حالىققا قىزمەت كورسەتۋ ورتالىقتارى جاڭا جۇمىس تارتىبىنە كوشتى

كوروناۆيرۋس ينفەكسياسىنىڭ تارالۋىن بولدىرماۋ جانە وقشاۋلاۋ شارالارىن كۇشەيتۋ ماقساتىندا حالىققا قىزمەت كورسەتۋ ورتالىقتارى جاڭا جۇمىس تارتىبىنە كوشتى, دەپ حابارلايدى ازاماتتارعا ارنالعان ۇكىمەت مەملەكەتتىك كورپوراسياسىنىڭ ءباسپاسوز قىزمەتى.

قازاقستاندىقتارعا بۇگىنگى تاڭدا مەملەكەتتىك قىزمەتتەردىڭ 80%-ى ەلەكتروندىق ۇكىمەت پورتالى ارقىلى قولجەتىمدى, سونداي-اق قاجەتتى انىقتامالاردى egov mobile ءموبيلدى قوسىمشاسى جانە تەلەگرامداعى egovkzbot2.0 بوتى ارقىلى الۋعا بولادى.

حقو-نىڭ ەڭ تاجىريبەلى جانە ارنايى وقۋدان وتكەن 1800-دەن استام قىزمەتكەرى 1414 بايلانىس ورتالىعىنىڭ كەڭەس بەرۋشىلەرىمەن بىرگە ازاماتتارعا مەملەكەتتىك قىزمەتتەردى ونلاين تۇردە الۋ بويىنشا كومەك كورسەتەتىن بولادى.

بايلانىس ورتالىقتارى دۇيسەنبىدەن سەنبىگە دەيىن تاڭعى 9.00-دەن كەشكى 20.00-گە دەيىن جۇمىس ىستەيدى. قوڭىراۋ شالۋ تەگىن.

بۇل رەتتە, 21 ناۋرىزعا دەيىن ءوتىنىش بەرىپ ۇلگەرگەن ازاماتتار قىزمەتتەردىڭ دايىن ناتيجەسىن (اۆتوحقو قىزمەتتەرىمەن بىرگە) ءوزى ءوتىنىش بەرگەن حقو-نىڭ قۇجات بەرۋ سەكتورىنان الىپ كەتە الادى.

دايىن قۇجاتتاردى بەرۋ تەرەزەلەرىنىڭ جۇمىس ءتارتىبى: دۇيسەنبى-جۇما 9.00-دەن 17.00-گە دەيىن, سەنبى ساعات 9.00-دەن 14.00-گە دەيىن.