ءدىنتانۋشى: سيريادان كەلگەندەردە وزدەرىنىڭ يدەولوگياسىنا دەگەن كوزسىز جانكەشتىلىك بايقالادى
  • usd 468.56

  • eur 497.56

  • rub 7.3

  • cny 67.18

29 ناۋرىز, 19:12:17
الماتى
+35°

جىل باسىنان بەرى ءۇش مارتە جۇزەگە اسقان "جۋسان" گۋمانيتارلىق وپەراسياسى اياسىندا ەلگە 524 قازاقستاندىق جەتكىزىلدى. ولاردىڭ 30-ى ەر ادام, ء137-سى ايەل, ء357-سى بالا. ءبىرى اداسىپ, ءبىرى شاتاسىپ تەرىس اعىمنىڭ ۇگىت-ناسيحاتىنا ەرگەندەردىڭ دەنى سيرياعا 2012-2015 جىلدار ارالىعىندا اتتانعان.

جۋسان وپەراسياسى

قازاقستاندىقتاردىڭ سيريادا كورمەگەن تەپەرىشى جوق. قىسقاشا قايىرسا, ەرلەردىڭ كوبى سوعىس وشاعىندا وپات بولعان. ولارىن ءدىن جولىندا شەيىت بولۋ, مارتەبەلى ءولىم دەپ تۇسىنەدى. جەسىر قالعان ايەلدەر وزگە بىرەۋگە جار اتانىپ كەتە بارادى. ول جاقتا ايەلدەردى كۇيەۋلەرىنەن تەك اجال عانا ايىرمايدى . توياتى باسىلىپ, قىزدىڭ قىزىعى تاۋسىلعان سوڭ "تالاق" دەپ "ايەلىمەن" اجىراسا سالۋ تۇك ەمەس. كوڭىلى قالاسا مايدانداس دوسىنا زاتتى تارتۋ ەتكەندەي سىيعا بەرە سالۋ دا ءجيى كەزدەسەتىن جاعداي. سونىڭ كەسىرىنەن ءبىر جىلدا ون شاقتى ەركەككە "جار" اتانعاندار دا بار. اقىرىندا قىز-كەلىنشەكتەر "جىنىستىق جيھاد" اتالىپ جۇرگەن زاتى كادىمگى جەزوكشەلىكتەن ايىرماشىلىعى از جولعا تۇسەدى. بالالاردىڭ احۋالى دا قابىرعا قايىستىرارلىقتاي كۇيدە. كەيدە ءتىپتى اكەلەرىنىڭ كىم ەكەنىن بالالاردىڭ انالارىنىڭ ءوزى دە بىلمەي جاتادى. سول جاقتا دۇنيەگە كەلگەن بالالاردىڭ كوبى تۋعان تىلىنەن ماقۇرىم. ءوزىنىڭ تەگىنىڭ كىم ەكەنىنەن مۇلدە حابارسىز. كوزدەرىن اشقالى كورگەنى قان, شايقاس, ءولىم. ايالى الاقان, مەيىرىم, جىلۋلىق دەگەننىڭ ومىردە بارىنان حابارسىز ولاردىڭ ساناسىندا, دۇنيەتانىمىندا نە بولىپ جاتقانىن بولجاۋدىڭ ءوزى قيىن.

سۋرەت - bnews.kz

ەلگە جەتكىزىلگەن سوڭ ولار الدىمەن بەيىمدەۋ ورتالىقتارىنا جىبەرىلىپ وندا ءبىر اي كولەمىندە ءدىني وڭالتۋ شارالارى ءجۇرىپ, ماماندار اڭگىمەلەسۋ ارقىلى تەرىس اعىم جەتەگىنە كەتكەندەردىڭ بەتىن بەرى قاراتۋعا جۇمىس ىستەيدى. ارتىنشا تۇرعىلىقتى جەرىنە قاراي تۋعان-تۋىس, جاقىن ادامدارىنىڭ جانىنا تارالىپ كەتەدى. ارى قاراي ايماقتارداعى ىشكى ساياسات باسقارمالارى مەن قاۋىپسىزدىك مەكەمەلەرى قىزمەتكەرلەرىنىڭ قاداعالاۋىندا بولادى.

