ىستامبۇلدا اداسۋ – ءبىر عانيبەت

وسى ءبىر كۇندىز ەستەن, تۇندە تۇستەن كەتپەيتىن ساپاردىڭ قارساڭىندا, ءوز باسىم انادولى ەلىنە جەتپەي-اق, الاتاۋ بوكتەرىندە تولقىنىسقا تولى كۇيدە ءجۇردىم. سەبەبى, بەرىسىن ايتساق تۋىستاس تۇرىك جۇرتىنىڭ تۋ تىككەن قۇت مەكەنى, ارىسىن ايتساق كۇللى ادامزاتقا ورتاق وركەنيەتتىڭ ۇلى قازانى ىسپەتتى ىستامبۇل قالاسىنا بارۋ &ndash؛ ەلدىڭ وتكەنى مەن كەتكەنىنە كوبىرەك ءۇڭىلىپ جۇرەتىن ءبىزدىڭ سانامىزعا ءسانتۇرلى ساۋالدار ازىرلەپ قويعان بولاتىن. «؛تىرىسىندە ىستامبۇلدى كورگەن كىسىدە ارمان بار ما؟»؛ دەگەن كونە ايتىلىم قۇلاعىمدا جاڭعىرىپ كوپ ءجۇردى. اتاقتى ناپەولون:«؛ەگەر جەڭىسكە جەتسەم, وسى اتاقتى قالانى يمپەرياعا استانا ەتەر ەدىم»؛ دەپ اۋزىنىڭ سۋى قۇرىسا, ال, بابام دوسپامبەت جىراۋ: «؛ازاۋلىنىڭ ىستامبۇلدان نەسى كەم»؛ دەپ ەكى ءىرى قالانى شەندەستىرە شەرىن توگەدى.

ۋكراين استاناسى كيەۆكە ءتورت ساعات ايالداپ الىپ, ىستامبۇلعا بەت تۇزەگەن ۇشاق الىپ قالانىڭ جاڭا اۋەجايىنا كەلىپ قوندى. قالانىڭ شەكتەن تىس ۇلعايىپ كەتۋىنە بايلانىستى, ىستابۇلداعى اتاتۇرىك اۋەجايىن كوشىرىپ, قالادان ۇزاق بايتاق جازىققا سالعان جاڭا اۋەجايى وسى ەكەن. بۇل ۇشاقجايدىڭ ءوزى ءبىر شاعىن قالا سياقتى. وتە ۇلكەن ءارى زاماناۋي قۇرىلىستارمەن گۇلدەي جايناپ تۇر.

بىزدى وسى قالادا تۇراتىن, ەندى عانا ەلگەزەك جەلى ارقىلى سىرلاس دوسىمىزعا اينالا باستاعان ەرلان اتتى ازامات كۇتىپ الدى. الماتىدان كەلگەن سەگىز جولاۋشى ەكى تاكسيگە ءبولىنىپ ورنالاستىق. ەكى جەڭىل كولىك ۇلكەن شاھارعا كىرەتىن كۇرە جولدا قۇيرىق تىستەسىپ زىمىراپ كەلەدى. تاريحتا باتىستاپ جىلجي كوشىپ, جىعىلا قوناقتاپ, ەگەي تەڭىزىنە ات باسىن تىرەگەن وعىز تۇرىكتەرىنىڭ ەلىنە ەمەس, ءوزىمىزدىڭ اتالاس ءبىر تۋىستىڭ ۇيىنە كەلە جاتقانداي كوتەرىڭكى كوڭىل-كۇيدەمىز. كۇن شايداي اشىق. داڭعىلدا كەپتەلىس جوق. كوز الدىمنان وسىدان مىڭ جىل بۇرىنعى ارپالىسقا تولى انادولى تاعدىرى كوشكەن كەرۋەندەي ەلەس بەرىپ جاتتى. مىنگەن جەڭىل كولىكتەرىمىز ۇلكەن جولدان بۇرىلىپ, قالانىڭ ىشىنە ىلىنە بەرە قيلى-قيلى سوقپاقتاردان ءوتىپ, "kupeli palace"دەگەن اق بوز ۇيگە تۇمسىعىن تىرەپ توقتادى.

