قايرات جولدىبايۇلى: ساحابالار "؛فالاق پەن ناس سۇرەلەرىن وقىساڭدار, ءسوزسىز جەڭىسكە جەتەسىڭدەر"؛ دەگەن جوق

اسىلىندە, دۇعا-تىلەك ەكى ءتۇرلى بولادى. ءبىرىنشىسى ىسپەن, قۇدايدىڭ مىنا دۇنيەدە قويعان زاڭدىلىقتارىن, سەبەپتەرىن ورىنداۋ ارقىلى جۇزەگە اسادى. مىسالى, كوكتەمدە جەر جىرتىپ, ەگىن ەگۋ, ءدارىسىن شاشىپ, تىڭايتقىشىن قۇيۋ دا ارەكەتپەن جاسالعان "جاراتۋشىم ماعان بەرەكەلى ەگىن بەر" دەگەن دۇعاعا جاتادى.
ال ەكىنشىسى جۇرەكپەن, تىلمەن جالبارىنۋ ارقىلى بولادى. سوندىقتان قازىرگى الەمدىك پاندەمياعا اينالعان كوروناۆيرۋسقا قارسى ەكى ءتۇرلى دۇعانى قاتار جاساۋىمىز كەرەك. سوزبەن جاسالعان دۇعا جەتكىلىكتى دەۋ ءدىندى, پايعامباردى دۇرىس تۇسىنبەۋ. اللا ەلشىسى (س.ا.ۋ.) نە نارسە بولسىن, الدىمەن اللانىڭ وسى دۇنيەدە قويعان زاڭدىلىقتارىن, سەبەپ-سالدارلارىن ورىندايتىن. مىسالعا ۋحىد سوعىسىن الايىق. ءماديناعا قالىڭ اسكەرمەن شابۋىل جاساعان قۇرايىشتىقتارعا قارسى مۇسىلمانداردى بارىنشا قارۋلاندىردى. ءوزى دە ساۋىتىن كيىپ, قولىن كوككە كوتەرىپ, ەگىلە جىلاپ ۇزاق دۇعا جاسادى. ساحابالارىنا "ساۋىتتارىڭدى شەشىپ, قارۋلارىڭدى تاستاپ, "فالاق" پەن "ناس" سۇرەلەرىن وقىساڭدار, ءسوزسىز جەڭىسكە جەتەسىڭدەر" دەگەن جوق. كەرىسىنشە ەكى ءتۇرلى دۇعانى دا كەمەلىنە جەتكىزىپ ورىندادى. حانداق سوعىسىندا دا دۇشپانداردان ءمادينا قالاسىنىڭ اينالاسىنا ور قازۋ ارقىلى قورعاندى.

ەندەشە, اۋەلى سەبەپتەردى قولىمىزدان كەلگەنشە بارىنشا ورىندايمىز. ءبىراق سەبەپتەردى قانداي جوعارعى دەڭگەيدە ورىنداساق تا, ونىڭ وزىندىك كەمشىلىگى بولاتىندىعى ءسوزسىز. سوندىقتان ءبىرىنشى دۇعامىزدى جۇرەكپەن, تىلمەن جاسالاتىن دۇعامىز ارقىلى تولىقتىرامىز. سونداي-اق, سەبەپتەردى قانشا ورىنداساق تا, سەبەپتەردىڭ ناتيجەسىن بەرەتىن اللا ەكەنىن ۇمىتپاۋىمىز قاجەت.
ولاي بولسا, بىرىنشىسىنە ءمان بەرمەگەننىڭ تىلمەن عانا ايتقان تىلەگى كوبىنەسە قابىل بولمايدى. بىرىنشىسىندەگى سالعىرتتىقتى ەكىنشىمەن جابۋعا تىرىسۋ جاۋاپكەرشىلىكتەن قاشۋ ءھام شىنايى تىلەكتىڭ ءقادىرىن كەتىرۋ سانالادى.
قانداي ءىس بولماسىن سەبەپتەردى رۋحانياتقا مۇلدەم سەنبەيتىن ماتەرياليستەر ءتارىزدى ورىنداۋ, ال تىلمەن, جۇرەكپەن جاسالاتىن دۇعانى سەبەپتەردىڭ ەش پايداسى جوقتاي جالبارىنا سۇراۋ شىنايى تاقۋالىقتىڭ شىڭى بولماق.