• usd 468.56

  • eur 497.56

  • rub 7.3

  • cny 67.18

28 ناۋرىز, 19:31:09
الماتى
+35°

بۇرناعى كۇنى ءماجىلىس دەپۋتاتى نۇرتاي سابيليانوۆ ەلدەگى يپوتەكالىق باعدارلاما وپەراتورلارىن قىسقارتۋ تۋرالى ۇسىنىس ءبىلدىردى. ونىڭ سوزىنشە, "نۇرلى جەر" باعدارلاماسىن ىسكە اسىرۋمەن اينالىساتىن 8 وپەراتوردىڭ بارلىعىنىڭ جۇمىسى بىردەي حالىققا ۇعىنىقتى ەمەس. جالپى تۇرعىنداردىڭ يپوتەكالىق باعدارلامالار تۋرالى ءجىتى بىلە بەرمەيتىنىمەن ءبىز دە كەلىسەمىز. سوندىقتان باسپانالى بولۋ ءۇشىن قاي باعىت ءتيىمدى, قاي بانكتىڭ ۇستەمەسى از دەگەن سۇراقتارعا  ؛جاۋاپ ىزدەپ كوردىك.

دەپۋتات ايتقانداي, يپوتەكالىق وپەراتورلار قازاقستاندا از ەمەس. ەكىنشى دەڭگەيلى بانكتەردىڭ وزىندىك ىشكى باعدارلامالارى تاعى بار. ءبىراق ءبىز بۇگىنگى ماقالادا اناعۇرلىم ءتيىمدى ءارى قولجەتىمدى ۇسىنىستار تۋرالى عانا ءسوز ەتپەكپىز.

7-20-25

اتالمىش تاقىرىپتى كوتەرگەن سوڭ 7-20-25 باعدارلاماسىن ايتپاي كەتپەسكە بولماس. بۇل باعدارلاماعا بيلىك ۇلكەن ماڭىز بەرىپ وتىر. سوندىقتان ءجيى جارنامالانادى. ۇنەمى ارالىق قورىتىندىلارىن شاعىرىپ, باق ارقىلى ناسيحاتتاپ-اق جاتىر.

الايدا قانشا ماقتاعانىمەن "7-20-25" قاراپايىم حالىق ءۇشىن قىمبات بولىپ شىقتى. ماسەلەن, قۇنى 15 ملن تەڭگەلىك ەكى بولمەلى پاتەر العىڭىز كەلدى دەلىك. وندا العاشقى جارنا رەتىندە 3 ملن تەڭگە قۇيۋىڭىز كەرەك. قالعان 12 ملن تەڭگەنى بانك قالاۋىڭىز بەن تولەم قابىلەتىڭىزگە قاراي جىلىنا 7 پايىزدىق وسىممەن بىرنەشە جىلعا راسىمدەيدى. شامامەن 10 جىلعا الساڭىز, ارتىق تولەم 8 ملن 400 مىڭ تەڭگەنى قۇرايدى. سوندا بانككە جالپى سوماسى 23 ملن 400 مىڭ تەڭگە تولەيسىز. البەتتە, قاراجاتىڭىز بولسا, قارىزدى ەكى-ۇش جىلدا جەدەل جابا الاسىز. وندايدا ۇستەمە اناعۇرلىم ازايادى. ءتيىمدى تۇسى &ndash؛ وسى. تاعى ءبىر ىڭعايلى جاعى اقشانى ايلاپ, جىلداپ جيناۋدىڭ قاجەتى جوق. قولدا باستاپقى جارناعا جەتەرلىك قاراجات بولسا, بانككە بارىپ, تاڭداعان ءۇيدى ەسەپتەپ كورۋگە بولادى. بۇل باعدارلامادا كوپشىلىك تولەم قابىلەتتىلىكتى تەكسەرۋدەن وتە الماي قالىپ جاتادى. ويتكەنى باعدارلاما بويىنشا جالاقى ورتاشادان جوعارى بولۋى ءتيىس.

