"؛بىز ساۋدىڭ يا مۇگەدەكتىڭ قاتارىندا ەمەسپىز..."؛

جاقىندا سايتىمىزدا "شۇعىل كومەك كەرەك: ءامىر اناسىنىڭ داۋىسىن ەستىگىسى كەلەدى" اتتى ماقالا جاريالانعان بولاتىن. ماقالادان كەيىن ءامىر سياقتى تۋعاننان ءبىر قۇلاعى جوق جانە قۇلاعى بىتەۋ بالالاردىڭ ەلىمىزدە از ەمەستىگى انىقتالدى. وسى ورايدا qamshy.kz اقپارات اگەنتتىگى ماسەلەگە كەڭىرەك توقتالۋدى ءجون كوردى.

قازاقستان رەسپۋبليكاسىنىڭ دەنساۋلىق ساقتاۋ مينسترلىگىنىڭ 2018 جىلعى دەرەگى بويىنشا ەلىمىزدە تۋعاننان ءبىر قۇلاعى جوق جانە قۇلاعى بىتەۋ بالالاردىڭ سانى 670-تەن اسىپ جىعىلادى. وزەكتى ماسەلە جىل سايىن كوتەرىلگەنىمەن, مينيسترلىك ارەكەتى "قولعا الامىز", "الداعى ۋاقىتتا جوسپارلانۋدا" دەگەن سوزدەردەن ارى اسا الماۋدا.

نە ىستەرىن بىلمەگەن اتا-انالار ءوز بەتتەرىنشە امالداۋعا كوشكەن. whatsapp الەۋمەتتىك جەلىسىندە ارنايى چات اشىپ, بىر-بىرىنەن اقىل-كەڭەس سۇراپ تۇرادى.

بالاسى اتالعان دەرتكە شالدىققان اقمارال جۇسىپبەكوۆا اتتى اتا-انا دارىگەرلەر ايتپاعاندى چاتتان ءبىلىپ وتىراتىندارىن ايتتى.

&ndash؛ قازاقستاندا ميكروتيا جانە اترەزيا ەمدەلمەيدى. قر دسم "اقساي" رەسپۋبليكالىق كلينيكالىق بالالار اۋرۋحاناسى (كۆوتا ءۇشىن تىركەۋ, ساناق جۇرگىزۋى ءتيىس بولعان) ناقتى ناۋقاس سانىن بىلمەيتىن بولىپ شىقتى. 2017 جىلى ماليكا مەن سۆەتلانا ەسىمدى اتا-انا بىرىگىپ بۇكىل قازاقستاندىق بازا جاساۋدى قولعا الدى. وسى مəسەلەنى انالار دسم ەلجان ءبىرتانوۆتىڭ الدىندا دا كوتەرەدى. سول كەزدە ا.ر. مەدەۋلوۆا (اقسايداعى دارىگەر) قۇلاق اقاۋى بار بالالار 300-گە جۋىق دەپ ايتقان بولاتىن. كەيىنىرەك ونىڭ بۇل ءسوزى قاتە ەكەنى بەلگىلى بولدى. اتا-انالار بازا جاساۋ بارىسىندا 1500 بالانىڭ قۇلاق اقاۋى بار ەكەنىن انىقتادى. ونىڭ سىرتىندا اۋىل-ايماقتا ينتەرنەتسىز, حابارسىز قالعاندار قانشاما. چاتتا توپقا جاڭادان قوسىلعان انالارعا پسيحولوگيالىق جəنە اقپاراتتىق كومەك كورسەتىلەدى. جاڭالىقتى سول چاتتان جəنە فەيسبۋكتان ءبىلىپ وتىرامىز. دارىگەرلەر ايتپاعان, بىلمەگەن نəرسەنى وسى چاتتان بىلەمىز, &ndash؛ دەيدى ول.

بىر قۇلاعى جوق بالالار مۇگەدەكتەر ساناتىنا جاتپايتىندىقتان الەۋمەتتىك جاردەماقى بەرىلمەيدى. جاردەماقى تەك ەكى قۇلاعى بىردەي ەستىمەيتىن ناۋقاستارعا قاراستىرىلعان.

&ndash؛ 1-2 دارەجەگە مۇگەدەكتىك بەرىلمەيدى, بالا ەستيدى دەپ قايتارىپ جىبەرەدى. ال سۋردولوگ مامان اپپاراتپەن عانا ەستيدى دەيدى. سوندا ءبىز يا ساۋدىڭ قاتارىندا ەمەسپىز, يا مۇگەدەك قاتارىندا ەمەسپىز. ءبىراق اپپارات تاعۋىمىز كەرەك. مۇگەدەكتىك بولماسا كومەك بەرىلمەيدى, اينالىپ كەلىپ سالماق وزىمىمىزگە تۇسەدى, &ndash؛ دەيدى ابدەن شارشاعان اتا-انالاردىڭ ءبىرى.

گۇلنۇر ۋتەەۆا: "باسقا اۋرۋلارعا كۆوتا بار, بىزگە عانا جوق. سوسىن كوبىنە بۇنداي بالالاردا قوسىمشا دياگنوزدارى بولادى (سوپۋتستۆۋيۋششيە دياگنوزى): جۇرەكتە تەسىك, بەتتىڭ قيسايۋى(پارەز) سيندروم گولدەنحارا ت.ب. وسىنداي ماسەلەلەر وتە كوپ. قايعىسى ورتاق اتا-انانىڭ ءبارىنىڭ ماسەلەسى دە ورتاق".

بۇل سىرقاتپەن تۋىلعان سابيلەر نەلىكتەن جاردەماقى الا المايدى جانە بۇل ەمنىڭ قانداي شيپاسى بار دەگەن ساۋالعا س.اسفەندياروۆ اتىنداعى قازاق ۇلتتىق مەديسينالىق ۋنيۆەرسيتەتىنىڭ اقساي اۋرۋحاناسىنىڭ لور-ورتالىعى باسشىسى ايگۇل مەدەۋلوۆا جاۋاپ بەردى:

"بۇل دياگنوزبەن اۋىراتىن بالالارعا الەۋمەتتىك جاردەماقى بەرىلمەۋ سەبەبى ەكى قۇلاعى ەستىمەيتىن بالا مەن ءبىر قۇلاعىندا كەمىستىگى بار بالانىڭ ايىرماشىلىعى الدەقايدا جوعارى. ادام جالعىز قۇلاقپەن دىبىستى ەستىپ, سويلەيدى. بۇل بالالار جالپىعا ارنالعان بالاباقشا, مەكتەپكە بارادى. ولارعا ەمنىڭ دە قاجەتى جوق. ەشقانداي دارىگەر ولاردىڭ ەستۋ قابىلەتىن تولىق ورنىنا كەلتىرىپ بەرە المايدى".

سىرقات سابيلەردىڭ اتا-انالارى قر دسم وسى ماسەلەگە نازار اۋدارۋىن, الەۋمەتتىك جاردەماقى تولەنۋىن قالايدى. شەت ەلگە وتا جاساتۋعا كوبىرەك كۆوتا ءبولىنىپ, ارنايى اپپاراتتاردىڭ بارلىعىنا بىردەي تەگىن ۇسىنىلسا ەكەن دەپ ءۇمىت ەتەدى.