• usd 468.56

  • eur 497.56

  • rub 7.3

  • cny 67.18

29 ناۋرىز, 09:12:21
الماتى
+35°

ەلباسى 2020 جىلى بۇلدىرشىندەردى مەكتەپكە دەيىنگى ءبىلىم بەرۋ مەكەمەسىمەن قامتۋ دەڭگەيىن 100 پايىزعا جەتكىزۋ قاجەتتىگىن تاپسىرعانى بەلگىلى. وسىعان وراي, بۇگىندە مەملەكەت پەن جەكەمەنشىك ارىپتەستىك نەگىزىندە بالاباقشالار كوپتەپ اشىلۋدا. ياعني, كاسىپكەرلەر مەملەكەت جاساعان مۇمكىندىكتى جىبەرمەي, &ldquo؛بالاپان&rdquo؛ باعدارلاماسىن جانداندىرۋعا دەن قويۋدا.

بايزاق اۋدانىنىڭ جاڭاتۇرمىس اۋىلدىق وكرۋگىندە ورنالاسقان جىبەك جولى اۋىلىندا مەملەكەتتىك تاپسىرىس اياسىندا جەكەمەنشىك &ldquo؛بورتە&rdquo؛ بوبەكجاي - باقشاسى ەل يگىلىگىنە بەرىلدى.

بۇلدىرشىندەر مەن اتا-انالاردى قۋانىشقا بولەگەن سالتاناتقا اۋدان اكىمى نۇرجان نۇرجىگىتوۆ قاتىسىپ, ءوزىنىڭ ىزگى تىلەگىن ءبىلدىردى. نۇرجان مولديارۇلى سوڭعى جىلدارى ۇكىمەت تاراپىنان كورسەتىلىپ وتىرعان قولداۋلار ناتيجەسىندە مەملەكەت پەن جەكەمەنشىك ارىپتەستىك اياسىندا ون التىنشى بالاباقشانىڭ اشىلىپ وتىرعانىن, ناتيجەسىندە اۋداندا 3 پەن 6 جاس ارالىعىنداعى بالالاردى 100 پايىز مەكتەپكە دەيىنگى تاربيەمەن قامتۋعا قول جەتكىزىلگەنىن ايتتى. بارشا اۋىل تۇرعىندارىن ايتۋلى قۋانىشتارىمەن قۇتتىقتاپ, جەكە كاسىپكەر لاززات جاباتاەۆاعا ريزاشىلىعىن جەتكىزدى.

تۇرعىندار اتىنان ءسوز العان اۋىلدىق اقساقالدار القاسىنىڭ ءتوراعاسى بەيسەن جۇزگەنباەۆ بولاشاق ۇرپاقتىڭ تاربيەسى الدىمەن بالاباقشادان باستالاتىنىن العا تارتىپ, جەكە كاسىپكەردىڭ اۋىل بۇلدىرشىندەرىن قولداۋداعى قادامىنا ساتتىلىك تىلەدى.

100 ورىندىق قوس قاباتتى جاڭا عيماراتتىڭ كەرمە لەنتاسىن اقساقالدار القاسىنىڭ ءتوراعاسى بەيسەن جۇزگەنباەۆ پەن ەڭبەك ارداگەرى جۇماباي نۇراديلوۆ قيىپ, يگى تىلەكتەرىمەن ءبولىستى.

اتالمىش بالاباقشا قۇرىلىسىنا جەكە كاسىپكەر 230 ميلليون تەڭگەگە جۋىق قارجى جۇمساعان ەكەن. مۇندا ءتورت توپقا بولىنگەن 100 بۇلدىرشىنگە جەتى پەداگوگ تاربيە بەرەدى. سونداي-اق كىشى قىزمەتكەرلەر سانى ون ادامدى قۇرايدى. جاڭا عيماراتتىڭ تابالدىرىعىن اتتاعان 34 بالا اقشولاق اۋىلىنان, 30 بالا كوكباستاۋ مەن تەگىستىك اۋىلدارىنان تاسىمالدانسا, قالعان قىرىققا جۋىق ءبۇلدىرشىن جىبەك جولى اۋىلىنىڭ بالالارى.

سونىمەن قاتار, جاڭا نىساندا زامان تالابىنا سايكەس بارلىق مۇمكىندىكتەر قاراستىرىلعان. اتاپ ايتقاندا, مەكەمە مەڭگەرۋشىسى, ادىستەمەلىك, مەدبيكە, شارۋاشىلىق مەڭگەرۋشىسىنە جەكە-جەكە بولمەلەر بەرىلسە, ءار توپقا ويىن, جاتىن, تاماق ىشەتىن, كيىم شەشىنەتىن جانە اسحانا بولمەلەرى بولىنگەن. بارلىق بولمەلەر تالاپقا ساي بەزەندىرىلىپ, توسەك - ورىندار, قۇرال - جابدىقتارمەن قامتاماسىز ەتىلگەن.

شارادا بۇلدىرشىندەردىڭ جولداعان سازدى سالەمدەرى كوڭىلدەگى قۋانىشتى ۇستەي تۇسسە, جاڭا قونىستى ارالاپ كورگەن ۇلكەن - كىشى وسىناۋ بالعىندار ءۇشىن ۇلكەن سىي بولعان ىسكە بەك ريزاشىلىقتارىن ءبىلدىرىسىپ جاتتى.

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر