12 جىلدىق ءبىلىم جۇيەسىنە قاشان كوشەمىز؟

بىلىم ءمينيسترى 12 جىلدىق وقۋعا كوشەتىن ۋاقىتتى اتادى دەپ حابارلايدى qamshy.kz اقپارات اگەنتتىگى ktk.kz سايتىنا سىلتەمە جاساپ.

بىراق وعان جەتۋ جولىندا قيىندىق كوپ. اپاتتىق جاعدايداعى مەكتەپتەر, ءۇش اۋىسىمدىق وقىتۋ, ينتەرنەتتىڭ السىزدىگى مەن قولجەتىمسىزدىگى, ساپاسىز وقۋلىقتار. وسىلاردى جىپكە تىزگەن مينيستر اسحات ايماعامبەتوۆ ؛ماجىلىستە سىننان كوز اشپادى.

اسحات ايماعامبەتوۆتىڭ ءبىلىم مەن عىلىمدى دامىتۋعا ارنالعان باعدارلامانىڭ بار جەتىستىگىن جايىپ تاستاپ, دەپۋتاتتاردىڭ كوزىنە تۇسەمىز دەگەن ويى جۇزەگە اسپاي قالدى. ءۇش جىلدا اتقارۋى ءتيىس جۇمىستاردى مينيسترلىك تولىق ورىنداماعان. ماسەلەن, ەلىمىزدە ءۇش وقۋ جىلىندا 372 مەكتەپ سالىنعانىمەن, ءۇش اۋىسىمدا وقىتۋ ماسەلەسى شەشىلگەن جوق. 160-تان اسا مەكتەپ اپاتتىق جاعدايدا. اۋىلداردا ينتەرنەت قولجەتىمسىز. ال 12 جىلدىق ءبىلىم جۇيەسى 2021 جىلدان باستاپ ەنگىزىلمەك.

سەرگەي سيمونوۆ, ءماجىلىس دەپۋتاتى: - بىرىنشىدەن, بالا التى جاستان مەكتەپكە بارسا, وندا 12 جىل وقىپ, 18 جاسىندا بىتىرەدى. ال ەلىمىزدە 18 جاستان باستاپ اسكەرگە شاقىراتىنىن بىلەسىزدەر. سوندا تۇلەك مەكتەپتەن كەيىن اسكەرگە بارۋى كەرەك پە, الدە جوعارى وقۋ ورنىنا ءتۇسۋى كەرەك پە؟

باس ۇستازدىڭ حالىق قالاۋلىسىنا بەرگەن جاۋابى ماردىمسىز بولدى ما, تاراپتار ءوزارا قىرقىسىپ قالدى. مينيستر ايماعامبەتوۆ ءقازىر بالالاردىڭ 80 پايىزدان استامى مەكتەپكە 6 جاستان باراتىنىن ايتىپ, 12 جىلدىق مەكتەپتى 17 جاسىندا بىتىرەدى دەدى.

اسحات ايماعامبەتوۆ, ءبىلىم جانە عىلىم ءمينيسترى: - ءقازىر جەتى جاستان مەكتەپكە باراتىندار 18-دە ەمەس, 17 جاستا بىتىرەدى. سولاي عوي. ال التى جاستان بارسا, ون ەكى جىل وقىپ, 17 جاستا ءتامامدايدى. ساناپ الىڭىزدار!

ساناۋ مەن وقۋدى قاداعالايتىن مينيستر 12 جىلدىققا اسىقپاي كوشۋ كەرەك دەپ ەسەپتەيدى. ويلانباي ارەكەت ەتۋ مەكتەپ ينفراقۇرىلىمىنا ۇلكەن سالماق سالادى ەكەن.

بۇل تۇرعىدا بەكبولات تىلەۋحان ءمينيستردى تاعى دا سىنعا الدى. ايتۋىنشا, تالاي تۇلعالار 12 جىل ءبىلىم الماسا دا اتى ءماشھۇر.

بەكبولات تىلەۋحان, ءماجىلىس دەپۋتاتى: - بۇگىنگى ءبىلىم جۇيەسىن قاراپ وتىرساق, قۇردىمعا بەتتەپ بارا جاتىر. قاي جاعىنان كەلسەك تە, سىن كوتەرمەيدى. سوندىقتان جۇيەنى تۇبەگەيلى قايتا قاراۋ كەرەك. اسحات, جاقسى جىگىتسىڭ, ازاماتسىڭ. ەندى وسى ماسەلەلەرگە قاجىر-قايراتپەن كىرىسەيىكشى. تاپ وسى ماسەلە شەشىلەتىن بولسا, دەپۋتاتتىق مانداتىمدى بەرىپ, كومەكشى ءارى حاتشى بولىپ بارۋعا دايىنمىن.

جالپى, ءۇش جىلدا اتقارعان جۇمىس اۋقىمدى. مەكتەپ وقۋشىلارىنىڭ 95,4 پايىزى جاڭارتىلعان مازمۇنعا كوشكەن. عىلىم سالاسىندا دا ازدى-كوپتى جەتىستىكتەر بار. دەگەنمەن ءبىلىم سالاسىنىڭ دامۋىنا ءالى دە بولسا, قارجى جەتكىلىكسىز.

جىل سايىن جۇيەنى اۋىستىرىپ مىڭ قۇبىلاتىن ءبىلىم مينيسترلىگى بالاباقشالاردا اعىلشىندى توقتاتۋى مۇمكىن. ال الىپپەنى قايتارماق. قازاق تىلىنە بەيىمدەلگەن الىپپە احمەت بايتۇرسىنوۆتىڭ ادىستەمەسىنە سۇيەنە وتىرىپ, 2021 جىلدان باستاپ ەنگىزىلەتىن بولدى. ال دەپۋتات بەكبولات تىلەۋحاننىڭ ۇسىنىسىنا اسحات ايماعامبەتوۆ «؛ىزۋقاندىلىقپەن ايتىلعان ءسوز»؛ دەپ ءمان بەرگەن جوق.