بيزنەس-ومبۋدسمەن ماڭعىستاۋلىق كاسىپكەرلەرمەن كەزدەستى

قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل بولات پالىمبەتوۆ ماڭعىستاۋ وبلىسىنا جۇمىس ساپارىمەن باردى.

بيزنەس-ومبۋدسمەن اقتاۋ قالاسىندا ءوڭىر اكىمى سەرىكباي ترۇموۆپەن كەزدەستى. كەزدەسۋ بارىسىندا وڭىردەگى كاسىپكەرلىكتى دامىتۋ ماسەلەلەرى تالقىلاندى.

اتقارىلعان جۇمىستار تۋرالى وڭىرلىك كاسىپكەرلەر پالاتاسىنىڭ ديرەكتورى نۇربەك قاراساەۆ باياندادى. 2019 جىلدىڭ 11 ايىندا ماڭعىستاۋ وبلىسىنىڭ كاسىپكەرلەر پالاتاسى 519 ءوتىنىشتى قارادى, ونىڭ 129-ى بيزنەستى قورعاۋ سالاسى بويىنشا. بۇگىنگى تاڭدا كەلىپ تۇسكەن وتىنىشتەردىڭ 51%-ى شەشىلدى. جالپى العاندا, كاسىپكەرلەردىڭ 1,62 ملرد تەڭگەگە مۇلىكتىك قۇقىقتارى قورعالدى.

كەزدەسۋ بارىسىندا تاراپتار وڭىردەگى كاسىپكەرلىكتىڭ نەگىزگى ماسەلەلەرى بويىنشا بىرلەسكەن جول كارتاسىنا قول قويدى.

بۇدان كەيىن ماڭعىستاۋ وبلىسىنىڭ كاسىپكەرلەر پالاتاسىندا بولات پالىمبەتوۆ كاسىپكەرلەردى جەكە قابىلدادى.

-"وڭىردەگى ەڭ ءجيى كەزدەسەتىن ماسەلە - جولاۋشىلار تاسىمالى. مىسالى, اۆتوبۋستا 7 جاسقا دەيىنگى بالالار تەگىن جۇرەدى,7 جاستان 15 جاسقا دەيىنگى بالالار ءۇشىن 50% جەڭىلدىك بەرىلەدى. بار جەڭىلدىك وسى. جەرگىلىكتى اكىمدىك 10 ءتۇرلى سانات بويىنشا تەگىن تاسىمالداۋ مىندەتىن قويدى: كوپ بالالى وتباسىلار, مۇگەدەكتەر جانە ت.ب. دەگەنمەن, مۇندا جول ءجۇرۋ قۇنى ەل بويىنشا تومەن, نەبارى 50 تەڭگە. ءبىز جوعارىدا كورسەتىلگەن ساناتتاعى ازاماتتار ءۇشىن سۋبسيديا تولەۋدى وتىندىك", - دەپ, "جولاۋشى-اقتاۋ" ءجشس-نىڭ ديرەكتورى رۋسلان احمەتنابيەۆ قابىلداۋ كەزىندە تاسىمالداۋ پروبلەماسىن قوزعادى.

سونداي-اق, كاسىپكەرلەردىڭ كوپشىلىگى جەر تەلىمدەرى, سۇيىتىلعان گازدى پايدالانۋ جانە بالاباقشا جۇمىستارى ءتارىزدى ماسەلەلەردى ايتتى.

-"وڭىردەگى بيزنەسمەندەردىڭ ماسەلەلەرىمەن تولىق تانىسىپ شىقتىم. ولاردى شەشۋ جونىندە ناقتى شارالار قابىلداناتىن بولادى. بارلىق ۇسىنىستاردى ءبىز ءتيىستى مەملەكەتتىك ورگاندارعا ەنگىزەمىز. مۇندا ايتىلعان ماسەلەلەردى جاۋاپسىز قالدىرمايمىز", - دەپ تۇيىندەدى بولات پالىمبەتوۆ.

ەستەرىڭىزگە سالا كەتەيىك, 2014 جىلدىڭ اقپان ايىندا قر تۇڭعىش پرەزيدەنتى كاسىپكەرلەردى قورعاۋ جۇمىستارىن كۇشەيتۋ ماقساتىندا قازاقستان كاسىپكەرلەرىنىڭ قۇقىقتارىن قورعاۋ جونىندەگى ۋاكىل قىزمەتىن ەنگىزۋدى تاپسىرعان بولاتىن. 2017 جىلى بيزنەس-ومبۋدسمەن قر پرەزيدەنتى جانىنداعى قۇقىقتىق ساياسات جونىندەگى كەڭەستىڭ جانە سىبايلاس جەمقورلىققا قارسى ءىس-قيمىل ماسەلەلەرى جونىندەگى كوميسسيانىڭ قۇرامىنا ەندى.

2016-2018 جىلدارى بيزنەستى قورعاۋ بويىنشا 17 مىڭنان استام ءوتىنىش ءتۇستى. كاسىپكەرلەردىڭ قورعالعان مۇلىكتىك قۇقىقتارىنىڭ سوماسى 110 ملرد تەڭگەنى قۇرادى. بۇل - كاسىپكەرگە قايتارىلعان ايىپپۇلدار مەن ءوسىماقىلار. وتىنىشتەردىڭ باسىم بولىگى جەر, سالىق, ساتىپ الۋلار جانە قۇقىق قورعاۋ ورگاندارىنىڭ ارەكەتتەرىنە قاتىستى تۇسكەن.