ەرىنبەي جازعان كىسىگە ۇشاقجايدان قالا ورتالىعىنا دەيىنگى ەلۋ شاقىرىمدىق وسى جولدىڭ ءوزى ءبىرتالاي سىر ايتار ەدى. وزگەشە ۇلگىدەگى قالا, سەڭدەي سوعىلعان كوپ ادام, كوشەنىڭ تارلىعى, ىرعاعى تەز شاھار ءومىرى, كونە مەن جاڭا ۇشتاسقان ءسانتۇرلى قۇرىلىستار, بوي تالاسقان عيماراتتار. بارىنەن قىزىعى, اندا-مۇندا شەتى كورىنىپ قالاتىن الىپ تەڭىز...

 ؛

قوناتىن جەرگە ورنالاسىپ العان سوڭ, ەرلان ەكەۋمىز ويلى-قىرلى كوشەلەر بويىمەن جاياۋلاتىپ, كەڭەس قۇرىپ, ءجۇرىپ كەتتىك. باعىت &ndash؛ سۇلتان احمەت مەشىتى. الاكەۋىم اقشامدا تۇلا بويى تۇنعان جادىگەر, تاريحتىڭ سان ءتۇرلى سىن ساعاتىن باسىنان وتكىزگەن وسى قۇلشىلىق ۇيىنە كىرىپ شىقتىق. جارتى بولىگىنە قايتا جوندەۋ جۇمىسى ءجۇرىپ جاتسا دا, التى مۇنارالى اسقاق مەشىتكە كەلۋشىلەر كوپ-اق ەكەن. الەمنىڭ ءار بۇرىشىنان كەلەتىن ادامزات بالاسىنىڭ ءبارىن تاڭداندىرىپ, ماڭدايىنا ىلگەن قۇران سوزىمەن نۇرلانىپ, ءباز باياعىسىنداي, بيىكتىك پەن تازالىقتىڭ, كونەلىك پەن قايسارلىقتىڭ سيمۆولى بولىپ, ەڭسەسىن تىكتەپ تۇر ەكەن ەجەلگى ەسكەرتكىش.

سول توڭىرەكتەگى شايحانالاردىڭ بىرىنەن تۇرىكتىڭ قويۋ قارا شايىن ءىشىپ, تاماقتاندىق. ەرەكەڭ دە قازاق ءسوزىنىڭ قايماعىن قالقىعان ءبىلىمدى جىگىت ەكەن. اڭگىمەنىڭ تيەگىن اعىتىپ وتىردى. بۇل داستارقاندا ادماتىدان كەلگەن تاعى ءبىر جۇپ جاسپەن بىرگە ءدام تاتىستىق. مەن بۇل جولى توڭىرەككە وي جۇگىرتە قاراۋمەن جانە جىگىتتەردىڭ اڭگىمەسىن تىڭداۋمەن بولدىم. جاتار ۋاقىت جاقىنداپ كەلە جاتقاندا جان-جاققا تاراستىق. مەن ءوزىم باعانا ءجۇرىپ كەلگەن ءبىر شاقىرىمداي قيلى-قيلى سوقپاقتارىممەن جاياۋ ءجۇرىپ, تۇسەلحاناعا قايتتىم. كوشەدەگى ۇيلەر, قيا بەتكەيلەرگە ورنالاسا سالعان. جولدار قاتتى تار. وتە ابايلاماعان كىسى كەز كەلگەن كوشە قيىلىسىندا كولىككە سوعىلۋى مۇمكىن سياقتى. ءبىراق بۇل جەردىڭ جاياۋى دا, كولىك تىزگىنشىسى دە, وسى سۇراپىل شاپشاڭ ءومىر ىرعاعىنا ۇيرەنىپ كەتكەن سياقتى.

