ارىستا رادياسيا ءقاۋپى بولۋى مۇمكىن: 4 ادام اياق استىنان قايتىس بولدى

ارىستا 18 جاستاعى جاس جىگىت بەلگىسىز جاعدايدا قايتىس بولدى, دەپ حابارلايدى qamshy.kz اقپارات اگەنتتىگى stan.kz سايتىنا سىلتەمە جاساپ. ؛

شىمكەنت قالاسىندا وقيتىن ستۋدەنت دۇكەنگە شىعىپ, كەنەتتەن قۇلاپ, جۇرەگى توقتاپ قالعان. قارا جامىلعان وتباسىدان سۇحبات الۋ مۇمكىن بولمادى, الايدا مارقۇم جىگىتتىڭ اناسىنىڭ قۇربىسى وقيعانىڭ قالاي بولعانىن ايتىپ بەردى.

"ساپ-ساۋ جۇرگەن بالا, سىرقات دەگەندى بىلمەيدى. جاپ-جارقىن, وتباسىنىڭ قامقورشىسى. تۇسكى ۋاقىتتا دۇكەنگە بارىپ, سول جاقتا ەسىنەن تانىپ, قايتىس بولدى. شىنىمدى ايتسام, سەنە الماي وتىرمىز. كوز الدىمىزدا وسكەن بالا ەدى. ونىڭ نەدەن قايتىس بولعانى ءالى ناقتىلانبادى. دارىگەرلەر دەنەسىن الىپ كەتتى, قورىتىندى جاسالىنبادى ءالى", - دەگەن التىناي شىنتاسوۆا قۇربىسىنىڭ ۇلىنىڭ ولىمىنەن سوڭ الاڭداۋشىلىق تانىتا باستاعانىن جەتكىزدى. ايتۋىنشا, ارىس قالاسىندا ورىن العان جارىلىستان كەيىن ءولىم-جىتىم بىرىنەن سوڭ ءبىرى كوبەيدى.

"وتكەندە عانا تورابتىق اۋرۋحاناعا جاقىن ماڭدا تۇراتىن ەر كىسىنىڭ وسىلاي ەسىنەن تانىپ, قايتىس بولعانىن بىلەمىز. ودان كەيىن جۋىردا قالاداعى مەكەمەلەردىڭ بىرىندە ەدەن جۋۋشى بولىپ جۇمىس ىستەيتىن ايەل دە كەنەتتەن قايتىس بولدى. جاقىندا ءوزىمنىڭ سىنىپتاسىم باقيلىق بولدى. ساپ-ساۋ جۇرگەن ادامدار. تۇسىنەمىن, ەگدە جاستاعى ادامدار قايتىس بولعان بولسا جاسى كەلگەن دەر ەدىك. ءبىراق جاپ-جاس ادامدار, ارتىندا جىلاپ-ەڭىرەپ بالا-شاعاسى قالدى. ارىستا رادياسيا جوق دەيدى. ەگەر جوق بولسا, نەگە ءبىزدىڭ دەنساۋلىعىمىز ءجيى سىر بەرەدى. ءدارىسىز جۇرە المايتىن بولدىق. نەگە ءولىم كوبەيىپ كەتتى", - دەدى تۇرعىن.

ال ارىس قالاسىنىڭ اكىمى مۇرات قادىربەك شاھاردا رادياسيا ءقاۋپى جوق دەپ سەندىردى. سەبەبى ارنايى قۇزىرلى مەكەمەدەگىلەر بارلىق تەكسەرۋ شاراسىن جۇرگىزگەن. ەگەر قانداي دا ءبىر ءقاۋىپ بولسا, تۇرعىندار قالاعا كىرگىزىلمەيتىن ەدى دەپ وتىر. ءتىپتى ارىستىقتار تۇتىنىپ وتىرعان سۋدان دا كەلەر زيان جوق دەگەندى العا تارتتى.

ەستەرىڭىزگە سالا كەتسەك, 24 ماۋسىم كۇنى تۇركىستان وبلىسى, ارىس قالاسىندا ءىرى جارىلىس بولدى.