باعدارلامانى ۇلتتىق بانكتىڭ ەنشىلەس كومپانياسى &ndash؛ «؛باسپانا»؛ يپوتەكالىق ۇيىمى جۇزەگە اسىرادى. ونىڭ تاعى «؛باسپانا حيت»؛ اتتى باعىتى بار. ول بويىنشا جاڭا ۇيلەرمەن قاتار ەسكى ءۇيدى دە نەسيەگە الۋ بولادى. وندا تەك بەرەشەكتىڭ جىلدىق ءوسىمپۇلى 10,5 پايىز. وسى ەكى باعىت بىرىگىپ, 1 جىل 3 ايدا 22 مىڭعا جۋىق زايم ؛بەرىلىپتى. ياعني 22 مىڭ ادام وسى باعدارلامامەن باسپانالى بولعان. سالىستىرۋ ءۇشىن تۇرعىن ءۇي قۇرىلىس جيناق بانكىنىڭ جىل باسىنان بەرگى 8 ايداعى قورىتىندىسىنا ۇڭىلەيىك. 31 ؛523 كەلىسىم-شارت. ايىرماشىلىق اپ-انىق. تقجب ارتىنان ورالامىز. ازىرگە ساتىپ الۋ قۇقىعىمەن جانە ساتىپ الۋ قۇقىعىنسىز بەرىلەتىن پاتەرلەر تۋرالى ايتقىمىز كەلەدى.

سامۇرىق-قازىنا جىلجىمايتىن مۇلىك قورى

وڭىرلەردى دامىتۋدىڭ 2020 جىلعا دەيىنگى باعدارلاماسى اياسىندا قازاقستاننىڭ يپوتەكالىق كومپانياسى ءوزىنىڭ قىزمەتىن اياقتاعاننان كەيىن نارىقتا ساتىپ الۋ قۇقىعىمەن پاتەر ۇلەستىرۋشى جالعىز وپەراتور &ndash؛ "سامۇرىق-قازىنا جىلجىمايتىن مۇلىك قورى" عانا قالدى. اتالمىش وپەراتوردىڭ قازاقستاننىڭ نۇر-سۇلتان, الماتى, اقتوبە, شىمكەنت, قىزىلوردا سىندى قالالارىندى تۇرعىن ءۇي كەشەندەرى بار.

بۇل باعدارلاماعا قاتىسۋ ءۇشىن ەشقانداي باستاپقى جارنانىڭ قاجەتى جوق. تەك پاتەردىڭ جالعا الۋ باعاسىنىڭ ءۇش ەسەلەنگەن سوماسى شاماسىنداعى كەپىلدىك قاراجات بولسا جەتەدى. باعدارلاماعا قۇجاتتار كومپانيانىڭ  ؛سايتتى ؛ارقىلى قابىلدانادى. سايتتا كونكۋرستىڭ جاريالانعانى تۋرالى حابارلاندىرۋ جاريالانعاندا قاجەتتى قۇجاتتاردى جيناپ, ەلەكتروندىق-سيفرلىق قولتاڭبا ارقىلى ولاردى تاپسىرىپ ۇلگەرۋ قاجەت.

بۇل باعدارلامانىڭ دا كەمشىل تۇسى &ndash؛ قىمباتتىعىندا. ايتالىق, الماتىداعى شۇعىلا تۇرعىن ءۇي كەشەنىندەگى اۋدانى 39 شارشى مەترلىك ءبىر بولمەلى پاتەردىڭ اي سايىنعى تولەمى 90 مىڭ تەڭگەگە جۋىق. كوممۋنالدىق تولەمدەرمەن اي سايىن قالتاڭىزدان 100 مىڭنان استام اقشا شىعادى. وسىنشا سومانى ماكسيمالدىق مەرزىم &ndash؛ 14 جىل بويى تولەر بولساڭىز, ءبىر بولمەلى پاتەر قۇنى 14 جارىم ملن تەڭگەگە تۇسەدى. اتالمىش پاتەر قۇرىلىس كومپانياسىندا 9 ملن 700 مىڭ تەڭگە تۇرادى.

كارتينكي پو زاپروسۋ جك شۋگىلا

ايتا كەتەرلىگى, بۇندا دا بەرەشەكتى ەرتەرەك قايتارساڭىز, ۇستەماقى كولەمى اجەپتاۋىر ازايادى.