تۇرىكشە ۇلكەن كوشەلەر «؛جاددە»؛ دەپ, شاعىن, قىساڭ كوشەلەر «؛سوكاك»؛ دەپ اتالادى. سوكاك &ndash؛ قازاقتىڭ «؛سوقپاعى»؛ عوي. تۇرىكشەنى ۇيرەنبەگەن قازاق  ؛كەمىندە ەلۋ پايىز تۇسىنە الادى. ال, بۇل تۋىسقانداردىڭ تىلىنە ەنگەن اراب, پارسى, اعىلشىن, فرانسۋز تىلدەرىنىڭ ەلەمەنتتەرى كوپ بولعاندىقتان, قالعان سوزدىك قوردى سىزگە ساپار بارىسىنداعى ءومىر سىيلايدى. تۇركيادا ءبىر اي تۇرعان كىسى كادىمگىدەي تۇرىك ءتىلىن ۇيرەنىپ كەتە الادى. ال, ەكى ايدان باستاپ تۇرىكتەرمەن ۇرسىسا الاتىن دەڭگەيگە جەتەسىز. ەرلان ىستامبۇلعا كەلگەنىنە ءۇش-تورت جىل بولعان جىگىت. ال, ول ءقازىر تۇرىكتەرگە جاڭىلتپاش ۇيرەتەتىن دەڭگەيگە جەتىپتى. تۇرىك تىلىندە دە قازاق ءتىلى سياقتى كونە تۇركىلىك سوزدەر, ەتىستىكتەر بارشىلىق. تەك ءبىزدىڭ انا تىلىمىزدە ماعىنالىق قۋاتى سولعىنداعان كەيبىر ءسوز تۇرىكتەردە سول كۇيىن ساقتاسا, ال كەرىسىنشە بىزدە ماعىناسى قويۋلانا تۇسكەن كەي اتاۋلار, بۇلاردا ماعىناسى تارايىپ كەتكەن. بۇل تىلدەردىڭ تابيعي دامۋ قۇبىلىسى. مىسالى, تۇرىكشە كاردەش (اعا, ءىنى, قارىنداس, باۋىر), ۇلاشماك (ۇلاسۋ, جەتۋ), ت.ب.

مەنىڭ ساپارلاستارىم قازاقستان عىلىم وراسىنداعى ا.بايتۇرسىنۇلى اتىنداعى ءتىل ءبىلىمى ينستيتۋتى مەن ءال-فارابي اتىنداعى قازۇۋ-دىڭ فيلولوگيا جانە الەم تىلدەرى فاكۋلتەتى, جالپى ءتىل ءبىلىمى جانە ەۋروپا تىلدەرى كافەدەراسىنىڭ بىرلەسكەن باعدارلاماسى بويىنشا ءبىلىم الىپ جاتقان 2-كۋرس ماگيسترانتتارى. گرۋپپالاستاردىڭ مەنەن باسقا جەتەۋى تۇگەلدەي نازىك جاندىلار. ءبىز ادەتتەگىدەي ماگيسترانتتار وتۋگە ءتيىستى شەتەلدەگى پراكتيكا تاعىلىمداماسى ءۇشىن, جىل بويى دايىندالىپ, وسى بىرەگەي شاھارعا جول تارتقانبىز.

وسى كۇنى الىس جولدان شارشاڭقىراپ جەتكەندىكتەن ەشقايدا قىدىرماي, دەمالىپ قالدىق. تۇسكەن قوناق ءۇيىمىز تەڭىزگە جاقىن ورنالاسقاندىعىنان بولار, جاتىن بولمەدەگى دىمقىل ءيىس تىم جاعىمدى بولا قويعان جوق. ونىڭ ۇستىنە ءتۇن بويى تاسىرلاتىپ ىستامبۇلدىڭ جاڭبىرى جاۋىپ-اق بەردى. تاڭعى استى قوناق ۇيدە ىشتىك. تاڭعى اس ءتۇرى مول, ءدامى ءتىل ۇيىرەتىندەي كەرمەت بولادى ەكەن.

ىستامبۇلدا قوناق ءۇي باعاسى تىم قىمبات. ال, ءبىز وقۋ ساپارىمەن جۇرگەندىكتەن, ارزانىراق قوناق ۇيگە تاپسىرىس بەرگەنبىز. ءبىزدىڭ پراكتيكادان وتۋگە ءتيىستى ىستامبۇ ۋنيۆەرسيتەتىندەگى جاۋاپتى كىسىلەر وسى قوناق ءۇيدىڭ باعاسىن قولجەتىمدى دەڭگەيگە كەلىسىپتى. سوندا دا كىسى باسىنا 100 ليرا ياعني 7000 تەڭگەدەن اينالادى. ال, باسقا جولاۋشىلار ءۇشىن بۇدان دا قىمبات. سەبەبى, بۇل ۋنيۆەرسيتەتكە جانە ساياحاتشىلار كوپ جۇرەتىن كورنەكتى جەرلەرگە جاقىن بولعاندىقتان, ارينە باعاسى اسقاقتاپ تۇر. ەندى جاي مەيمانحانالار وسىنداي بولعاندا, اتاقتى قوناق ۇيلەردىڭ باعاسى اسپاندا دەپ ويلاي بەرىڭىز. سونىمەن, ءبىر كۇن بۇل ۇيدە تىنىعىپ, دامىلداپ العان سوڭ, ءبىز قوناق ءۇي ەمەس, قولجەتىمدى پاتەرگە كوشۋ تۋرالى شەشىم قابىلدادىق.

