شەكارادان وتكەن تاۋارلار باقىلاۋدا بولادى

جامبىل وبلىسى قىرعىز رەسپۋبليكاسىمەن اۋىلى ارالاس, قويى قورالاس جاتقاندىقتان, ەكى ەل اراسىندا الىس-بەرىس ءجيى ورىن الادى. ونىڭ اراسىندا ازىق-تۇلىك, ءۇي جانۋارلارىن تاسىمالداۋ جۇمىستارى كوپ. وسىنداي مەملەكەت ارالىق تاسىمال كەزىندە كورشى ەلدەن ءتۇرلى ءقاۋىپتى اۋرۋلار جۇقتىرعان مال ءوتۋىنىڭ ءقاۋپى جوعارى. بۇل ءقاۋىپ وزگە دە شەتەلدەردەن كەلەتىن تاۋارلارعا قاتىستى. دەسە دە جامبىل وبلىستىق ۆەتەريناريالىق باقىلاۋ جانە قاداعالاۋ اۋماقتىق ينسپەكسياسى اتالعان جاعدايدى تولىق باقىلاۋىندا ۇستاۋ بويىنشا جۇمىستار جۇرگىزۋدە.

ماسەلەن, 2019 جىلدىڭ 9 ايىنىڭ ىشىندە جامبىل وبلىسى اۋماعىنا 3219 باس ءىرى قارا مال رەسەي, گەرمانيا, اۆستريا, پولشا, چەحيادان, 2 702 400 دانا ينكۋباسيالىق جۇمىرتقا تۇركيادان, 6 933,524 توننا قۇس ەتى اقش-تان, 186,262 توننا مۇزداتىلعان بالىق نورۆەگيادان, 21194,4 توننا ءسۇت ءونىمى كىرعىزستان جانە ليتۆادان يمپورتتالعان. سونداي-اق, قىرعىزستان رەسپۋبليكاسىنان ەلىمىزدىڭ اۋماعىنا قازاق-قىرعىز شەكاراسىندا ورنالاسقان ۆەتەريناريالىق-سانيتاريالىق بەكەتتەر ارقىلى 236 باس جانۋار, 18 307,9 توننا ءسۇت ونىمدەرى, 125,8 توننا ەت جانە ەت ونىمدەرى, 114,6 توننا بالىق جانە بالىق ونىمدەرى وتكىزىلگەن.

اتالعان تاۋارلاردىڭ ەل ازاماتتارى ءۇشىن قاۋىپسىزدىگىن قاداعالاۋ ماقساتىندا قر ۇكىمەتىنىڭ قاۋلىسىمەن جاقىن ورنالاسقان قازاقستان-قىرعىزستان مەملەكەتتىك شەكارالارىندا باقىلاۋ پۋنكتتەرى ۇيىمداستىرىلعان. قاراسۋ جانە سىپاتاي باتىر بەكەتتەرىندە موبيلدىك ۆاگوندار, ايشا ءبيبى بەكەتىندە موبيلدىك زەرتحانا اۆتوكولىگى ورنالاستىرىلدى.

وكىنىشكە وراي, ۆەتەريناريالىق باقىلاۋ جانە قاداعالاۋ كوميتەتىنىڭ جامبىل وبلىستىق اۋماقتىق ينسپەكسياسى باسشىسىنىڭ ورىنباسارى جاندار قوەكەەۆ ۆەتەريناريالىق باقىلاۋدى اتقارۋعا قاتىستى مەملەكەتتىك ورگانداردىڭ ىقپال ەتۋ الگوريتمى بويىنشا جۇمىس اقساپ تۇرعانىن ايتادى.

&ndash؛ بۇرىن مۇنداي اۋماقتاردا پاترۋلدىك پوليسيا باسىندا بولعان, ءقازىر جوق, شەكارا جانە مەملەكەتتىك كىرىستەر دەپارتامەنتىنىڭ قىزمەتكەرلەرى تاسىمالداناتىن وبەكتىلەرى بويىنشا مالىمەت بەرمەيدى, بىرىگىپ جۇمىس اتقارمايدى. وسىعان بايلانىستى قىرعىزستان رەسپۋبليكاسىنان قازاقستان رەسپۋبليكاسىنا اۋسىل اۋرۋىنا كىرگىزۋگە قويىلعان ۋاقىتشا شەكتەۋلەر بۇگىنگى كۇنگە دەيىن الىنعان جوق. سول سەبەبتى, قىرعىزستان - قازاقستان مەملەكەتتەرىنىڭ شەكاراسىنداعى ۆەتەريناريالىق باقىلاۋ بەكەتتەرىندە مەملەكتتىك ورگاندارمەن بىرلەسە وتىرىپ ارەكەت ەتۋ وتە ماڭىزدى. مەملەكتتىك ورگاندارمەن بىرلەسە وتىرىپ دۇرىس ارەكەت ەتكەن جاعدايدا عانا جامبىل وبلىسىنىڭ عانا ەمەس, قازاقستان رەسپۋبليكاسىنىڭ ەپيزووتولوگيالىق جاعدايىن ساقتاۋعا تولىق مۇمكىنشىلىك جاسالادى.

قازاقستان رەسپۋبليكاسىنىڭ اۋماعىنا ۆەتەريناريالىق-سانيتاريالىق باقىلاۋعا جاتاتىن جۇكتەردى كىرگىزۋ رەەسترىنە قىرعىز رەسپۋبليكاسىنىڭ 82 ءوندىرىس ورىندارى ەنگىزىلگەن. ونىڭ ىشىندە: ءسۇت ونىمدەرىن وندىرەتىن - 23, ۇلتتىق ءسۇت ونىمدەرىن وندىرەتىن - 1, بالىق ونىمدەرىن وندىرەتىن - 18, ەت ونىمدەرىن وندىرەتىن - 12, بال ونىمدەرىن وندىرەتىن - 25 كاسىپورىن تىركەلگەن. مۇنىڭ بارلىعى باقىلاۋدا, &ndash؛ دەيدى اۋماقتىق ينسپەكسيا باسشىسىنىڭ ورىنباسارى.