شىمكەنتتەگى ۋنيۆەرسيتەتتە جۇرگىزىلگەن جوسپاردان تىس تەكسەرۋدىڭ ناتيجەلەرى بەلگىلى بولدى

2019 جىلعى 5-15 تامىز ارالىعىندا قازاقستان رەسپۋبليكاسى ءبىلىم جانە عىلىم مينيسترلىگى شىمكەنت قالاسىنىڭ ايماقتىق الەۋمەتتىك-يننوۆاسيالىق ۋنيۆەرسيتەتىندە جوسپاردان تىس تەكسەرۋ جۇرگىزگەن بولاتىن. اتالعان وقۋ ورنىندا جوعارى وقۋ ورىندارىنىڭ قىزمەتىنە قويىلاتىن 78 تالاپتىڭ ء63-ى ساقتالماعاندىعى انىقتالىپ وتىر.

جوسپاردان تىس تەكسەرۋ بارىسىندا ءبىرقاتار بۇزۋشىلىقتار انىقتالعان, اتاپ ايتساق جوعارى جانە جوعارى وقۋ ورنىنان كەيىنگى ءبىلىم بەرۋدىڭ مەملەكەتتىك ستاندارتىنىڭ تالاپتارى بۇزىلعان؛ جوعارى وقۋ ورىندارى قىزمەتىنىڭ ۇلگىلىك ەرەجەلەرىنىڭ تالاپتارى ساقتالماعان؛ جوعارى وقۋ ورىندارىنىڭ ءبىلىم بەرۋ قىزمەتىن ليسەنزيالاۋ كەزىندە قويىلاتىن بىلىكتىلىك تالاپتارىنا سايكەسسىزدىك فاكتىلەرى انىقتالعان.

سونداي-اق, وقۋعا قابىلداۋ ءتارتىبىن, ءبىلىم الۋشىلاردى اۋىستىرۋ جانە قايتا قابىلداۋ ءتارتىبىن, اكادەميالىق دەمالىس بەرۋ ءتارتىبىن ساقتاماۋ فاكتىلەرى اشكەرەلەنىپ وتىر.

ساباققا قاتىسپاعان ءبىرقاتار ستۋدەنتتەردىڭ سىناق-ەمتيحان سەسسياسىنا قاتىسۋ فاكتىلەرى تاعى بار. بۇل رەتتە, اتالعان ستۋدەنتتەر ۋنيۆەرسيتەتكە اقشا تولەي وتىرىپ, سەسسياعا جىبەرىلگەن. ۆەدوموست قاعازدارىندا ستۋدەنتتىڭ باعاسى كورسەتىلمەگەن, الايدا وقىتۋشىنىڭ قولى قويىلعان بوس باعاندار بار.

تىپتى باسقا ايماقتاردا تۇرىپ جاتقان جانە باسقا ۇيىمداردىڭ قىزمەتكەرلەرى بولىپ تابىلاتىن ادامداردىڭ ۋنيۆەرسيتەتتىڭ شتاتتىق قىزمەتكەرلەرى بولىپ قىزمەت ەتىپ ءجۇرۋ فاكتىلەرى انىقتالىپ وتىر.

سونىمەن قاتار, ءبىلىم جانە عىلىم مينيسترلىگىنە ۋنيۆەرسيتەت تۇلەكتەرىن جۇمىسقا ورنالاستىرۋ دەڭگەيى تۋرالى جالعان مالىمەتتەر بەرىلىپ وتىرعان. مىسالى, 2018 جىلى جۇمىسقا ورنالاسۋ دەڭگەيى ناقتى 34,4 پايىزدى قۇراعانىمەن, ۋنيۆەرسيتەت تاراپىنان كەلگەن رەسمي ەسەپتەردە 71,3 پايىز بولىپ كورسەتىلگەن.

بىلىم بەرۋ سالاسىنداعى زاڭنامانى بۇزۋ فاكتىلەرى بويىنشا مينيسترلىك ۋنيۆەرسيتەتكە قاتىستى 3 اكىمشىلىك قۇقىق بۇزۋشىلىق تۋرالى ءىس قوزعادى: جوعارى وقۋ ورىندارى قىزمەتىنىڭ ۇلگىلىك ەرەجەلەرىن بۇزعانى ءۇشىن, مەملەكەتتىك ءبىلىم بەرۋ ستاندارتىن ساقتاماعانى ءۇشىن جانە ليسەنزيالىق تالاپتارعا سايكەس كەلمەگەنى ءۇشىن. بۇگىنگى تاڭدا ءبىلىم بەرۋ سالاسىنداعى زاڭنامانى بۇزۋشىلىقتاردى جويۋ تۋرالى ۇيعارىم شىعارىلدى.

ەندىگى كەزەكتە اكىمشىلىك ءوندىرىس ماتەريالدارى وسى جىلدىڭ 23 تامىزىندا قارالاتىن بولادى. اقبتك-نىڭ وسى باپتارىنىڭ سانكسيالارى اكىمشىلىك ايىپپۇل سالۋدى, سونداي-اق ليسەنزيانىڭ قولدانىلۋىن 6 ايعا دەيىنگى مەرزىمگە توقتاتۋدى كوزدەيدى.

قابىلدانعان شارالار تۋرالى قوسىمشا حابارلايتىن بولامىز.

 ؛

قر بعم ءباسپاسوز قىزمەتى.