الماتى وبلىسىندا ءىلياس جانسۇگىروۆتىڭ ەسكەرتكىشىنىڭ اشىلۋى بولدى

جىر جامپوزى, قازاق پوەزياسىنىڭ جارىق جۇلدىزى ءىلياس جانسۇگىروۆتىڭ 125 جىلدىق مەرەيتويىنا وراي تۋعان جەرى الماتى وبلىسىنىڭ جانسۇگىروۆ كەنتىندە اقىننىڭ 5 مەترلىك ەڭسەلى ەسكەرتكىشى ورناتىلدى دەپ حابارلايدى qamshy.kz اقپارات اگەنتتىگى الماتى وبلىسى اكىمىنىڭ ءباسپاسوز قىزمەتىنە سىلتەمە جاساپ. ؛

دۇبىرلى تويدىڭ بەتاشارى بولعان سالتاناتتى شاراعا وبلىس اكىمى اماندىق باتالوۆ, وليمپيادا چەمپيونى, قازاقستاننىڭ ەڭبەك ەرى, مەسەنات جاقسىلىق ۇشكەمپىروۆ, قر ەڭبەك سىڭىرگەن قايراتكەرى, تانىمال جۋرناليست نۇرتىلەۋ يمانعاليۇلى, قازاقستان جازۋشىلار وداعى ءتوراعاسىنىڭ ءبىرىنشى ورىنباسارى اقبەرەن ەلگەزەك جانە ءبىرقاتار قوعام قايراتكەرلەرى, اقىن-جازۋشىلار, اۋدان حالقى قاتىستى. ەسكەرتكىشتىڭ شىمىلدىعى ءتۇسىرىلىپ, اقىنعا تاعزىم شارالارى اتقارىلعاننان كەيىن ءسوز العان وبلىس اكىمى اماندىق باتالوۆ ءدۇبىرلى تويدىڭ باستالۋىمەن بارشا قاۋىمدى قۇتتىقتادى. "بۇگىن تۋعان جەرىنىڭ تورىنەن ءىلياس اقىنعا ارنالىپ ەڭسەلى ەسكەرتكىشى ورناتىلىپ وتىر. بۇل - ەلىنىڭ تارلان تالانتقا دەگەن قۇرمەتى, ەرەن ەرگە دەگەن تاعزىمى دەپ بىلەمىز. اقىن شىعارمالارىنان قۇلاگەردىڭ ءدۇبىرى, دالانىڭ جىرى, قوبىزدىڭ ءۇنى, دومبىرانىڭ كۇمبىرى ەسىپ تۇرادى. وسى دانالىق ءىزى, ۇلىلىق بيىگى - ۇرپاقتىڭ ويىنا قۋات, بويىنا ءنار بەرەتىن باعا جەتپەس بايلىق. بۇل ورايدا ەلباسىنىڭ "رۋحاني جاڭعىرۋ" باعدارلاماسى الەۋمەتتىك-مادەني سالالاردىڭ تىڭ سەرپىنمەن دامۋىنا ەرەكشە ىقپال ەتىپ وتىر. مەسەناتتاردىڭ ەكونوميكانىڭ باسقا سالالارىمەن قاتار, مادەنيەتكە قولداۋ كورسەتۋى رۋحانياتقا قىزمەت ەتكەنى دەپ تۇسىنەمىز. اسىرەسە, كاسىپكەر ازاماتتار باعدارلامانى جۇزەگە اسىرۋعا, تۋعان جەرىن كوركەيتۋگە بەلسەنە اتسالىسىپ كەلەدى. بۇگىنگى شارا - سونىڭ ايقىن كورىنىسى", - دەدى اماندىق باتالوۆ.

