شاحانوۆتىڭ ولەڭىن ءماشھۇر جۇسىپكە ۇرلاپ بەرگەن كىم؟

قىزىق بولدى. قىزىق ەمەس, شىجىق بولدى. ءجا, باسىنان باستايىق. تەلەفونىمىز شىر ەتە قالدى. قوڭىراۋ استانادان سوعىلىپتى. ءوزىن زايىربەك مۇسابەكوۆپىن دەپ تانىستىرعان جىگىت اعاسى اماندىق-ساۋلىقتان سوڭ اڭگىمەسىن بىردەن: "تاياۋدا ءماشhۇر ءجۇسىپ كوپەەۆتىڭ 20 تومدىعىن ساتىپ العان ەدىم" دەپ باستادى. اڭگىمە اراسىندا: ء"وزىم مۇحتار شاحانوۆتىڭ جانكۇيەرىمىن, ءارى تالاي ولەڭدەرىن جاتقا بىلەمىن" دەپ تە قويدى. "سول جاتقا بىلگەنىمنىڭ ارقاسى عوي, الگى ماشەكەڭ كوپتومدىعىنىڭ 16-شى تومىن اشىپ قالسام, مۇحتار اعامىزدىڭ "جاڭعىرىق" اتتى پوەماسى كوزىمە وتتاي باسىلدى" دەدى. مەن ءوز تاراپىمنان: "سوندا مۇحاڭنىڭ پوەماسى ماشەكەڭنىڭ اتىنان جاريالانعان با؟" دەپ سۇرادىم. ول: ء"يا" دەپ جاۋاپ قاتتى. سودان كەيىن-اق ءمان-جايعا ودان ءارى قانىعا ءتۇستىم. تاپ سول كەزدە بولمەمە مۇحاڭنىڭ ءوزى دە باس سۇعا قالدى. ول كىسىگە جاعدايدى ەكى اۋىز سوزبەن ءتۇسىندىردىم دە, تەلەفوندى قولىنا ۇستاتا قويدىم. اڭگىمەگە قانىققان مۇحاڭ: "سوندا مەن ول پوەمانى ماشەكەڭنەن بايقاتپاي ۇرلاپ العان بولىپ شىعامىن با؟" دەدى. ارعى جاقتاعى داۋىس: "سولاي بولاتىن سياقتى" دەسە كەرەك. مۇحاڭ: "مەن بىرەۋدەن ءبىر جول ولەڭ ۇرلاعانشا اسىلىپ ولە سالمايمىن با؟!" دەدى دە تەلەفوندى قايتادان وزىمە ۇسىندى. مەن زايىربەككە: "الگى كىتاپتىڭ بىزگە قاتىستى جەرلەرىن سۋرەتكە ءتۇسىرىپ جىبەرىڭىز" دەدىم. ىلە زايىربەكتىڭ جىبەرگەن مالىمەتتەرى تەلەفونىما تۇسە باستادى.

20 تومدىق كىتاپ 2013 جىلى جارىققا شىققان ەكەن. كىتاپتى ماشەكەڭ ۇرپاقتارى قۇراستىرعان كورىنەدى. باس رەداكتورى - ەرلان ارىن. ول كىسى كىتاپقا پاۆلودار وبلىسىنا اكىم بولىپ تۇرعان كەزدە قولعابىس جاساسا كەرەك. رەداكسيانىڭ القا مۇشەلەرى دە وڭشەڭ ىعاي مەن سىعايلار. كىتاپتا م. شاحانوۆتىڭ "جاڭعىرىق" پوەماسى "جۇدەي حان مەن اقساق تەمىر" ولەڭى دەپ بەرىلىپتى. "ولەڭ اۋلەتتىك مۇراعاتتاعى ءاشىم قاراقىزۇلى كوشىرمەسىنەن الىندى" دەلىنگەن. ەندى اتالمىش ولەڭنىڭ ماشەكەڭدىكى ەكەندىگىنە كۇمان قالدىرماعان. ءتىپتى مۇحتار شاحانوۆ تۋرالى ءبىر اۋىز ءسوز جوق. ەڭ بولماسا: "شاحانوۆ تا وسى ىڭعايدا بىردەڭكە جازعان" دەسە, بولماسا: "ۇرلاپ العان" دەپ اشىق ايتسا ءبىز دە وسى ۋاقىتقا دەيىن ءبىر حابارىن بىلەر ەدىك قوي. ەگەر زايىربەك باۋىرىمىز قىراعىلىق تانىتپاعاندا بۇل ماسەلە وسىلايشا جابۋلى كۇيىندە قالا بەرەر مە ەدى, كىم ءبىلسىن؟! ءبىراق شىندىق ەرتەڭگى كۇنى ءبارىبىر اشىلادى عوي. سول كەزدە شاحانوۆتىڭ ۇرلىقشى بولىپ شىعا كەلۋى كۇمانسىز. سوندىقتان ءمان-جايدى انىقتاۋ ءۇشىن سوتقا جۇگىنۋگە تۋرا كەلەدى. ات شاپان ايىپتان بۇرىن جاۋاپتى ادامداردىڭ كەشىرىم سۇراعانى قىمبات. بارىنەن بۇرىن ادىلدىكتىڭ سالتانات قۇرعانى كەرەك.

ەسكە تۇسىرەيىك, م. شاحانوۆتىڭ "جاڭعىرىق" اتتى پوەماسىن كوپ جۇرت جاتقا بىلەدى. پوەماداعى وقيعا ءسان-سالتاناتى جاراسقان ءبىر حاننىڭ الدىن اياعى اۋىر ايەلدىڭ بايقاماي كەسىپ ءوتۋى ارقىلى ءوربيدى عوي. اشۋعا مىنگەن حان ول ايەلدى ىشىنەن تەۋىپ ولتىرەدى. الايدا جارىعى بار بالا ومىرگە كەلەدى. كەيىن تاريح دوڭعالاعى كەرى اينالادى. ىشتەن اقساق بولىپ تۋعان بالا 17 جىلدان سوڭ سول جەردە الگى حاننىڭ باسىن الادى. وسى وقيعا 20 تومدىقتا ماشەكەڭ اتىنان وزگەرىسسىز قايتالانادى. قىزىق! ەندى شىجىققا اينالىپ كەتپەي تۇرعاندا ماسەلەنى شەشۋ كەرەك. ەرلان ارىن مىرزانىڭ, جالپى 20 تومدىققا جاۋاپتى ادامداردىڭ سوتقا دەيىن ايتار ۋاجدەرى بولسا كەشىكپەگەندەرى ءجون.

قۇديار ءبىلالدىڭ فەيسبۋك پاراقشاسىنان الىندى