12 قازان, 2019 وقيعالار
ارىس ماڭىنداعى پوليگون اۋماعىندا وق-دارىلەردىڭ جينالعان بولشەكتەرىن جويۋ جۇمىستارى كەزىندە اسكەري قىزمەتكەر قازا تاپتى, دەپ جازادى ؛qamshy.kz اقپارات اگەنتتىگى. بۇل تۋرالى قورعانىس مينيسترلىگى حابارلادى. ؛
"11 قازاندا ارنايى جابدىقتالعان پوليگون اۋماعىندا (ارىس قالاسىنان 60 شاقىرىم جەردە) وق-دارىلەردىڭ جينالعان فراگمەنتتەرىن جويۋ بويىنشا جوسپارلى جۇمىس بارىسىندا وق-دارىلەردىڭ فراگمەنتى ۋاقىتىنان بۇرىن دەتوناسيا بولدى. سالدارىنان توپ جەتەكشىسى, اسكەري ءبولىمنىڭ ينجەنەرلىك قىزمەتىنىڭ باستىعى, مايور ا.س.اقىشەۆ اۋىر جاراقات الىپ, كوز جۇمدى", - دەپ حابارلادى قورعانىس مينيسترلىگى.
اقپاراتتا جۇمىستار قاجەتتى قاۋىپسىزدىك شارالارىن ساقتاي وتىرىپ جۇرگىزىلدى, تراگەديانىڭ ناقتى سەبەبى مەن سالدارى انىقتالۋدا, تەرگەۋ توبى جۇمىس ىستەپ جاتىر دەلىنگەن.
ۆەدومستۆو بۇل جاعداي پوليگونعا جاقىن ورنالاسقان ەلدى مەكەن تۇرعىندارىنا ءقاۋىپ توندىرمەيتىنىن ءتۇسىندىردى, وڭىردە ۇزدىكسىز باقىلاۋ جۇرگىزىلىپ جاتىر.
قورعانىس مينيسترلىگى قازا بولعان اسكەري قىزمەتشىنىڭ تۋىستارى مەن جاقىندارىنا كوڭىل ايتادى جانە ولارعا بارلىق قاجەتتى كومەك كورسەتەتىن بولادى.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر