"؛كولىگىن جۇرگىزبەي قويسا, حالىق اشىنباعاندا كىم اشىنادى, توقاەۆ مىرزا؟!"؛

قۇرمەتتى, قاسىم-جومارت كەمەلۇلى! بۇل كۇندەرى ارمەنيا, قىرعىزستان, رەسەي ەلدەرىنەن اۆتوكولىك اكەلگەن قازاقستان ازاماتتارى سەرگەلدەڭگە ءتۇسىپ, قينالىپ ءجۇر. "ارقادا قىس جاقسى بولسا, ارقارى اۋىپ نەسى بار؟!" دەمەكشى, ەگەر دە, ەلىمىزدە ساپالى, ءارى ارزان كولىك ساتىلاتىن بولسا, حالقىمىزدىڭ شەتەل اسىپ, كولىك تاسىپ نەسى بار؟!

سوڭعى مالىمەت بويىنشا, قازاقستانعا 175 مىڭ-200 مىڭ اراسىندا شەتەلدىك كولىك اكەلىنگەن. كوبى ارمەنيا ەلىنەن كەلگەن كولىكتەر. ورتاشا باعامەن, ءبىر كولىكتىڭ قۇنى 3 ميلليون تەڭگە بولسا, 200 مىڭ كولىكتىڭ قۇنى 600 ميلليارد تەڭگە ەكەن. قازاقستان ازاماتتارىنىڭ 600 ميلليارد تەڭگەسى كولىك شىعارمايتىن ارمەنيا سياقتى ەلدەرگە ءتۇسىپ, سول ەلدەردىڭ ەكونوميكاسىن كوتەرىپ, حالقىنىڭ جاعدايىن جاقسارتتى. ءبىزدىڭ ەلدە نەگە سولاي جاساماسقا, ءبارىمىز دە سول كەدەندىك وداقتىڭ مۇشەسى ەمەسپىز بە؟

ەلىمىزدەگى قۇراستىرلاتىن جاڭا كولىكتەر وتە قىمبات, حالىقتىڭ الۋعا مۇمكىندىگى جوق. سوندا حالىق نە ىستەۋ كەرەك؟ ؛قاراپايىم حالىقتىڭ كوبى ۇكىمەتكە قول جايماي, سول اكەلگەن كولىكتەرمەن تاكسي بولىپ, بالا-شاعاسىن اسىراپ ءجۇر.

حالىقتىڭ كولىگىن ارزان باعاعا زاڭداستىرىپ, قازاقستان رەسپۋبليكاسىنىڭ مەملەكەتتىك نومەرىن بەرۋگە نە كەدەرگى؟ زاڭ با؟ زاڭ حالىق ءۇشىن شىقپاي ما؟ حالىقتى قينايتىن زاڭنىڭ, ءوز حالقىمىزعا ءتيىمسىز كەدەندىك وداقتىڭ بىزگە نە كەرەگى, قانداي قاجەتى بار؟ حالىق ماڭداي تەرىن, تابان اقىسىن, توگىپ ءجۇرىپ قارجى جيناپ, جەتپەگەن جەرىنە بانكتەن نەسيە الدى. ادال ەڭبەگىمەن العان كولىگىن زاڭسىز دەپ جۇرگىزبەي قاماپ قويسا, حالىق اشىنباعاندا, كىم اشىنادى؟ حالىق كوشەگە شىقپاعاندا, كىم شىعادى؟ ەلىمىزگە 200 مىڭ كولىك كىردى, ءار ۇيدە 5 ادام بولسا, 200 مىڭ ۇيدە 1 ميلليون ادام تۇرادى.

سىزدەر كورشىنىڭ كوڭىلىنە قارايمىز دەپ, ءبىر ميلليون ادامنىڭ جەپ وتىرعان نانىن تارتىپ الىپ, ءوز حالقىمىزدى سەندەلتىپ قويماقسىزدار ما؟! حالىق اشىنباسا, قاڭتاردىڭ قاقاعان ايازىندا كوشەگە شىعىپ نەسى بار؟ كەيبىر شەنەۋنىكتەر: "بۇل جاعدايعا حالىقتىڭ ءوزى كىنالى" دەپ اقتالۋدا. ءبىزدىڭ ۇكىمەت ءبارىن ءبىلىپ, كورىپ وتىرىپ, شەتەلدەن اكەلىنگەن كولىكتىڭ سانى 10 مىڭعا, 20 مىڭعا جەتكەندە نەگە توقتاتپادى؟ نەگە, زاڭسىز دەپ سول كەزدە تىيىم سالمادى؟ سول كولىكتەرىن ءبىزدىڭ اكىمدەر دە, پوليسيا قىزمەتكەرلەرى دە اكەلدى ەمەس پە؟ حالىق سولاردى كوردى, سولارعا سەندى عوي.

قۇرمەتتى, قاسىم-جومارت كەمەلۇلى! ءسىز بانكتە نەسيەسى بار 500 مىڭ قاراپايىم حالىقتىڭ قارىزىن جاۋىپ, ەلدى ءبىر قۋانتىپ ەدىڭىز, ەندى ءوز حالقىڭىزدىڭ شەتەلدەن اكەلگەن كولىكتەرىن زاڭداستىرىپ, ولارعا قازاقستان رەسپۋبليكاسىنىڭ نومەرلەرىن بەرىپ, 1 ميلليون حالقىڭىزدى تاعى دا قۋانتىڭىز! ءبىز سىزگە سەنەمىز! اللا ءبىزدى سەنىمنەن, ءسىزدى ابىرويدان ايىرماعاي! تاۋەلسىزدىگىمىزدى ماڭگى, حالقىمىزدى باقىتتى بولعاي!