كەزىندە بابالارىمىز «؛قالا سايىن ءۇي سال»؛ دەپ تامسىلدەگەن. ونىسى ءار جەردە ات بايلار اعايىنىڭ بولسىن, الىس-جۋىقتاعى اعايىننان بايلانىس ۇزبە دەگەنى عوي. ال, بۇل ەلدە مەنىڭ تۋىستارىم بارشىلىق.

تۇركيادا وسىدان سەكسەن جىل بۇرىن قىتايداعى قىزىل كوممۋنيستىك قىرعىنشىلىققا قارسى سوعىسا ءجۇرىپ, قىرىلىپ, وراسان زور شىعىندار, قۇرباندىقتار بەرىپ, التايدان دۇركىرەي كوشىپ, اسپانتاۋ اتانعان گيمالايدان اسىپ, پاكىستان ارقىلى تۇركياعا جەتكەن باتىر قازاقتاردىڭ ۇرپاقتارى تۇرادى. ءبىزدىڭ وسى ساپار ەستەلىگىمىزدى ۇنەمى وقىپ وتىرساڭىز, مەن سىزگە سول ەسىل بابالاردان قالعان باقىتتى ۇرپاقتاردىڭ كيەلى داستارقانىندا بولعاندا, جاتا-جاستانا اڭگىمەلەسىپ جازىپ العان قاندى حيكايالاردى ايتىپ بەرەمىن. مەنىڭ تۋىستارىم دا سول كىسىلەر. جالپى تۇركيادا ۇزىنسانى جيىرما مىڭنان اساتىن قازاق تۇرادى. ولاردىڭ كوبى كەزىندە سول قىتاي قىرعىنىنان امان ءوتىپ, وسىندا ات باسىن تىرەگەن التاي قازاقتارى.

جاتىن ورىن ماسەلەسىنە بايلانىستى مەن ەندى وسى تۋىستاردىڭ بىرىنە قوڭىراۋ شالدىم. ول كىسى ماعان ەشكىمنەن جاردەم كۇتپەي, ەشقايدا تابان توزدىرماي, ساپارلاستارىمدى باستاپ ۇيىنە كەلۋىمدى تاپسىردى. مىنەكي, قۋانىشتان جۇزدەرى جايناعان قىزداردى ەرتىپ, چەموداندارىمىزدى جەتەلەپ, ەندى ءبىز «؛مەترو ستانساسى, قايداسىڭ؟»؛ دەپ ءجۇرىپ كەتتىك. تۇرىكتەردەن جول سۇراپ وتىرىپ, جاياۋ-جالپىلى مەتروعا دا جەتتىك. ىستامبولدا مەترو جەلىلەرى وتە كوپ. باعىت-باعدارلاردى ابدەن ءبىلىپ الماعان كىسى, باسقا جاققا كەتىپ قالۋى بەك مۇمكىن. ء«؛جۇرىپ كورمەگەن جەردىڭ ويلى-شۇڭقىرى كوپ»؛ دەيدى قازاق. سوندىقتان, جول مولشەرىن بىلمەگەن كىسى بۇل ادام تەڭىزىنەن قۇرالعان ۇلكەن قالادا تاكسي ۇستاۋى ىڭعايسىز تالعام. سەبەبى, ساياحاتشىلاردان ءبىر مينۋت ارقاسى بوسامايتىن ىستامبۇل كوشەسىنىڭ كەيبىر كولىك تىزگىنشىلەرى شەتتەن كەلگەن جولاۋشىلاردى الداپ-ارباپ, جاقىن جەرگە الىس جول ءجۇرىپ, قالتاسىن قاعىپ الۋى دا ىقتيمال. وسى جايتتەردى بۇرىن دا ەستىگەن ءبىز مەترونىڭ قۇلاعى كورىنگەنشە جاياۋلاتا سالدىق.

