يران مەن اقش اراسىندا سوعىس باستالا ما؟ ساراپشى پىكىرى

يران &ndash؛ اقش تەكەتىرەسى ءالى دە كۇردەلى جاعدايدا. دەسە دە qamshy.kz اقپارات اگەنتتىگى تىلشىسىمەن سويلەسكەن شىعىستانۋشى, ءال-فارابي اتىنداعى قازۇۋ "يران-تۇران" زەرتتەۋ ورتالىعىنىڭ ديرەكتورى يسلام جەمەنەي تەكەتىرەس اشىق سوعىس جاعدايىنا ۇلاسىپ كەتۋى ەكىتالاي ەكەنىن ايتىپ, ونىڭ بىرنەشە سەبەبىن كەلتىردى.

امەريكانىڭ اسكەري الەۋەتى جوعارى بولعانىمەن, يراننىڭ حالىقتىق قۋاتى ۇلكەن كۇشكە يە

عالىمنىڭ ايتۋىنشا, وتارشىل كۇشتەرگە قارسىلىق كورسەتۋدە يران جۇدىرىقاي جۇمىلا الاتىن ەل.

&ndash؛ ماسەلەن, امەريكادا بىر-بىرىنە قارسى ەكى پارتيا اراسىندا كوزقاراس قايشىلىعى بار. تالاسىپ-تارتىسىپ جاتىر. بۇل بەلگىلى ءبىر دەڭگەيدە شەشىم قابىلداۋدا كەدەرگى كەلدىرەدى. اقش پرەزيدەنتىنىڭ يرانعا قاتىستى جاساپ وتىرعانىنا دەموكراتتار تۇبەگەيلى قارسى. امەريكا حالقى ىشىندە دە پرەزيدەنت ارەكەتىن قولدامايتىندار كوپ. ال يران حالقى كەرىسىنشە, وتارلىق كۇشتەرگە قارسى جۇدىرىقتاي جۇمىلا الادى. تاياۋ شىعىستاعى تابيعي بايلىقتى امەريكانىڭ ءوز مۇددەسى ءۇشىن پايدانالعىسى كەلەتىنى يراندى بۇرىننان شامداندىرىپ كەلە جاتقان ماسەلە. 3 مىڭ جىلدىق تاريحى بار يمپەريانىڭ ەشكىمنىڭ قولاستىندا بولعىسى كەلمەيتىنى تاعى تۇسىنىكتى. ولاردا سانالىق تۇرعىدا "ۇلىلارمەن تەڭ بولۋىمىز كەرەك" دەگەن تۇسىنىك قالىپتاسقان. سوندىقتان ەلىندەگى كەيبىر ىشكى تۇسىنبەستىكتەرگە قاراماستان, يراندىقتار سىرتقى, اسىرەسە باتىستىق وتارلىق ەلدەرگە ءبىر كىسىدەي قارسىلىق تانىتادى. بۇنى امەريكا وتە جاقسى تۇسىنەدى, &ndash؛ دەيدى يسلام جەمەنەي.

يران &ndash؛ تەك قانا يراندىقتاردان تۇرمايدى

شىعىستانۋشى امەريكا بيلىگى يران اينالاسىنداعى ءتۇرلى ساياسي توپتار مەن مۇددەلەس جاقتاستارىنىڭ كوپ ەكەنىن دە ءبىلىپ وتىر دەگەن پىكىردە.

&ndash؛ يران جالعىز ەمەس. الەمدە وعان باعىنىشتى قانشاما ساياسي توپتار بار. ولارعا ءاتۇستى قاراۋعا بولمايدى. سونداي-اق سانى 1 ملرد-تان استام مۇسىلمان ەلدەرىن قوسىڭىز. ولار جىلدار بويعى ادىلەتسىزدىكتەن, تەڭسىزدىكتەن, باتىس ەلدەرىنىڭ زۇلىمدىعىنان شارشادى. سەبەبى بۇكىل شيكىزات مۇسىلمان ەلدەرىندە, ال ونىڭ راحاتىن كورىپ وتىرعان وتارشىل ەلدەر. وسى نارسە مۇسىلماندار اراسىنداعى الاۋىزدىققا قاراماستان, ولاردىڭ باسىن بىرىكتىرۋگە مۇمكىندىك تۋعىزادى. بۇل توپقا افريكاداعى رەسۋرسقا باي, ءبىراق سول بايلىعىن امەريكا بيلەپ-توستەپ وتىرعان ەلدەر دە قوسىلىپ كەتۋى عاجاپ ەمەس, &ndash؛ دەيدى عالىم.

ترامپ &ndash؛ اقىلسىز ادام ەمەس

يران &ndash؛ اقش تەكەتىرەسىنىڭ سوعىسقا ۇلاسپايتىنىنىڭ تاعى ءبىر سەبەبىن عالىم امەريكانىڭ ءيزرايلدىڭ اماندىعىن ويلايتىنىمەن بايلانىستىرادى.

&ndash؛ ەگەر سوعىس جاعدايى بولىپ كەتەتىندەي بولسا, يران جانە وزگە دە اراب ەلدەرى يزرايلگە تىنىم بەرمەيدى. ءيزرايلدىڭ كۇنى كۇن بولمايدى. ال ترامپ &ndash؛ اقىلسىز ادام ەمەس. ونداي قادامعا بارۋ ارقىلى اراب الەمىندەگى جالعىز جاقتاسى &ndash؛ ءيزرايلدى قۇربان ەتە المايدى. يزرايلگە 1948 جىلدان بەرى پالەستينانىڭ 80 پايىز جەرىن الىپ بەردى. ولاردىڭ ەندىگى ارمانى &ndash؛ سيريا, يران, يراك جەرى مەن ءنىل اڭعارىن يزرايل قاناتىنىڭ استىنا وتكىزۋ. سول ارقىلى تاياۋ شىعىستاعى بار بايلىققا يە بولۋ, &ndash؛ دەيدى عالىم.

شىعىستانۋشىنىڭ پىكىرىنشە, اقش-تىڭ بۇل "پيعىلىن" تاماشا بىلەتىن يران كۇردەلى سوعىستى اشا الادى. ءارى وعان ءازىر تۇر. ال جوعارىدا ايتىلعان سەبەپتەردى ەسكەرسەك, اقش بيلىگى اشىق سوعىس جاريالاۋى نەعايبىل.