مۇحامەدجان تازابەك: مەنى مازاق قىلعاندارعا مازمۇندى ءومىر بەرسىن...

باسىن اياعىنا, اياعىن باسىنا جاپسىرىپ, ءبىر سويلەمدى ەكىگە ءبولىپ تۇرىپ مونتاجداپ, ايرىقشا مايتالماندىق تانىتقان ەكەنسىزدەر...سونشاما كەزدەسۋدە, مۇنشاما "قاتىگەز, ەل بۇزارلىق, ەكى ءجۇزدى" سوزدەر ايتقان بولسام, كوزبە-كوز ەستىپ وتىرعان بىردە-بىر تىڭدارماننىڭ الەۋمەتتىك جەلىدە قارسى پىكىر بىلدىرمەگەنى قالاي؟

كەرىسىنشە جۇزدەسۋدەن ۇلتتىق رۋحى قايرالىپ, ريزاشىلىقتان اق باتاسىن جاۋدىرعان مىڭداعان اعايىننىڭ اق تىلەگى الدامشى العىستار ما ەدى؟!

اقىرى سىزدەردە تولىق ۆيدەو بار بولسا, اتا مەن اجەنىڭ, انا مەن بالانىڭ قادىر-قاسيەتىن ايتىپ, پاگوندىلاردىڭ كەيبىرى كوزىنە جاس العانىن نەگە كورسەتپەدىڭىزدەر؟

قاتايعان جۇرەكتەر مەن تۇرپايى مىنەزدەردىڭ ايىپتالعانىن, ء"بىرىنشى كەزەكتە ءتارتىپ پەن تالاپتى وزدەرىڭەن باستاۋ كەرەك" دەگەنىمدى نەگە كەسىپ تاستادىڭىزدار ەكەن؟

"بۇلىك كىسى ولتىرگەننەن جامان, ول قاتەرلى جول" ونىڭ قاتەرلىلىگى جايلى "الەمنىڭ بارلىق عالىمدارى كەلىسكەن, ءپاتۋا بەرگەن" دەپ ايتقانىمدى نەگە اجىراتتىڭىزدار. سوڭعى ءسوزدى مەككەدەگى جامباستان تەبەتىن پوليسيا جايلى اڭگىمەنىڭ ارتىنا نەگە جاپسىردىڭىزدار؟

قىتايدىڭ الەم قاۋىپتەنىپ وتىرعان تۇستارى مەن ودان امان قالۋدىڭ جولدارى جايلى ايتقان جارتى ساعاتتىق تولعانىسىمدى نەگە تولىق بەرمەدىڭىزدەر؟

"قىتايدان قورىقپايىق, قۇدايدان قورقايىق" دەگەن العاشقى سويلەمدى عانا نەگە ويىپ الدىڭىزدار؟

ەندى وسى روليكتى جاساعان نەمەسە سول جيىندارعا قاتىسقان تىڭدارماندارىما ءبىر ءشۇيىنشى-وتىنىشىم بار.

كەزدەسۋلەر كاسىبي كامەراعا تۇسىرىلگەن ەكەن. ونىڭ ۇستىنە اركىمنىڭ قالتاسىندا سمارتفوندار ءجۇر عوي. ەشبىر جەردە ەشكىمگە تۇسىرۋگە تيىم سالعام جوق.

قۇقىق قورعاۋشىلارعا قاراتا, "حالىقتى اياماڭدار, ۇرىڭدار, سوعىڭدار, ولار بۇلىكشىلەر, اياعىن سىندىرىڭدار, اتا-اجەنى جۇلمالاڭدار, ايەلدەر مەن بالا-شاعانى شىڭعىرتىڭدار" دەگەن 2 مينۋتتىق, تىم بولماسا مونتاجدالماعان 1 مينۋتتىق ۆيدەونى جۇرتقا جاريالاڭىزدارشى. بولماسا, قىتايدى جاقتاعان, ونىڭ داڭقىن اسپانداتقان 2 مينۋتتىق مونتاجدالماعان ۆيدەونى ماعان تاۋىپ بەرىڭىزدەرشى. تاۋىپ بەرگەن كىسىگە استىمداعى اتىمدى ءتۇسىپ بەرۋگە دايىنمىن...

ال,ەندى, شەتەلدە ءجۇرىپ, ەلدى الاڭعا شاقىرىپ, جۇرتقا وتىرىكتى شىنداي, شىندى قۇداي ۇرعانداي عىپ جەتكىزىپ, ارانداتۋمەن اينالىسىپ جۇرگەن جەرلەسىمىز جايلى ايتقانىم ايتقان. ەلدەگى كەمشىلىكتەردى ول ايتپاسا دا بىلەمىز. بىلگەندىكتەن ساپامىزدى ارتتىرىپ, سىنعاندى بۇتىندەۋ ءۇشىن كۇندىز-تۇن شاپقىلاپ ءجۇرمىز.