بىر قىزىعى ءبىز ستانسا اتى مەن جەلى اتىن شاتاستىرىپ الىپ, باسقا باعىتقا كەتىپ قالىپتىق. ءمارماراي بەكەتىنەن زەيتۇنبۇرنۇ بەكەتىنە ەكى بەكەت جۇرەتىن جولدى ءبىز, بىلمەستىكپەن باسقا باعىتپەن اۋىستىرىپ, ارتىق ۋاقىت جوعالتتىق. دەگەنمەن, مۇنداي عاجاپ قالادا اداسۋدىڭ ءوزى ءبىر عانيبەت ەمەس پە! ىستامبۇل جەر استى جولدارى ماسكەۋ, لوندون, بەيجىڭ سياقتى وتە كوپ. جەر ءاستى-ۇستى تۇگەلدەي تەمىر جولدارمەن تۇتاسقان. تۋنەلدەر بىر-بىرىمەن شىرما-شاتۋ ايقاسىپ ءوتىپ جاتادى. سوندىقتان, العاش بارا قالعاندا, مەترو قىزمەتكەرلەرىنىڭ جاردەمىنە, كارتا مەن ينتەرنەت كومەگىنە سۇيەنۋدىڭ ابەستىگى جوق. ءىرى قالالاردا تاكسي مەن اۆتوبۋسقا قاراعاندا مەترو ەڭ قولايلى كولىك سانالادى. «؛ىتامۋل كارد»؛ دەپ اتالاتىن جول ءجۇرۋ كارتاسىنا لايىقتى اقشا سالىپ الاسىز دا, جەردىڭ ءاستى-ۇستىن شارلاي بەرەسىز. جول اقىسى 2-3 ليرا ياعني 150-300 تەڭگە كولەمىندە باستالادى. جۇرەر جول ۇزاعان سايىن, اۋىساتىن جەلىلەر سانى كوبەيگەن سايىن تولەيتىن جول اقى دا وسە بەرەدى. اۆتوبۋس باعاسى دا وسىمەن قارايلاس. ترامۆاي, تروللەيبۋستەر دە وتە قولايلى. جانە وتە تەز كەلەدى. قالادا كەپتەلىس بولادى. ءبىراق 20 ميلليون حالىق تۇراتىن قالادا بۇل زاڭدى دا. دەگەنمەن, بۇل الىپ قالانىڭ ترانسپورتى نەگىزىنەن وتە جاقسى دامىعان. ىركىلىسسىز, كەدەرگىسىز.

سونىمەن, اقىرى ءبىز زەيتۇنبۇرنۇدان بەشىر كوسە اعامىزدى تاپتىق. بەشىر ءبىزدى «؛قازاق-تۇرىكتەرى»؛ قورى اتتى قوعامدىق ۇيىمنىڭ مەكەمەسىندە قارسى الدى. بەشىر كوسەمەن بۇرىن تەلەفوندا سويلەسكەنىم بولماسا, تۇڭعىش جۇزدەسۋىم وسى. گيمالايدان اسىپ, سوڭعى ۇمىتتەرىن مۇسىلمان تۇرىكتەردەن كۇتىپ ۇزدىكسىز كوشىپ, مىڭ ميحناتپەن ىستامبولعا جەتكەن التاي قازاقتارىنىڭ ءبىر ۇلى وسى كىسى. ءوزى تۇركيا قازاقتارىنىڭ اراسىنان شىققان ءداستۇرلى ءانشى, ونەرپاز ازامات. اتاقتى ءانشى بولماسا دا, تۇرىك بالاسى تۋ تىككەن اتاقتى التايدان اۋعان ەلدىڭ ساعىنىشىن اۋەنىمەن جەتكىزىپ جۇرگەن ونەر يەسى. قازاقستاندا دا بىرنەشە رەت شىعارماشىلىق كەشىن وتكىزگەن. ىستامبۇلداعى قازاقتار اراسىندا بەشىر كوسەنىڭ قۇرمەتى جوعارى. ءبىز بۇل جەردەن تىزە بۇگىپ, تىنىستاپ, شاي ىشە وتىرىپ كەڭەستىك. اتالعان قوعامدىق قوردىڭ پرەزيدەنتى ياقۇپ بەي دەگەن اعامىزبەن تانىستىق. ول كىسى دە ۇزاق كوشپەن كەلگەن كىسىلەردىڭ ۇرپاعى ەكەن. «؛بەي»؛ تۇرىكشە اعا, اعاي دەگەن ءسوز.

