ارىس قالاسىنداعى 190 جەكە تۇرعىن ءۇي تولىعىمەن جوندەلىپ, پايدالانۋعا بەرىلدى

بۇگىن ارىس قالاسىنا جامبىل وبلىستىق ءماسليحاتتتىڭ حاتشىسى باعلان قاراشولاقوۆ باستاعان ءماسليحات دەپۋتاتتارى, قوعامدىق جانە اقساقالدار كەڭەسىنىڭ ءتوراعالارى مەن مۇشەلەرى ارنايى كەلىپ, قالانى قالپىنا كەلتىرۋ شارالارىمەن تانىستى دەپ جازادى qamshy.kz اقپارات اگەنتتىگى.

ولار ورىن العان توتەنشە جاعدايدىڭ زارداپتارىن جويۋ بويىنشا وبلىس شتابىنىڭ جۇمىستارىن كوزبەن كورىپ, وڭىرگە تيەسىلى 3-سەكتورداعى قۇرىلىس بارىسىن جان-جاقتى بارلادى. سونداي-اق, ساپار بارىسىندا حالىق قالاۋلىلارى جەرگىلىكتى تۇرعىندارمەن كەزدەسىپ, حال-جاعداي سۇراسىپ, مال سويىپ, قۇدايى تاراتتى.

ايتا كەتەيىك, بۇگىندە ارىس قالاسىن قالپىنا كەلتىرۋ شارالارى قارقىندى اتقارىلۋدا دەسەك, ونداعى جامبىلدىق قۇرىلىسشىلاردىڭ جۇمىسى جەمىستى دەۋگە تولىق نەگىز بار. ناتيجەسىندە, بۇگىندە وبلىسقا تيەسىلى بولىنىستەگى 190 جەكە تۇرعىن ءۇيدى تولىعىمەن جوندەپ, پايدالانۋعا بەرىپ ۇلگەردى. ال, 120 ءۇي بويىنشا قالپىنا كەلتىرۋ جۇمىستارى ۇزدىكسىز جۇرگىزىلۋدە. وندا 4 مەردىگەر مەكەمەنىڭ 500-دەن استام قۇرىلىسشىسى ەڭبەك ەتۋدە. بارلىعى 20-دان استام تەحنيكا جۇمىلدىرىلعان.

ەسكە سالا كەتەيىك, ارىس قالاسىن قالپىنا كەلتىرۋگە باعىتتالعان جامبىل وبلىسىنىڭ شتابىنا قاراستى 3-سەكتورعا 11 كوشە بەكىتىلگەن. وندا 312 جەكە تۇرعىن ۇيمەن بىرگە 14 الەۋمەتتىك جانە كوممەرسيالىق نىسان بارى انىقتالعان. زەردەلەۋدەن وتكەن جەكە تۇرعىن ءۇيدىڭ بارلىعىنىڭ اقاۋ اكتىلەرى تولتىرىلىپ, سمەتالاۋ جۇمىستارى جاسالعان. قيراعان 3 ءۇيدىڭ ەكەۋى باسىنان بوي كوتەرىپ, بىرەۋى تولىق جاڭعىرتىلاتىن بولادى. قالعان ۇيلەرگە كۇردەلى جوندەۋ جۇمىستارىن جۇرگىزۋ جوسپارلانعان.