الاڭعا شىعۋ دا قازاقتىڭ قولى ەمەس. ەۋروپالىقتارداي الاڭعا 4 تە كەپ, 6 دا قايتىپ كەتەتىن قازاقتى ءازىر كورگەم جوق. شاقىرعان تويدىڭ وزىنە كەشىگىپ بارىپ, ءۇي يەسىنىڭ ۇيقىسى كەلگەندە ءبىراق قايتاتىن قاۋىمبىز. ءشايدان سوڭ سوڭ ءشاي ىشەتىنىمىز تاعى بار. شەرۋ - ءبىزدىڭ مەنتاليتەتكە شەتىن. قازاقتان الاڭدى قىزعانبايمىن. ارانداپ قالامىز با, دەپ الاڭدايمىن. بالە اياق استىندا. نيەتىڭىز بەيبىت شەرۋ شىعار... ؛

"جەتىسكەننەن شىعام با" دەرسىز...ەموسيونالدى ورتاعا كەلگەسىن ەشكىمگە گارانتيا جوق. وت جاعۋ وپ وڭاي. دامىعان ەلدەرگە ماسەلەسىن الاڭعا ەمەس, بىرەۋدىڭ ەلىنە بارىپ شەشسە دە "جاراسادى". وتاردان شىققان ەلدەرگە الاڭعا بارىپ, ماسەلە شەشپەك تۇگىلى, ۇيىندە وتىرىپ, شۇيىركەلەسۋدىڭ ءوزى وڭاي بوپ جاتقان جوق. اجىراسىپ جاتقان ءۇش وتباسىنىڭ بىرەۋى سوعان دالەل.

ال, ەلباسى جايلى ايتقانىم راس. ءوز اعاسىن اعالاماعان, كىسى اعاسىن جاعالايدى. سىزگە ۇناي ما, ۇناماي ما, ول ءبىزدىڭ ەلباسى! ول كىسىنىڭ ەرەن ەڭبەگىن ەشكىم تاريحتان سىزىپ تاستاي المايدى. پرەزيدەنت دەگەن پەرىشتە ەمەس. ءوزىڭدى ورىنىڭا قويىپ كورسەڭ, ويلاۋعا دا قورقاتىن تاعدىردىڭ يەسى. قيىن كەزدە ەل باسقاردى. "حاننىڭ سىرىن قۇل بىلمەيدى, قۇلدىڭ سىرىن كىم بىلمەيدى". زامان اۋىسادى. تالاي جاقسىلىق جانىمىزدى قۋانتار, ءالى. توقاەۆ پرەزيدەنت بولعالى دا قانشاما ۇمىتتەر ەسەلەنىپ, كوڭىلدەر كورىكتەندى. ءقازىر جاناشىرلىقتى جاعىمپازدىق, بەتپاقتىقتى باتىرلىق, دەپ قارايتىن كەزەڭدەمىز. ەستىگەنگە سەنبەڭىز, ارتىن تەكسەرىڭىز. كورگەنگە سەنبەڭىز, سەبەبىن ءبىلىڭىز. بىرەۋ كورە المايدى, بىرەۋ بالە ىزدەيدى. ءبىز جايلى ابايدان ارتىق ايتقان ادام جوق. ء"بىرىڭدى قازاق ءبىرىڭ دوس, كورمەسەڭ ءىستىڭ ءبارى بوس!"

كەشەلى-بەرى ينتەرنەتتى يىعىنان دەمالتتىق. تۇسىنبەي جەك كورگەننەن قولىمدا ولگىسى كەپ, جاقسى كورگەننەن جولىمدا ولگىسى كەپ جاتقان قازاق تا كوپ. قاپەرسىزدىكپەن قارعىس ايتىپ جاتقان دا, ءتۇبىن ءتۇسىنىپ العىس ايتىپ جاتقان دا ءوزىمنىڭ قازاعىم. ەشكىمگە رەنىشىم جوق. اۋىلدا تۋدىق, ەل تاربيەلەدى, حالىق قولدادى, كوپتىڭ قامىندا ءجۇرمىز...

بۇگىن ەستىپ وتىرعان جالام ەمەس, ەرتەڭ توقتاپ قالاتىن سىناق ەمەس... ءومىردىڭ وزەگى- سابىر مەن سالقىنقاندىلىق!

تابالاعاندارعا اللا تاۋپيح بەرسىن, مازاق قىلعاندارعا مازمۇندى ءومىر بەرسىن, بۇرمالاعاندارعا ءبىر قۇداي حيدايات بەرسىن!

مۇحامەدجان تازابەكتىڭ پاراقشاسىنان الىنعان. ؛