 ؛

اۆتور بەلگىلى ءانشى بەشىر كوسەمەن بىرگە

شايدان سوڭ, بەشىر كوسە ءبىزدى ءوز ۇيىنە باستادى. قالانىڭ كورىكتى جەرىنە قونىس تەپكەن ادەمى ۇيگە كەلىپ جايعاستىق. قازاقتا «؛ۇيدەن قىرىق ادىم اتتاپ شىقساڭ ءمۇساپىرسىڭ»؛ دەگەن ماقال بار. ءمۇساپىر قيىندىق شەككەن كىسى عانا ەمەس, جولاۋشى, قوناق ماعىناسىندا دا قولدانىلادى. ال, تۇرىكتەر «؛مۋسافير»؛ دەپ جولاۋشىنى ايتادى. مەيلى قالاي دەگەن كۇندە دە, جولاۋشى ءوز ۇيىنەن شىققان سوڭ, مەجەلەپ كورمەگەن ازدى-كوپتى قيىندىقتارعا جولىعارى داۋسىز. سونىمەن, اتاجۇرتتان ات تەرلەتىپ ءبىر توپ جاس بەشىر بەيدىڭ جارتى ايلىق قۇدايى قوناعى بولدى. ءوز اعامىزدىڭ ۇيىنە كەلگەندەي عالامات كۇيدە بولىپ, قاباعات قۋاندىق. اسىرەسە ارشاڭقىراپ قالعان قىز بالالاردىڭ شاتتىعىندا شەك جوق. وسىلايشا, ورىن ماسەلەسى جەڭىل شەشىلىپ, قىزداردى ورنالاستىرىپ بولعان سوڭ, مەن قالانىڭ تاعى ءبىر قيىرىندا تۇراتىن اپايىمنىڭ ۇيىنە كەتتىم.

اپايىم ارنايى تاكسي جىبەرىپتى. مەنى قۇرمەتتى قوناق رەتىندە شاقىرىپ وتىرعان اپايىمىز دا الاقۇيىن جىلداردا كوشكەن ەلمەن بىرگە كەلگەن تۋىستارىمىزدىڭ قىزى ەدى. مەنى الىپ كەتۋگە كەلگەن تاكسيشى دە سولاي. اتالارى جيىرما جىلدىق ۇركىن-قورقىن ۇزاق كوشارقىلى امان-ەسەن وسىندا جەتكەن ەكەن.

مەن باراتىن جەردىڭ اتى &ndash؛ گۇنەشلى. قازاقشا كۇنگەي, كۇن شۋاعى مول جەر دەگەندى بىلدىرسە كەرەك. جول بويى كولىك يەسى &ndash؛ ايقىنمەن اڭگىمەلەسىپ كەلەمىن, تولقىپ كەلەمىن. تولقىعان كوڭىلدى ءمارمار تەڭىزىن جاعالاپ جۇرەتىن ىركىلىسسىز كەڭ داڭعىل ودان ارى تەربەي تۇسۋدە. اسپان الابۇلتتاپ تۇر. شاعالا-قازدار, كوكقۇتاندار, سۇقسۇر ۇيرەكتەر اسپانعا اتقان وقتاي قالىقتاپ ۇشىپ بارىپ,  ؛قاناتتارىن كەڭ جايىپ, قايتادان مامىرلاپ ۇشا جونەلەدى. اسپان مەن جەر, تولقىعان كوڭىل مەن تولاعاي ءومىر توعىسقان ۇلى سۋرەتتى ءوز بوياۋىمەن, ءتىل ارقىلى بەينەلەپ بەرۋ دە قيىن.

وسىدان كەيىنگى باي مازمۇندى عاجاپ ساپارىمىزدىڭ جالعاسىن كەلەر جازبامىزدان وقيسىز. التى الاشتىڭ اسا اۋقىمدى ءبىر شوعىرى تۇرىكتەر قۇرعان قاعاناتتىڭ ورتالىعى, دۇنيە وركەنيەتىنىڭ قايناعان ءىرى وشاعى, كۇللى الەم كوز تىككەن ىستامبۇلدى بىرگە ارالايىق.

ادىلەت احمەتۇلى

اقىن, ا.بايتۇرسىنۇلى اتىنداعى ءتىل ءبىلىمى ينستيتۋتى گرامماتيكا ءبولىمىنىڭ قىزمەتكەرى

 ؛

 ؛

 ؛