تۇركيا-رەسەي قاقتىعىسى ۇلكەن سوعىسقا ۇلاسۋى مۇمكىن

سيريانىڭ يدليب ايماعىندا بولعان اۋە سوققىسىنىڭ سالدارىنان تۇركيا قارۋلى كۇشتەرىنىڭ 33 جاۋىنگەرى قازا تاپتى. بۇل جايىندا تۇركيانىڭ حاتاي ايماعىنداعى ۇكىمەت وكىلدەرى مالىمدەدى, دەپ جازادى ؛dw.com.

وسىدان كەيىن تۇركيا رەسپۋبليكاسىنىڭ پرەزيدەنتى رەدجەپ تايىپ ەردوعان قاۋىپسىزدىك ماسەلەلەرى بويىنشا توتەنشە جينالىس وتكىزدى. ارتىنشا سيريا ارمياسىنىڭ پوزيسيالارى بويىنشا تۇركيا اسكەرى سوققى جاسادى.

daily sabah گازەتىنىڭ مالىمدەمەسى بويىنشا تۇركيا اسكەرى يدليب ايماعىنىڭ شىعىسىندا ورنالاسقان سيريا اسكەرىنىڭ قاراۋىل جاساعىن جويىپ جىبەرگەن. باسىلىمنىڭ مالىمەتى بويىنشا, م-5 حالىقارالىق اۆتوجولىنداعى اسكەر سوققىعا دۋشار بولدى. ادام قۇقىقتارى بويىنشا سيريالىق مونيتورينگ ورتالىعىنىڭ مالىمدەۋىنشە, تۇركيانىڭ قارۋلى كۇشتەرىنىڭ ۇشقىشسىز ۇشاتىن اپپاراتتارى مەن ارتيللەرياسى سيريا ارمياسىنىڭ ايماقتىڭ وڭتۇستىك جانە شىعىس جاقتارىن سوققىعا الىپ, جيىرماعا جۋىق سيريا اسكەرىنىڭ كوزىن جويعان. تۇركيانىڭ رەسمي وكىلدەرىنىڭ مالىمدەمەسىندە يدليب ايماعىمەن شەكارالاس تۇركيانىڭ حاتاي ايماعىندا سيريا تاراپىنان جاسالعان اۋە سوققىلارىنان سوڭ 36 جاۋىنگەر جارالانعانى حابارلانعان.

شابۋىلدان سوڭ گرەكيا تۇركيامەن شەكاراسىنداعى باقىلاۋدى كۇشەيتە باستادى. بولگاريانىڭ رەسمي وكىلدەرى دە تۇركيامەن اراداعى شەكارانى قاتاڭ باقىلاۋعا الۋ ءۇشىن 1000-عا جۋىق اسكەرىن شەكاراعا جىبەرەتىنىن مالىمدەدى. ويتكەنى وسى شابۋىلدان سوڭ تۇركيا رەسپۋبليكاسىنىڭ رەسمي وكىلدەرى شابۋىلعا رەسەيدىڭ قارۋلى كۇشتەرىنىڭ ۇشاقتارىنىڭ دا قاتىسقانىن كەلتىرە وتىرىپ, بۇدان بىلاي سيريادان كەلەتىن بوسقىنداردى ەۋروپاعا اعىلۋىنا كەدەرگى بولمايتىنىن جەتكىزدى.

ال ەۋرو وداق ەلدەرىمەن تۇركيا رەسپۋبليكاسىنىڭ اراسىندا 300 شاقىرىمدىق شەكارا بار. ناتو-نىڭ باس حاتشىسى يەنس ستولتەنبەرگ تۇركيا قارۋلى كۇشتەرىنە قارسى جاسالعان بۇل شابۋىلدى ايىپتادى.

تۇركيانىڭ گرەكيا جانە بولگاريا رەسپۋبليكالارى اراسىنداعى شەكاراسىنا بوسقىندار اعىلىپ كەلۋدە. تۇركيادا ءقازىردىڭ وزىندە رەسمي مالىمەتتەر بويىنشا 3,6 ملن سيريالىق بوسقىن بار. تۇركيا حالقى دا بوسقىنداردان جالىققانىن جاسىرماۋدا. ايماقتاعى جاعداي بارىنشا شيەلەنىسۋدە. بۇل تۇركيا-سيريا قاقتىعىسى ەمەس, بۇل ەندى تۇركيا-رەسەي قاقتىعىسى سانالاتىنداي جاعدايعا جەتتى. ەۋرازيانىڭ ورتا شىعىس ايماعىندا الەمدىك الپاۋىت ەلدەردىڭ مۇددەلەرى قايتادان قاقتىعىسۋى ۇلكەن سوعىسقا اپارۋى عاجاپ ەمەس.