مۇعالىمدەر مەن مەدبيكەلەرگە قۇلاققاعىس

بىلىم بەرۋ سالاسىنىڭ قىزمەتكەرلەرى مەن دەنساۋلىق ساقتاۋ سالاسىنىڭ ماماندارى ءۇشىن ارنايى جوبا قابىلدانعانى جونىندە ماۋسىم ايىندا ؛حابارلانعان ؛بولاتىن. دەنساۋلىق ساقتاۋ مينيسترلىگى مەن ءبىلىم جانە عىلىم مينيسترلىگى قازاقستاننىڭ يپوتەكالىق كومپانياسىمەن 40 ملرد تەڭگەلىك كەلىسىمگە قول قويدى. ول بويىنشا اتالعان سالالاردىڭ قىزمەتكەرلەرىنە ارناپ ؛ساتىپ الۋ قۇقىعىمەن 3 مىڭ پاتەر بەرىلمەك. پاتەردى باستاپقى جارناسىز, 20 جىل مەرزىمگە الۋعا بولادى. اي سايىنعى تولەم ؛&ndash؛ ءبىر بولمەلى پاتەر ءۇشىن 60 مىڭ تەڭگەگە دەيىن. ءتىزىمدى اتالعان مينيسترلىكتەر ازىرلەيدى دەپ كۇتىلۋدە.

 ؛جاستارعا ارنالعان پاتەرلەر

بيىلعى "جاستار جىلىنا" ورايلاستىرىلىپ, ساتىپ الۋ قۇقىعىنسىز پاتەرلەر بەرۋ باعدارلاماسى قابىلدانعانى بەلگىلى. جوسپارعا ساي, ەندى بۇدان بىلاي ەلوردادا, الماتى مەن شىمكەنتتە جىل سايىن 1000 پاتەر قولدانىسقا تاپسىرىلماق. پاتەرلەر تەك جاستارعا, ياعني 29 جاسقا دەيىنگى جۇمىس ىستەيتىن ازاماتتارعا 5 جىل مەرزىمگە بەرىلەدى. اي سايىنعى تولەم 10 مىڭ مەن 12 مىڭ تەڭگە ارالىعىندا بولادى دەپ جوسپارلانىپ وتىر. بۇل &ndash؛ تۇرمىستى تۇزەپ, اقشا جيناپ الۋعا تاماشا مۇمكىندىك. باعدارلامانىڭ تالاپتارى تۋرالى ؛مىنا ؛جەردەن وقي الاسىزدار. بيىلدىققا بەرىلەتىن پاتەرلەرگە قۇجات قابىلداۋ جۋىر ارادا جۇرگىزىلمەك. ول ءۇشىن اتالمىش قالالاردىڭ تۇرعىن ءۇي ساياساتى باسقارماسىنىڭ سايتىن قاداعالاپ وتىرۋ قاجەت.

كوپبالالى نەمەسە تولىق ەمەس, مۇمكىندىگى شەكتەۋلى بالاسى بار وتباسى بولساڭىز

بيىل ىسكە قوسىلعان باعىتتاردىڭ ءبىرى &ndash؛ "باقىتتى وتباسى" باعدارلاماسى. جىلدىق 2 پايىزبەن بەرىلەتىن كرەديتتەر كوپبالالى وتباسىلار, تولىق ەمەس جانە مۇمكىندىگى شەكتەۋلى بالاسى بار وتباسىلارعا ارنالعان. باستاپقى جارنا رەتىندە ءۇي باعاسىنىڭ 10 پايىزىن جيناۋ قاجەت. باعدارلاماعا ساي جاڭا پاتەر الام دەۋشىلەرگە, ەكىنشى نارىقتاعى قولدانىستاعى پاتەر نەمەسە جەر ءۇي الام دەۋشىلەرگە دە شەكتەۋ جوق. تەك قارىز سوماسى نۇر-سۇلتان, الماتى, شىمكەنت, اقتاۋ جانە اتىراۋ قالالارى ءۇشىن 15 ملن تەڭگەدەن, قالعان قالالار ءۇشىن 10 ملن تەڭگەدەن اسپاۋى ءتيىس. سونداي-اق اكىمدىكتە ءتۇرعىن ءۇي كەزەگىندە تۇرۋ ؛&ndash؛ مىندەتتى تالاپتاردىڭ ءبىرى. باعدارلاماعا قۇجات قابىلداۋ تۋرالى حابارلاندىرۋ جەرگىلىكتى جەردىڭ تۇرعىن ءۇي ساياساتى باسقارماسىنىڭ سايتىندا جاريالانادى.