سونداي-اق, وبلىس اكىمى وسىنداي يگى ءىستىڭ اتقارىلۋىنا مۇرىندىق بولعان مەسەنات پەن ءمۇسىنشىنىڭ ەڭبەگىن ەرەكشە اتاپ ءوتتى. ؛ مۇنان سوڭ ءسوز العان ارداگەر جۋرناليست نۇرتىلەۋ يمانعاليۇلى قازاقتىڭ ماڭدايىنا بىتكەن ءۇش ارىسىنىڭ - ساكەن, ءىلياس, بەيىمبەتتىڭ بولىنبەيتىن ءۇش تۇعىر ەكەندىگىن ەسكە سالا وتىرىپ, بۇل مەرەيتويدىڭ ءىلياستانۋ سالاسىنا تىڭ سەرپىن, جاڭا ءبىر تىنىسىن اشىپ بەرگەنىن ايتتى. اقىننىڭ 20 تومدىعىن شىعارۋ, ء"ىلياس ىزىمەن" ەكسپەديسيا قۇرىپ, ماسكەۋگە ساپارىن ۇيىمداستىرۋ شارالارىنا قولداۋ كورسەتكەن, مەرەيتويدىڭ كەڭ كولەمدە, جوعارى دەڭگەيدە وتۋىنە مۇرىندىق بولعان وبلىس باسشىلىعىنا كوپتىڭ اتىنان ريزاشىلىعىن جەتكىزدى. سونىمەن قاتار ءتول پەرزەنتىمىزدىڭ تويى دەپ بار ىقىلاس-پەيىلدەرىن تانىتقان اقسۋلىقتارعا دا شىن كوڭىلدەن العىس ايتتى. سونداي-اق اقىننىڭ تويى بۇدان ءارى تالدىقورعاندا, الماتى مەن نۇر-سۇلتان قالالارىندا جانە تۇركسوي ۇيىمىنىڭ قولداۋىمەن تۇركيادا وتەتىنىن قۋانىشپەن جەتكىزدى. ؛

ەسكەرتكىش الدىندا اقىن تويىنا جولداعان مەملەكەتتىك حاتشى قىرىمبەك كوشەرباەۆ پەن الماتى قالاسى اكىمىنىڭ ورىنباسارى ەرجان باباقۇماروۆتىڭ قۇتتىقتاۋ تەلەگراممالارى وقىلدى. ؛ قازاقستان جازۋشىلار وداعى باسقارما ءتوراعاسىنىڭ ورىنباسارى باۋىرجان جاقىپ بۇگىن الاش ارىسىنىڭ تۇعىرىنا قايتا قونعان تاريحي كۇنى ەكەنىن ايتا كەلىپ, اقىنعا ولەڭ ارنادى. ال جەتىسۋلىق ارداگەر, الماتى وبلىسىنىڭ قۇرمەتتى ازاماتى, قارىمدى قايراتكەر ناۋرىز ؛قىلىشباەۆ اقىننىڭ "جەتەرمىز بە تىلەككە" اتتى ولەڭىن تاعدىرىمەن ۇشتاستىرا وتىرىپ وقىپ, مۇراسىنىڭ ماڭگىلىك ەكەنىن اتاپ ءوتتى. ؛ وسى جيىنعا قىزىلجار ولكەسىنەن ارنايى كەلگەن بەيىمبەت ءمايليننىڭ نەمەرەسى دامەن ءابىلقاسىمقىزى دا ءسوز الىپ, كەزەك-كەزەگىمەن تۇتقىندالىپ كەتكەن ءۇش ارىستىڭ ارتىندا قالعان جۇبايلارىنىڭ ءبىر-بىرىنىڭ بالالارىنا قالاي قامقورلىق تانىتقانى, قيىن ساتتەردە بىر-بىرىنە سۇيەۋ, دەمەۋ بولا بىلگەنى تۋرالى اسەرلى ەستەلىكتەرىمەن ءبولىستى. "ساكەن, بەيىمبەت, ءىلياس اتالارىمىزدىڭ تويى - بارشا قازاقتىڭ ورتاق تويى", - دەدى ءد.ابىلقاسىمقىزى. اتاپ وتسەك, جانسۇگىروۆ كەنتىنىڭ ورتالىق الاڭىنا قويىلعان ەڭسەلى ەسكەرتكىشتىڭ اۆتورى - قازاقستان ساۋلەتشىلەر وداعىنىڭ مۇشەسى, مادەنيەت سالاسىنىڭ ۇزدىگى, ءمۇسىنشى قازبەك دۋلاتوۆ. ەسكەرتكىشتىڭ دايىندالۋىنا قارجىلىق قولداۋ كورسەتكەن مەسەنات - مولديار نۇرباەۆ.

