28 قاڭتار, 2020 news
اشىق دەرەككوزدەن
قىتايدىڭ ۋحان قالاسىندا وقيتىن قازاقستاننىڭ 98 ستۋدەنتىن الىپ كەلۋ جونىندە ارنايى كوميسسيا قۇرىلدى. ءقازىر ارنايى ۇشاقتىڭ قاي باعىتپەن باراتىنى, ستۋدەنتتەردى قىتايدىڭ قاي جەرىنەن الىپ كەتەتىنى جايلى قىتاي بيلىگىمەن كەلىسىلىپ جاتىر. بۇل تۋرالى بۇگىن نۇر-سۇلتان قالاسىندا ءباسپاسوز جيىنىن وتكىزگەن قازاقستان سىرتقى ىستەر ءمينيسترىنىڭ ءبىرىنشى ورىنباسارى شاحرات نۇرىشەۆ مالىمدەدى.
ونىڭ ايتۋىنشا, ۋحان قالاسىندا وقيتىن قازاقستاننىڭ 98 ستۋدەنتىمەن قازاقستاننىڭ قىتايداعى ەلشىلىگى تىعىز بايلانىستا. ؛
"قازىرگى ۋاقىتتا ۋحان قالاسىندا 98 قازاقستاندىق ستۋدەنت بار. قازاقستاننىڭ قىتايداعى ەلشىلىگى ارقىلى ولارمەن تىكەلەي بايلانىس ورناتىلعان. كۇندەلىكتى ولارمەن سويلەسىپ وتىر. ستۋدەنتتەردە قاجەتتى دۇنيەنىڭ بارلىعى بار. سەبەبى, ولار وقيتىن ۋنيۆەرسيتەتتەر مەديسينالىق قۇرالدار, بەتپەردەلەر سىندى بارلىق زاتتارمەن قامتاماسىز ەتىپ وتىر. ازىق-تۇلىگى, بارلىعى جەتكىلىكتى", - دەدى نۇرىشەۆ.
سوڭعى مالىمەت بويىنشا, كوروناۆيرۋس جۇقتىرعاندار سانى 4 مىڭنان اسىپ, ؛ ولگەندەر سانى 106 ادامعا جەتكەن. ۆيرۋس جۇقتىرعان ادامدار قىتايدان بولەك تاعى 11 ەلدە انىقتالعان. ولاردىڭ اراسىندا گەرمانيا, شري-لانكا,مالايزيا, وڭتۇستىك كورەيا, تايۆان, تايلاند, كانادا, نەپال, ۆەتنام, ساۋد ارابياسى, سينگاپۋر, جاپونيا, اقش, فرانسيا, اۆستراليا بار. قىتايدان تىس جەردە كورونوۆيرۋستان كوز جۇمعاندار جوق.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر