08 قىركۇيەك, 2019 ادەبيەت
نۇر-سۇلتان قالاسىنداعى اباي كوشەسىنىڭ بويىنان قالامگەرلەر اللەياسى اشىلدى دەپ حابارلايدى qamshy.kz اقپارات اگەنتتىگى. بۇل تۋرالى ؛قالالىق ؛اكىمدىكتىڭ رەسمي سايتىندا حابارلاندى. ؛
ەلوردادا ءوتىپ جاتقان ازيا ەلدەرى قالامگەرلەرىنىڭ ءى فورۋمىنا قاتىسۋشى اقىن-جازۋشىلار قالامگەرلەر اللەياسىنىڭ اشىلۋىنىڭ كۋاسى بولدى. سالتاناتتى شاراعا قالا اكىمىنىڭ ورىنباسارى باحتيار ماكەن مەن قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت جانە ولجاس سۇلەيمەنوۆ, تىنىشتىقبەك ابدىكاكىمۇلى سىندى قابىرعالى قالامگەرلەر قاتىستى.
شارادا العاشقى بولىپ ءسوز العان شاھار باسشىسىنىڭ ورىنباسارى باحتيار ماكەن قالانى جاقسارتۋدا بۇدان باسقا دا جوسپاردىڭ كوپ ەكەنىن اتاپ ءوتتى. ال ءوز كەزەگىندە جينالعانداردى قۇتتىقتاعان قازاقستان جازۋشىلار وداعىنىڭ ءتوراعاسى ۇلىقبەك ەسداۋلەت قالامگەرلەر اللەياسىنىڭ حاكىم ابايدىڭ اتىمەن اتالاتىن كوشەنىڭ بويىنان ورىن تەبۋى تەگىن ەمەس ەكەنىن جەتكىزدى. "ۇلى ابايدىڭ كوشەسىنىڭ بويىندا ورنالاسقان قالامگەرلەر اللەياسىمەن كەلە جاتقان اقىننىڭ شابىتى كەلىپ, ويىنان ولەڭنىڭ توگىلمەۋى مۇمكىن ەمەس. اللەيا نۇر-سۇلتانعا نۇر قوسىپ, تۇرعىنداردىڭ جۇرەگىنە جىر قوسا بەرسىن", - دەدى ۇلىقبەك ەسداۋلەت.
اباي - ءا. سەمبينوۆ كوشەلەرىنىڭ قيىلىسىندا ورنالاسقان قالامگەرلەر اللەياسى ەگەمەن قازاقستان كوشەسىنە دەيىن سوزىلىپ جاتىر. اللەيا اۋماعى - 1,2 گەكتار. ونىڭ 5,7 مىڭ شارشى مەترىنە تاس توسەلسە, 4,2 مىڭ شارشى مەترى اباتتاندىرىلعان. ياعني 50 شىرشا ەگىلىپ, 428 جارىقشام ورناتىلعان. ال اللەيانىڭ قاق ورتاسىنا ابايدىڭ ءسوزى جازىلعان مراموردان جاسالعان كىتاپ قويىلعان.
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر