, قۇجاتتارى دۇرىس ەمەس. قىزىل سىزىق بويىنا سالىنعاندار. مەملەكەت تاراپىنان ول نىساندارعا ەشقانداي قاراجات بولىنبەيدى. ال 54 نىسان قالپىنا كەلتىرىلەدى. ونىڭ ىشىندە 41 ءۇي, 13 كوممەرسيالىق نىسان. 30 ساۋىردەن باستاپ جوندەۋ جۇمىستارى باستالدى. الدىمەن 30 شىلدەگە دەيىن تۇرعىن ۇيلەردى جوندەپ بىتىرەمىز. ال كوممەرسيالىق نىسانداردىڭ قۇرىلىسى 1 قىركۇيەككە دەيىن اياقتالادى, ؛&ndash؛ ؛دەدى ورىنباەۆ.

اكىم ورىنباسارىنىڭ سوزىنشە, قاراجات «؛شيۆون»؛ دەپ اتالاتىن قوردان بولىنەدى. ول قورعا ماسانچيدەگى وقيعادان كەيىن كاسىپكەرلەر, جەكە ازاماتتار دەمەۋشىلىك جاساعان.

&ndash؛ قوردىڭ جۇمىسىن باقىلاۋعا اۋىل ازاماتتارى دا, بەلسەندىلەر دە تارتىلدى. قورعا تۇسكەن قارجىنى وزدەرى باقىلىپ وتىرسىن دەگەن نيەتتەن سولاي ىستەدىك, ؛&ndash؛ دەيدى ورىنباەۆ.

قامشى ءتىلشىسى اكىم ورىنباسارىنان "نىسىندار قۇجاتتىنىڭ دۇرىس-بۇرىستىعى نەگە ەندى انىقتالىپ وتىر؟ زاڭسىز سالىنسا, دەر كەزىندە نەگە شارا قولدانىلمادى؟" دەپ سۇرادى.

&ndash؛ ول نىسانداردىڭ قۇجاتى جانجال بولاردىڭ الدىندا تەكسەرىلگەن, نىسان قوجايىندارىنا ەسكەرتۋ جاسالعان, ءبىراق قۇجاتىن زاڭداستىرىپ ۇلگەرمەگەن. كوبىنە ءبىزدىڭ باقىلاۋىمىزدا كوممەرسيالىق نىساندار. ال ساراي, گاراج سياقتى عيماراتتاردى تۇرعىندار وزدەرى قۇجات وتكىزىپ, تىركەمەگەن سوڭ ءبىز زاڭسىز سالىنعانىن بىلمەي قالىپ جاتامىز, ؛&ndash؛ دەدى اۋدان اكىمىنىڭ ورىنباسارى.

cghj

بيىل اقپاننىڭ جەتىسىنەن سەگىزىنە قاراعان ءتۇنى قورداي اۋدانىنداعى ەتنيكالىق دۇنگەندەر مەن ەتنيكالىق قازاقتار تۇراتىن بىرنەشە اۋىلدا جانجال بولىپ, 11 ادام قازا تاپقان. رەسمي مالىمەت بويىنشا, ۇلتارالىق جانجالعا ەكى جارىم مىڭنان اسا ادام قاتىسقان, 140 تۇرعىن جانە 20 پوليسەي جارالانعان. 164 تۇرعىن ءۇي مەن ساۋدا ورنى قيراپ, 100 كولىك ورتەنگەن.

قازاقستان باس پروكۋراتۋراسىنىڭ مالىمەتىنشە, قوردايداعى قاقتىعىسقا بايلانىستى بارلىعى 120-دان استام قىلمىستىق ءىس قوزعالعان. ءقازىر 59 ادام قىلمىستىق جاۋاپقا تارتىلىپ جاتىر. كۇدىكتىلەر اراسىندا قازاقتار دا, دۇنگەندەر دە بار.

رەسمي مالىمەت بويىنشا, جانجال ۇلتى دۇنگەن بىرنەشە ازاماتتىڭ 78 جاستاعى ۇلتى قازاق قاريا تولەگەن قۇداشباەۆ پەن ونىڭ بالالارىن سوققىعا جىققان سوڭ باستالعان.  ؛

قوردايداعى جانجالدان سوڭ جامبىل وبلىسىنىڭ اكىمى اسقار مىرزاحمەتوۆ, وبلىستىق پوليسيا دەپارتامەنتىنىڭ باسشىسى ارمان ورازالين, قورداي اۋدانىنىڭ, ماسانچي اۋلىنىڭ سول كەزدەگى اكىمدەرى, اۋداندىق پوليسيا ءبولىمنىڭ باستىعى قىزمەتتەن كەتكەن.

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

باننەر

پىكىر قالدىرۋ

پىكىر