سىم قىتايدا تاراپ جاتقان بەلگىسىز ۆيرۋسقا قاتىستى مالىمدەمە جاسادى

قازاقستاننىڭ سىرتقى ىستەر مينيسترلىگى قىتايدا تارالعان كوروناۆيرۋسقا قاتىستى ءباسپاسوز جيىنىن وتكىزدى. جيىندا ۆەدومستوۆو وكىلدەرى قىتايعا بارۋدى جوسپارلاعان قازاقستاندىقتاردى ساق بولۋعا شاقىردى. ؛

مينيسترلىكتىڭ دەرەگىنشە, ؛ ؛قىتايدا پايدا بولعان كوروناۆيرۋستى جۇقتىرعانداردىڭ سانى 830-دان اسىپ, 25 ادام كوز جۇمعان. ؛

"قىتايدىڭ ۋحان قالاسىندا قوزدىرعىشى كوروناۆيرۋستىڭ جاڭا ءتۇرى بولىپ تابىلاتىن پنەۆمانيا اۋرۋىنىڭ كوپتەگەن جاعدايى تىركەلگەن. بۇگىنگى كۇنى جۇقتىرعانداردىڭ سانى 830-دان اسىپ, 25 ادام كوز جۇمدى. قازىرگى ۋاقىتتا قىتايدىڭ دەنساۋلىق ساقتاۋ ورگاندارى وسى ۆيرۋستىڭ پروۆينسيادان تىس جەرلەردە كەڭ تارالۋىن بولدىرماۋ جونىندە ءتيىستى شارالاردى قابىلداۋدا. ۋحان قالاسىندا جانە حۋۆەي پروۆينسياسىنىڭ باسقا دا جاقىن قالالارىندا كارانتين رەجىمى ەنگىزىلدى. كولىك قاتىناستارىنىڭ بارلىق تۇرلەرى توقتاتىلدى" دەدى سىرتقى ىستەر مينيسترلىگىنىڭ وكلى ايبەك سمادياروۆ.

ونىڭ ايتۋىنشا, سىرتقى ىستەر مينسترلىگى قىتايعا بارۋدى جوسپارلاپ وتىرعان قازاقستان ازاماتتارىنا ءتيىستى ساقتىق شارالارىن قابىلداۋدى جانە ەپيدەميولوگيالىق ءقاۋىپتى جويعانعا دەيىن جۇقتىرىپ الۋ ءقاۋپى جوعارى ۋحان قالاسى مەن حۋۆەي پروۆينسياسىنا بارۋدان ۋاقىتشا باس تارتۋدى ۇسىنادى. بۇعان قوسا, ادامدار كوپ جينالاتىن ورىندارعا بارۋدان اۋلاق بولۋ, جەرگىلىكتى بيلىكتىڭ تالاپتارىن قاتاڭ ساقتاۋ قاجەت. ال اۋرۋعا كۇدىك تۋعان جاعدايدا دەرەۋ مەديسينالىق مەكەمەگە بارىپ, قازاقستاننىڭ قىتايداعى ەلشىلىگىنە حابارلاسۋ كەرەك.

ۆەدومستۆو وكىلىنىڭ ايتۋىنشا, قازاقستاننىڭ دەنساۋلىق ساقتاۋ مينيسترلىگى سىم-مەن بىرلەسە وتىرىپ, قىتايداعى ەپيدەميولوگيالىق جاعدايدى مۇقيات قاداعالاۋدا.

- اۋرۋدىڭ ەلىمىزگە جەتىپ, تارالۋ ءقاۋپىن الدىن الۋ ماقساتىندا قازاقستاندا سانيتارلىق ەپيدەمياعا قارسى جانە پروفيلاكتيكالىق شارالار كەشەنى قارالىپ جاتىر. قازاقستانداعى اۋەجايلاردا سانيتارلىق كارانتيندىك باقىلاۋ جۇزەگە اسىرىلۋدا. بارلىق جولاۋشى تەپلوۆيزور سكانەرىنەن وتۋدە, بۇل قىتايدان كەلەتىن رەيستەرگە كۇشەيتىلدى, - سمادياروۆ.

قىتايدا تاراي باستاعان كوروناۆيرۋستار 1960 جىلداردان بەرى بەلگىلى. بەلگىلەرى ادەتتەگى تۇماۋعا ۇقسايدى: ادام جوتەلىپ, ەنتىگىپ, قالتىرايدى, تىنىس الۋى ناشارلايدى.

دۇنيەجۇزىلىك دەنساۋلىق ساقتاۋ ۇيىمى جاڭا ۆيرۋسقا بايلانىستى جاھاندىق توتەنشە جاعداي جاريالاۋ ماسەلەسىن ءالى تالقىلاپ جاتىر.

 ؛