سيريادان ەلگە ورالعاندارمەن جۇمىس ىستەپ جاتقان بەلگىلى ءدىنتانۋشى كەڭشىلىك تىشقانۇلى kazgazeta.kz سايتىنا بەرگەن سۇحباتىندا وڭالتۋ شارالارى ءۇشىن ءبىر ايدىڭ ازدىق ەتەتىنىن ايتتى.

"بىر ايدا ادامدى ادام ەتىپ شىعارۋ, بۇكىل ءدىني نارسەنى دالەلدەۋ, ءدىني ساۋاتتىلىقتى كوتەرۋ مۇمكىن ەمەس. ونىڭ ۇستىنە بۇلاردىڭ 180 گرادۋستىق كوزقاراستارىن بەرى جاققا قاراي اۋدارۋ وتە قيىن. بىزگە بەرىلگەن ۋاقىت ءبىر اي عانا, بۇل وتە از ۋاقىت. ويتكەنى ادامنىڭ ءوزى ءبىر تاقىرىپتى ايتقاننان كەيىن ەكى-ۇش كۇن ويلانىپ, قورىتىپ, قابىلداۋى كەرەك. ول سىڭگەننەن كەيىن عانا ونىڭ ناتيجەسى شىعادى. بۇدان ارى قاراي دا بۇلار تەولوگ, پسيحولوگتارمەن جۇمىس ىستەۋلەرى كەرەك" دەيدى ول.

ادامنىڭ يمانداي سەنىپ جۇرگەنىن ءبىر ساتتە تارك ەتۋ, جىلدار بويى ءومىرىنىڭ وزەگى بولعان ويىن تەرىسكە شىعارۋ قيىننىڭ قيىنى. كەڭشىلىك تىشقانۇلى تەرىس اعىمعا تۇسكەندەردىڭ ءوز كوزقاراسىنان قايتپاۋعا تىرىساتىنىن, وزدەرىنىڭ يدەولوگياسىنا دەگەن ادالدىق, كوزسىز جانكەشتىلىكتى بايقاعان. بۇلاردىڭ ەڭ ۇلكەن پروبلەماسى &ndash؛ "شۋبحا" دەپ يمامداردىڭ ۋاعىزىن تىڭداماۋلارى. ۇستازدارىنىڭ "باسقالاردىڭ ۋاعىزىن تىڭداماڭدار" دەپ ايتقانى سانالارىنا شەگەلەنىپ قالعان. ەشقانداي سىني ويلاۋ جوق. ۇستازدارىنىڭ ايتقاندارىنىڭ دۇرىس-بۇرىستىعىنا كوز جەتكىزبەستەن, اقىل تارازىسىنا سالماستان قىلعىتا بەرگەن.

بەرىش بوپ قاتقان سەنىمدەرىنىڭ قاتە ەكەنىن ءتۇيسىندىرۋ ءۇشىن ءالى قانشا ۋاقىت كەرەك ەكەنى بەلگىسىز. ءبىراق مەملەكەتتىڭ ولاردى ۇدايى ۇستاي المايتىنى تاعى تۇسىنىكتى. ءدىنتانۋشىلار وسى ورايدا ەل بولىپ جۇمىلىپ, شالىس باسقان ازاماتتاردى جاتسىنباي, ورتاعا سىڭۋىنە جۇمىلا اتسالىسۋ اسا ماڭىزدى ەكەنىن ايتادى. قوعام ولاردى ءبولىپ, شەتتەتە بەرسە ولاردىڭ الەۋمەتتەنۋ پروسەسى قيىن جۇرەدى. ءتىپتى سىرت اينالىپ كەتۋى دە كادىك. جات اعىمنىڭ ىقپالىنا تۇسكەندەردى بۇل كەسەلدەن قۇلان تازا ايىقتىرماسا, ەلدە جۇرگەن بوتەن ويلى اعىمداردىڭ ارباۋىنا قايتادان ءتۇسىپ كەتۋى ابدەن ىقتيمال دەيدى ءدىنتانۋشى.

قامشىگەر

اۆتورمەن ونىڭ facebook پاراقشاسى ارقىلى حابارلاسۋعا بولادى.

جازىلىڭىز

"قامشى" سىلتەيدى

قاتە تاپساڭىز, قاجەتتى بولىكتى تاڭداپ ctrl+enter باسىڭىز.

پىكىر قالدىرۋ

پىكىر