19 تامىز, 2019 ءدىن
بيىلعى جىلدىڭ قۇربان ايت مەرەكەسى دە ءوتىپ كەتتى. جاعدايى بارى مەككەگە ساپار شەكتى, وزگەسى قۇرباندىق شالدى, ەندى ءبىرى بارىمەن داستارقانىن جايىپ, ايتتاپ كەلۋشىلەردى كۇتىپ الىپ, شىعارىپ سالدى. ال وزگەلەر ءۇشىن ادەتتەگى كۇندەردىڭ بىرىندەي ءوتىپ كەتتى.
بۇگىنگى كۇننىڭ ورازا ايتىنىڭ دا, قۇربان ايتىنىڭ دا كەلبەتى وزگەشە. بۇرىن قانداي ەدى؟ بۇرىن دەگەنىم, ءبىزدىڭ بالا كەزدە. ءبىز قاشان بالا بولدىق؟ شامامەن, وسىدان 10-15 جىل بۇرىنعى جاعدايدى ايتسام...
"بۇگىن ەشكىمدىكىنە ايتتاماي قويا تۇرايىق. بىرەۋ-مىرەۋ كەپ قالار ۇيگە" دەپ ءبارىمىز ۇيدەن شىقپاي وتىرامىز ءبىرىنشى كۇنى. ەكىنشى كۇنى ايتتاۋعا ەندى شىعايىن دەپ جاتقاندا ۇيىنەن سەنەن ەرتەرەك شىققان بىرەۋلەر كەپ قالادى. ءسويتىپ جالعاسا بەرەدى... بۇرىن سولاي ەدى. ال, بۇگىندە, بايقاسام, ونشا ايتتامايدى ەشكىم. ءبارى جۇمىسباستى ما, الدە زاۋقى جوق پا... ءتىپتى ؛كورشىلەرگە دە كىرمەيدى. بۇرىنعىداي ما دەپ ءبىر كورشىمە "ايت قابىل بولسىن" ايتىپ كىرىپ ەم, ءتىپتى داستارحانى دا جايىلماعان. ءوزىم ىڭعايسىزداندىم. نان اۋىز ءتيىپ, كەتىپ قالدىم.
ال, بۇرىن شە؟ داستارحان جايىلعان, ءشاي بۇرقىلداپ قايناپ تۇرادى. قىس بولسا پەشتە شاۋگىم قايناپ, باسقا مەزگىلدە توق شاۋگىمدى قايتا-قايتا قايناتىپ, ايتشىلاردى كۇتىپ وتىرۋشى ەك. اناۋ كورشى كەلدى, مىناۋ كورشى كەلمەدى. سول كەلۋى كەرەك دەپ كۇتەسىڭ. كۇتكەندەرىڭ كەلەدى. اناۋ كورشىگە باردىم, مىناۋى قالدى دەپ جوسپارداعى تىندىرۋ كەرەك ىسىڭدەي مىندەت بولىپ تۇراتىن موينىڭدا. راس. بۇرىن سولاي ەدى. ول كەزدە بالا ەم. اتا-انام وسىلاي ىستەيتىن. ال, ءبىز, بالالار جينالىپ الىپ بىرگە كىرىپ شىعاتىنبىز ۇيدى-ۇيگە. ؛ەس بىلگەن شاقتا ۇيدە ايتتاپ كەلۋشىلەردى كۇتىپ ءقالاتىنبىز. ؛بىز قىزىق كورىپ, قىدىرۋدى, كامپيت جەۋدى, انانىڭ ۇيىنەن مىنانى جەدىم, انانى جەدىم دەپ ايتۋ ءۇشىن عانا ايتتايتىنبىز. ال, اتا-انامىز بارعان ۇيىنە اق تىلەكتەرىن جاۋدىرىپ كەلەتىن. ۇيگە كەلگەن ايتتاۋشىلار دا قۇرى بوس كەلمەي اق تىلەكتەرىن بىرگە الا كەلەتىن. اتا-انامنىڭ سول ادەتتەرىن كورىپ وسكەننەن كەيىن ءوزىڭ دە سولاي جاساعىڭ كەلەدى ەكەن.
الايدا, "سەن تيمەسەڭ مەن تيمە بادىراق كوز" دەپ, ءوزى ەشكىمدىكىنە ايتتامايتىن بولعان سوڭ ۇيىنە دە ەشكىم كەلمەيتىنىنە سەنىمدى تۇردە داستارقان جايمايتىندار دا بارشىلىق. كەيبىرەۋى ايتەۋىر ەل ءپىسىرىپ جاتىر دەپ اراپادا پىسىرگەن ساناۋلى ءتۇيىر باۋىرساعىن ەشكىم كەلمەيتىنىنە سەنىمدى بولسا دا "بىرەۋ كەلسە" دەپ ساقتاپ قويىپ وتىراتىن دا ادامدار بارىنا سەنىمدىمىن...
دەگەنمەن دە, كەيبىر اۋىلدى جەرلەردە ءالى دە مەنىڭ بالالىق شاعىمداعىداي ايتتاۋ ءداستۇرى بار ەكەنىنە سەنەمىن! ساقتاپ قالايىقشى سول ءداستۇردى, قازاعىم, باۋىرلارىم! ءداستۇردى ساقتاپ, ۇرپاققا قالدىراتىن ءسىز بەز ءبىز. ءبارىن وزىمىزدەن باستايىق. بيىلعى ولقىلىقتى كەلەر جىلى قايتالامايىق... ايتتايىق, اق تىلەكتى ايامايىق...
قاتە تاپساڭىز, قاجەتتى بولىكتى تاڭداپ ctrl+enter باسىڭىز.
پىكىر قالدىرۋ
پىكىر