 ؛ۇش جىل جينا دا, ءۇيلى بول

تۇرعىن ءۇي نارىعىنداعى ەڭ تانىمال, سونداي-اق مەيلىنشە ءتيىمدى ءارى جالپىحالىققا ارنالعان باعىت &ndash؛ تۇرعىن ءۇي قۇرىلىس جيناق بانكى ۇسىناتىن باعدارلامالار. قىسقا قايىرار بولساق, اۋەلى ىستەلەتىن قادام &ndash؛ بانكتەن دەپوزيت اشۋ. ونىڭ سوماسى شارتتى تۇردە بەلگىلەنۋى مۇمكىن. ءبىراق ول ماڭىزدى ەمەس. ماڭىزدىسى &ndash؛ اي سايىن, ۇزبەي, بەلگىلەنگەن مولشەردە دەپوزيتكە اقشا سالىپ تۇرۋ. ەگەر جىل سوڭىنا دەيىن شوتتا 200 ايلىق ەسەپتىك كورسەتكىش (مرپ) كولەمىندەگى قارجى جينالسا, وندا سونىڭ 20 پايىزداي مولشەرى سىياقى بولىپ شوتقا اۋدارىلادى. ماسەلەن, بيىل جىل سوڭىنا شەيىن 505 مىڭ تەڭگە جيناساڭىز, بانك سىزگە 101 مىڭ تەڭگە سىياقى بەرەدى. قاڭتار ايىندا ءسىزدىڭ شوتىڭىزدا اۆتوماتتى تۇردە 606 مىڭ تەڭگە جاتادى. ءدال وسىلاي ءۇيدىڭ بىرنەشە مۇشەسىنە شوت اشىپ, اتالمىش شەككە جەتكىزسە, ءار اشىلعان دەپوزيتكە 101 مىڭ تەڭگەدەن تولەنەدى. 3 جىلدان كەيىن بىرنەشە دەپوزيتتى بىرىكتىرىپ, ءۇي الا الاسىز.

وسى جەردەگى قاپەرگە الاتىن جايت &ndash؛ دەپوزيتتىڭ 3 جىل بويى جينالۋى. قاراجاتتى ءۇش جىل جيناماي-اق بىردەن ءۇيدىڭ 50 پايىزىن قۇيا سالسا دا شەكتەۋ جوق. وندا بانك بەرەتىن قالعان 50 پايىزدىڭ ءوسىمپۇلى 8,5 پايىز مولشەرىندە بولادى. ال پاتەردىڭ 20 پايىز مولشەرىندەگى العاشقى جارناسىنا جەتەرلىكتەي سوما 3 جىل بويى ۇزبەي جينالسا, بانك زايىمدى 3,5-5 پايىزبەن بەرەدى. بۇل رەتتە ءسىزدىڭ جيناق تاريحىڭىز بەن دەپوزيتتەگى سوما ەسكەرىلىپ, باعالاۋ كورسەتكىشى تاعايىندالادى. ءدال وسى باعالاۋ كورسەتكىشى سىزگە بەرىلەتىن كرەديتتىڭ جىلدىق پايىزدىق مولشەرلەمەسىن انىقتايدى. باعالاۋ كورسەتكىشىنىڭ ماكسيمالدىق شاماسى &ndash؛ 16. بۇل شاماعا جەتۋ ءۇشىن شوتتى 3 جىل بويى اي سايىن تولتىرىپ, ونداعى قاراجاتتى باستاپقى جارناعا جەتكىزۋ مىندەتتى.

قازىرگى تاڭدا تقجب الماتىداعى سايالى ىقشاماۋدانىنان ۇسىناتىن ءبىر بولمەلى پاتەرلەردىڭ قۇنى 8 ملن تەڭگەدەن باستالادى. ەگەر دەپوزيتىڭىزدە كەمى 1 ملن 600 مىڭ تەڭگە بولسا, اتالعان پاتەر سىزدىكى. ەسەپتەپ كورسەك, 1 ملن 600 مىڭ تەڭگەنى 3 جىلدا جيناۋ ءۇشىن دەپوزيتتى ايىنا 36 مىڭ تەڭگەدەن تولتىرىپ وتىرۋ جەتكىلىكتى. بانكتىڭ 3 جىلدا بەرەتىن سىياقىسىمەن سىزدە تۇپ-تۋرا قاجەتتى سوما جينالادى.

كونكۋرستار تۋرالى جاڭالىقتار ؛baspana.kz ؛پورتالىندا جاريالانادى.

بىز تەك جالپى ءبىراق ماڭىزدى اقپارمەن بولىستىك. ەندىگىسى ؛&ndash؛ ءوزىڭىزدىڭ قۇزىرىڭىزدا.

مەلىس سەيداحمەتوۆ

اۆتورمەن ونىڭ facebook پاراقشاسى ارقىلى حابارلاسۋعا بولادى.

جازىلىڭىز

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر