كۇندەلىكتى جەتىلۋگە كايدزەن قانداي كەڭەس بەرەدى؟

ومىر اعىمىنا قاراي ادام كەيدە وزگەرگىسى كەلەدى. ءوزىن جەتىلدىرىپ, جاڭا نارسەلەردى ۇيرەنۋگە دەگەن قىزىعۋشىلىعى تۋادى. سونداي شاقتاردا ءبارى بىردەن بولا قالسا ەكەن, ويلاعانىم اپ-ساتتە جۇزەگە اسسا عوي دەپ قيالعا بەرىلەتىنىمىز دە بار. ونىڭ قۇددى ءبىر قۇپياسى بولاتىن سياقتى سونى ىزدەپ ءتۇرلى كىتاپتاردى پاراقتاپ كەتەتىنىمىز دە جاسىرىن ەمەس. الايدا عاجايىپتى ءوزىمىز عانا جاسايتىنىمىزدى ۇمىت قالدىرامىز. ءارى ول ۇزدىكسىز ەڭبەك پەن تالاپتىڭ ارقاسىندا عانا كەلەتىنى بۇلتارتپاس شىندىق. جەر جاھانعا تانىلعان جاپوندىق كايدزەن جۇيەسى دە وسىنداي كوپكە بەلگىلى, ءبىراق قاپەرگە الا بەرمەيتىن قاراپايىم تاسىلدەر ارقىلى ويدى ىسكە اسىرۋعا كومەكتەسەدى.

وزىڭدى دامىتۋعا ارنالعان كىتاپتاردىڭ سانىندا بۇگىندە ەسەپ جوق. الايدا ەشقايسىسىنان دا ءبىر ساتتە ءومىردى تۇبەگەيلى وزگەرتەرلىك ءتاسىلدى تاپپايسىز. ويتكەنى ونداي ءتاسىل تابيعاتتا بولمايدى. ونىڭ ورنىنا نازارىڭىز بەن كۇش-جىگەرىڭىزدى وزگەرىسكە باستايتىن كۇندەلىكتى ىسكە باعىتتاڭىز.

بۇل جولدا سەرىك بولاتىن كايدزەن ۇسىناتىن كەڭەستەردىڭ ءبىرى &ndash؛ ماقساتقا كۇن ساناپ جاقىنداي ءتۇسۋ. ادامنىڭ تيىمدىلىگى مەن ءىستى اقىرىنا دەيىن جەتكىزۋ قابىلەتى مي جۇمىسىمەن تىكەلەي بايلانىستى. ۇلكەن ماقساتتار ميدى جاسقاندىرادى. ال ميدا قورقىنىش بولسا, وندا ونىڭ جۇمىسى ناشارلاي باستايدى. سونىڭ سالدارىنان ۇلكەن ماقساتتارعا بىردەن جەتەم دەگەن ويدان تۇك شىقپاي جاتادى. قولىڭنان كەلمەگەن ءىس ءۇشىن ءوزىڭدى جەگىدەي جەگەن سايىن ادام كۇيزەلىسكە تۇسكىش كەلەدى. ول دەنساۋلىققا زيان.

ماسەلە الدىعا ماقسات قويۋدا ەمەس, سول ماقساتقا جەتۋ جولىندا نەگە دايىن ەكەندىگىڭدە. ەگەر قالاعانىڭىزعا قول جەتكىڭىز كەلسە, كۇندەلىكتى اتقارۋعا ءتيىستى مايدا جۇمىستارعا باسا نازار اۋدارىڭىز. كايدزەننىڭ قۇپياسى دا وسىندا. كۇندەلىكتى جەتىلۋ. ءارى ۇلكەن سەكىرىس جاساۋ ماڭىزدى ەمەس. باستىسى بۇگىن كەشەگىگە قاراعاندا, ەرتەڭ بۇگىنگىگە قاراعاندا ۇزدىك بولا ءتۇسۋىڭ كەرەك.

سوندىقتان ءوزىڭىز تابىسقا جەتكىڭىز كەلگەن سالادا كۇنىنە 1 پايىزعا جەتىلە تۇسسەڭىز, جاڭا نارسە ۇيرەنسەڭىز, قابىلەت-ماشىعىڭىزدى ارتتىرساڭىز, ماقساتىڭىز جاقىنداي بەرەدى. باسىندا وزگەرىس سەزىلمەۋى دە مۇمكىن. ءبىراق ۋاقىت وتە كەلە ولار جينالىپ, ارتىپ, بىرنەشە اي, بىرنەشە جىل وتكەندە ناتيجە وزىنەن ءوزى كورىنەدى. سوندا سول كۇنگە قالاي جەتكەنىڭىزدى بايقاماي قالاسىز. سول ءۇشىن كۇن سايىن نە ىستەي الاتىنىڭىزدى ويلاپ, سوعان مىقتاپ كىرىسىڭىز. بۇگىنگى ەڭبەك ؛&ndash؛ ەرتەڭگى تابىستىڭ كىلتى ەكەنىن ۇمىتپاۋ اسا ماڭىزدى.

مۇنداي ءتاسىل وزگەرىسكە دەگەن ۇرەيدى جەڭۋگە كومەكتەسىپ, جۇمىستى جەڭىل قىلادى. وسىلاي ۇزدىكسىز دامۋدىڭ ارقاسىندا كەلگەن تابىس سىزگە ءومىر بويىنا ازىق بولادى.

جەتىلۋ ءۇردىسىنىڭ سوڭى بولمايتىنىن دا ۇمىتپاعان ءجون. ادام ءومىر بويى ۇيرەنىپ ءوتۋى مۇمكىن. ەسەسىنە ۇزدىكسىز ۇيرەنۋ &ndash؛ ادامدى قاجەتتى بىلىممەن بايىتىپ, كەرەك كەزدە ونى قولدانۋعا, ماسەلەلەردى وڭاي ءارى وڭتايلى شەشۋگە ىقپال ەتەدى.

ماڭىزدىسى &ndash؛ باستاي ءبىلۋ. ەڭ ابزالى قول قۋسىرىپ وتىرعاننان گورى, ازدان بولسا دا وزگەرىسكە قاراي قادام باسۋ.