بۇگىن جاس جازۋشى مەيىرجان جىلقىبايدىڭ قوس كىتابىنىڭ تۇساۋى كەسىلدى (فوتو)

بۇگىن الماتى قالاسىنداعى قازاق ۇلتتىق كىتاپحاناسىندا بالالار جازۋشىسى مەيىرجان جىلقىبايدىڭ قوس كىتابىنىڭ تۇساۋكەسەرى ءوتتى دەپ جازادى ؛qamshy.kz اقپارات اگەنتتىگى.

كىتاپحاناعا كىرگەن بويدا ۇلتتىق كيىم كيگەن قازاق قىزدارى قوناقتاردى قارسى الىپ, تۇساۋكەسەر وتەتىن زالعا جول سىلتەپ تۇردى. ادام قاراسى كوپ بولدى. البەتتە, قوناقتىڭ جارتىسىنان كوبى - بالالار جانە سونىمەن قاتار, تانىمال جازۋشى, جۋرناليستەر, اتا-انالار بولدى. ؛

كەش قازاقستان رەسپۋبليكاسى ۇلتتىق كىتاپحاناسى ديرەكتورىنىڭ اقپاراتتىق تەحنولوگيالار جانە يننوۆاسيالار جونىندەگى ورىنباسار يسكاليەۆا ءنۇريا امانعاليقىزىنىڭ قۇتتىقتاۋ ءسوز سويلەپ, ساحنا تورىنە مودەراتوردى شاقىرۋىمەن باستالدى.

الدىن الا دايىندالعان ساحنادا ازيا مادەنيەتى ورتالىعى جانىنداعى تەاتردىڭ ارتىستەرى كەڭەس دۇيسەننىڭ "جىل قالاي باستالادى؟" اتتى ەرتەگىسىنىڭ نەگىزىندە قۋىرشاقتاردىڭ ساحنالاندىرىلعان قويىلىمىن قويدى.

بىر ساعاتقا شامالاس قويىلعان قويىلىمدى قىزىعا تاماشالاعان بالاقايلار كارىس ءتىلىن تۇسىنبەسە دە, كورىنىستەردەن ەرتەگىنىڭ ءمان-ماعىناسىن ءتۇسىنىپ, ماز-مەيرام بولىپ وتىردى. ساحنالىق قويىلىمنان سوڭ شامالى ۇزىلىستەن كەيىن كەشتىڭ ەكىنشى ءبولىمى باستالدى.

كەشتى بەلگىلى جۋرناليست, جازۋشى ەسەي جەڭىسۇلى جۇرگىزدى.

كەشتىڭ ەكىنشى بولىمىندە ساحناعا قازاقستانداعى وڭتۇستىك كورەي رەسپۋبليكاسى ەلشىلىگىنىڭ الماتىداعى وكىلدىگىنىڭ باسشىسى, باس كونسۋل ي چين حو جانە كورەي رەسپۋبليكاسى ازيا مادەنيەتى ورتالىعىنىڭ حالىقارالىق قاتىناستار بويىنشا ساراپشى, تاريح عىلىمدارىنىڭ كانديداتى چجون بونسۋ مىرزا شاقىرىلىپ, قۇتتىقتاۋ سوزدەرى سويلەندى.

ودان كەيىن ؛ كەش سەبەپكەرى - مەيىرجان جىلقىبايدىڭ كورەي ەلىندە ءۇش تىلدە باسىلىپ شىققان "باتىر قويان" جانە "تاۋعا ساياحات" كىتاپتارىنىڭ لەنتاسىن قيۋ ءۇشىن ؛ساحناعا دراماتۋرگ, "پلاتيندى تارلان" تاۋەلسىز سىيلىعىنىڭ يەگەرى دۋلات يسابەكوۆ, جازۋشى كەڭەس دۇيسەن جانە كورەي دەلەگاسياسىنىڭ وكىلى شاقىرىلدى. ؛

لەنتاسى قيىلىپ, قۇتتىقتاۋ سوزدەرى سويلەنگەن سوڭ اۆتور كەش قوناقتارىنا كىتاپتارىن تانىستىردى. ؛

ارتىنشا اتالعان كىتاپتىڭ ءبىرى - "باتىر قويان" بويىنشا سالىنعان سۋرەتتەر نەگىزىندە قۇراستىرىلعان مۋلتفيلم كورسەتىلدى. ەكراندا كارىس تىلىندە جازىلعان مۋلتفيلم بالالارعا قازاق تىلىندە ؛ تۇسىنىكتى ەتىپ جەتكىزىلدى. ؛

كەشتىڭ ءۇشىنشى بولىمىندە مۋزىكالىق باعدارلامادا دومبىرا شەرتىلىپ, ءان شىرقالدى.

كەش سوڭىندا بالاقايلارعا ارنايى دايىندالعان سىيلىق - "باتىر قويان" كىتابى, بوياماعى جانە ءتۇرلى-تۇستى قارىنداشتار تەگىن تاراتىلدى. ؛

 ؛