سالىق كوبەيىپ, قولعا تيەتىن جالاقى ازايادى

ماماندار بيزنەستەگى قوسىمشا ۇستالىم قىزمەت پەن تاۋار قۇنىن قىمباتتاتىپ جىبەرۋى مۇمكىن دەپ قاۋىپتەنىپ وتىر. سايكەسىنشە, "كونۆەرتپەن" جالاقى بەرۋشىلەر دە ارتا تۇسەدى.

جاڭاشىلدىقتىڭ زاڭدىق نورمالارى 2015 جىلى ەنگىزىلگەنىمەن, كەلەر جىلدان باستاپ قانا كۇشىنە ەنبەك. ازىرلەۋشىلەردىڭ پىكىرىنشە, بۇنداي شارالار قازاقستاندىقتاردىڭ بولاشاق زەينەتاقىسىنىڭ مولشەرىن ارتتىرۋعا كومەكتەسەدى. ەندى بجزق شوتىنا ەڭبەكاقىنىڭ 15 پايىزى اۋدارىلاتىن بولادى.

بىراق ۇكىمەتتىڭ بۇل ارەكەتىن قۋانا قارسى الىپ جاتقان كاسىپكەرلەر كوپ ەمەس. ويتكەنى ولار ءۇشىن بۇل 5 پايىز قوسىمشا جۇك. اسىرەسە شاعىن جانە ورتا كاسىپ يەلەرىنە اۋىر. بۇگىندە جۇمىس بەرۋشىلەر الەۋمەتتىك سالىق جانە مىندەتتى مەديسينالىق ساقتاندىرۋ قورىنا (ممسق) قارجى اۋدارادى. ەندى زەينەتاقى تولەمدەرى قوسىلىپ جاتىر. ال مىندەتتى ساقتاندىرۋ قورىنا اۋدارىلىم 1,5 پايىزدان 3 پايىزعا دەيىن وسپەك.

وزگەرىستىڭ تەرىس سالدارىنىڭ ءبىرى &ndash؛ بيزنەس وكىلدەرى سالىققا كەتكەن قوسىمشا شىعىندى تاۋار مەن قىزمەت تۇرلەرىن قىمباتتاتۋ ارقىلى وتەۋگە تىرىسۋى مۇمكىن. قىمباتشىلىقتان قينالاتىن ارينە قاراپايىم حالىق.

ال سالىقتى از تولەۋ ءۇشىن تابىستى تومەندەتىپ كورسەتىپ, بيزنەستىڭ كولەگەيلى ەكونوميكاعا كەتۋىنەن مەملەكەت ەسەلەپ ۇتىلادى. سايكەسىنشە, رەسمي تۇردە از, قالعانىن قولعا بەرەتىن "كونۆەرتتىك" جالاقى ارتادى.

جاڭا نورمانى ەكونوميست ولجاس قۇدايبەرگەنوۆ ءوزىنىڭ فەيسبۋكتاعى پاراقشاسىندا مىسال جۇزىندە ءتۇسىندىرىپ بەردى.

"قىزمەتكەرىڭىزدىڭ كەسىمدى جالاقىسى 100 مىڭ تەڭگە دەپ الايىق. ودان زەينەتاقى قورىنا 10% = 10 مىڭ تەڭگە, قالعان سومادان (90 مىڭ) جەكە تابىس سالىعىنا تاعى 10% = 9 مىڭ ۇستالىنادى. سوندا قولعا 81 مىڭ تەڭگە تيەدى. بۇدان بولەك جۇمىس بەرۋشىلەر كەسىمدى جالاقىدان الەۋمەتتىك سالىق پەن الەۋمەتتىك تولەمگە 9,5% = 9,5 مىڭ تەڭگە, ممسق-عا 1,5 مىڭ تەڭگە تولەيدى.

2020 جىلدىڭ 1 قاڭتارىنان جۇمىس بەرۋشى 5 پايىز قوسىمشا زەينەتاقى قورىنا تولەم جاسايدى. ول جوعارىدا اتالعان جالاقىنىڭ تاعى 5 مىڭ تەڭگەسى. بۇدان بولەك, ممسق-عا 1,5%-دان 2%-عا دەيىن, 2022 جىلدان 3%-عا دەيىن قارجى اۋدارادى. بۇل ماناعى جالاقىنىڭ 3 مىڭ تەڭگەسى.

سوندا 2022 جىلى جالاقىسى 100 مىڭ تەڭگەلىك قازاقستاندىق قولىنا 79 مىڭ تەڭگە السا, جۇمىس بەرۋشى 100 مىڭ ەڭبەكاقى تولەگەنى ءۇشىن 38,5 مىڭ ياعني قولعا تيەتىن جالاقىنىڭ 49 پايىز مولشەرىندەگى سالىق تولەيدى" دەيدى ەكونوميست.

ەڭبەكاقى قورىنىڭ سالار سالماعىنىڭ اۋىر ەكەنىن اتاپ وتكەن ول سالىق جانە زەينەتاقى جۇيەسىن جەتىلدىرۋ كەرەك دەپ ەسەپتەيدى.

وسىلايشا مەملەكەت ازاماتتاردىڭ قارتتىعىن قامتاماسىز ەتۋ جاۋاپكەرشىلىگىن حالىقتىڭ ءوزى مەن جۇمىس بەرۋشىلەرگە ارتىپ قويۋدا.