بۇدان ءارى توي جانسۇگىروۆ كەنتىندەگى ورتالىق ستاديوندا تەاترلاندىرىلعان شارامەن جالعاستى. وسى ورتادا كوپشىلىككە جىلى لەبىزىن بىلدىرگەن وبلىس اكىمى اماندىق باتالوۆ وبلىستاعى رۋحانيات سالاسىندا, تاريحتى تانۋ باعىتىندا اتقارىلىپ جاتقان شارالارعا قىسقاشا توقتالىپ ءوتتى. كۇنى كەشە قاراساي باتىرعا ەڭسەلى ەسكەرتكىش قويىلسا, بۇگىن ءىلياس اقىننىڭ اتى ارداقتالىپ, گرانيتتەن قۇيىلعان ءمۇسىنىنىڭ تۇعىرعا قونعانىن تىلگە تيەك ەتتى. اقسۋ وڭىرىندەگى ەكونوميكالىق, رۋحاني ىلگەرىلەۋشىلىكتەردى بيلىك پەن حالىق ءاردايىم بىرلەسىپ اتقارىپ وتىرعانىن دا ايتتى. الداعى ۋاقىتتا دا ەلدىڭ بەرەكەسىمەن, كوپتىڭ كومەگىمەن بۇدان دا اۋقىمدى ىستەر اتقارىلاتىندىعىنا سەنىم ءبىلدىردى. وسى ساحنادا ءىلياستانۋشى عالىمدار مۇراتبەك يمانعازينوۆ پەن كاميلا قوقىموۆانىڭ اقىننىڭ ءومىرى مەن شىعارماشىلىعىنا قاتىستى ارحيۆ دەرەكتەرى بويىنشا دايىندالعان زەرتتەۋ كىتاپتارىنىڭ تۇساۋى كەسىلدى. مەرەيتوي اياسىندا اقىننىڭ "قۇلاگەر" شىعارماسى بەلگىلى رەجيسسەر, قر ەڭبەك سىڭىرگەن قايراتكەرى, پروفەسسور ساۋلەبەك اسىلحانۇلىنىڭ سەناريىمەن دايىندالىپ, رەجيسسەرلىگىمەن ساحنالاندى. باستى رولدەردى بەيبىت قارمانوۆ, اسقار مۇقيات, مايرا وماروۆا سىندى بەلگىلى اكتەرلار سومداپ, جەرگىلىكتى ونەر ۇجىمدارى اتسالىستى, ءبىر تىنىسپەن, كەرەمەت ۇيلەسىممەن قويىلعان كورىنىس ستاديون تولى كورەرمەندەردىڭ كوڭىلىن ەرەكشە اسەرگە بولەدى. وسى كۇنى سپورتسۇيەر جاستار كوكپاردىڭ كورىگىن قىزدىردى. اقىننىڭ ارۋاعىنا ارناپ اس بەرىلدى. "دالا داستانى" سپەكتاكلى قويىلدى.  ؛

ەسكە سالساق, مەرەيتويلىق شارالار ەرتەڭ تالدىقورعاندا جالعاسىپ, توي قوناقتارى مۋزەي, كىتاپ, سۋرەت كورمەلەرىن تاماشالايدى, اقىن شىعارمالارىنىڭ 20 تومدىعىنىڭ تۇساۋى كەسىلىپ, رەسپۋبليكالىق عىلىمي-تاجىريبەلىك كونفەرەنسيا وتەدى. رەسپۋبليكالىق جازبا اقىندار ءمۇشايراسىنىڭ جەڭىمپازدارى ماراپاتتالىپ, "تالدىقورعان" يپپودرومىندا ۇلتتىق ات سپورتى تۇرلەرىنەن جارىستار ۇيىمداستىرىلىپ, ءى. جانسۇگىروۆ مادەنيەت سارايىندا مەرەكەلىك كونسەرت بولادى.